Jose ze mez Potifar
39
Kero bo ya na Jose ze Ejitu, Potifar, ñiinzan ninsi Ejitu, ntihun nyeek ninsi Faro, nyeek boyeŋ, ganza ze kñen boismaelita bo yakun na lo dolo. 2 NYEEK o na Jose, ka ŋun ka yana lo na mnjona. Ka duko ze mez nyeek lo ninsi Ejitu. 3 Potifar iin ja NYEEK ona Jose, zonkont ŋun akdoŋi, NYEEK aka zuŋa antom ŋyana mnjona. 4 Hunkran Jose iindun kñago Zurun Potifar, ka abi o ña ahazni. Zonkont un ominzun, Potifar zu a duzu bo tihun lo uzuuz ze mez lo, zu ŋun uzuuz akaŋi ze kñen lo. 5 Kero a zu lo duzu ŋun uzuuz ŋnsi akaŋi ze mez, NYEEK zu mnjona ze mez Potifar nnsi Ejitu zonkont Jose, Kñago ksi NYEEK kho duzu ŋun Potifar kaŋi uzuuz , ze mez na ŋnsi akaŋi ze ksaal. 6 Hunkran ahutnun ŋun uzuuz ŋnsi akaŋi ze kñen Jose. Aza kzaaf na un oloŋo, ze mbaza ode lo a onkona olo. Jose o nmpoz nzal anuroi ba yuk oleef.7 Zozipr ŋun ŋmizŋi ka ahar Potifar bi yutzar Jose, zu kil ze lo, antom jak lo: "Bi piinz na nji". 8 Ka Jose yeeli, jak lo: "Tere! Nminz ni azi doonun na un oloŋ ze mez, Ŋun akaŋi uzuuz a zu ŋa ze kñen ni. 9 Ze mez osi ozi ka ña duzu ni, nminz ni azi neenin un oloŋ, ze mbaza wya, zonkont woko ahar. Mbazi hilun pdo un oliinknink, Mbazo pjuu ze Uzi?" 10 Ka ñaaz du ko ku lo ze kfez lo na ŋnu, ka Jose yeel phya pñog ze lo, ka azi nimro na yaa. 11 Zonwan, ka ya mez phya pdol utihun usi akai pdo; Ka botihun lo ze mez bozi oza. 12 Ka ñaaz bup lo ze kmbisa, jak lo: "Bi nimi." Ka Jose bur ze kñen lo, utnar lo kmbis ze kñen lo zii pun uri. 13 Kero ka me ja azii pun uri duk kmbis ze kñen lo, 14 Ka ñaaz du boiinz bosi mez, jak boko: "Nde tenun, un nyebreu nhini biinink zi, abi jeu pdolin irah pnimin. Abilan ankint jau zun nji oonzi antom bi pmumi; ka nji kiik maakrin. 15 Kero ka te nji ka kiik, ka hutun kmbis lo ze kñen ni antom zii pun uri. 16 Ka baan kmbis kminzkun ze kwaŋ lo anka nyeek Jose kint kak ze mez. 17 Ka zuup lo irim iminzyun, jak lo: "Nnjuuk nyebreu asi ubiinunk antom adolin irah, abiirin pmuum. 18 Kero ka nji kiik maakrin, ka hutun kmbis lo ze kñen ni zii pun uri." 19 Ka nmiz Jose te olado osi ahar zupi lo, ze mi nnjuuk lo domunk lo; ka deuz maakrin. 20 Ka nminz Jose bup lo, ya dis ze kalauz zun baña bosi nliin disnozi ze kalauz. Kero ka o ze kalauz. 21 NYEEK o na Jose, jaŋ lo mnjona, hulo kñago Zurun nyeek boyeŋ kalauz. 22 Nyeek kalauz zu Jose duzu baña uzuuz bonhoki ze kalauz. 23 Nyeek kalauz azi pot zaaf na un oloŋ onhoi ze kñen Jose, zonkont NYEEK hil ona Jose ŋun uzuuz ŋnsi Akdoŋi ŋhya na mnjona.