Juda na Tamar
38
Zokil ominzun Juda hutun pzaro lo, ya duko na ñiinz akndwoi Ira ninsi kmbaau Adulan. 2 Juda iin nda awk ñiinzan nnkananeu nmpili akndwoi Swa, ka jek lo, antom ka bomadoo. 3 Ka abi leempoo buk nmpoz zulo ktiim Er. 4 Ka pot leempoo buk nmpoz aloŋ; ka aniin dulo ktiim Onaŋ. 5 Ka pot buk nmpoz aloŋ, zulo ktiim Sela; a ika o ze Kesibe kero ka buk lo. 6 Ka Juda jek ñaaz antom hul nnsek lo Er, ktiim lo dwo Tamar. 7 Er, nnsek Juda, azi ona mnjona zurun NYEEK, ka NYEEK fiŋ lo. 8 Juda jak Onaŋ: "Jekun ahar amaku, antom uiij ubuk nmpoz na lo zonkont amaku." 9 Onaŋ me ja, za buk nmpoz, azo pho ninsi lo. Hunkran, zanim ahar amaka, aka has undiu lo zozee, akikbi kbukr amaka kiiña. 10 Un adolunk ohuzi zurun NYEEK, hunkran NYEEK fiŋdun lo uz. 11 Juda jak Tamar, ahar awk: "Dukon jaunk ze mez aliinu an nmbukin Sela, akint a o nyeek."A jaka jaunk zonkont: "Ajaŋzan Sela opkez injaka bomaka. "Hunkran Tamar yadun duko ze mez aliin.12 Ozip ŋnkil ŋnsumŋi, ahar Juda, awk Swa, kezi. Juda ya ze Timnat, antom phya pten boiinz bo knfalki ŋmpalalu lo oyel. Hira, ahindu lo Adulamita, a sona ya. 13 Ña loŋ zuup Tamar: "Tere aliin ahinu akhyaunk ze Timnat antom phya pfal ŋmpalalu lo oyel. 14 Ka Tamar punun yun lo isi pjiŋ pkeznan ahina, ler mnkil otira antom ña ki khikran lo, zoo ze plumun phyeek psi Enaiŋ, ze plumun phyeek ze kwaŋ Timnat, zonkont aiin ja Sela a o nyeek, Juda azi hula ya antom amar lo. 15 Ka Juda iin lo, jaŋzan ñaaz nhaap oleef a ze mi alermunk mnkil. 16 Ka ya ze lo ze book, zonkont azi mee ahar awka. Ka jak lo: "Biri antom nnimu; Tamar yep lo: "El woun phulin antom nnimro na wi?" 17 Ka jak lo: "Njo philanu opi okal osi kmeh" Ka yep lo: "Wo pdukrin un oloŋo an ukint uhilan olo?" 18 Ka a yep lo: "Oye njoun philun pdukru? Ka Tamar jak lo: "Karimbu nu na omarka kolo, ptal kolo na plaŋra psi ubupun ze kñene. "Ka hul lo ŋolo, antom nimro na lo; ka leempoo. 19 Ka Tamar deeŋo soli punun otira osi alernunk mnkil, ka pot timoo yun isi ña akeznani ahina.
20 Juda hilan opi ompozi ze kñen ahindu lo adulamita, antom a ya seh ŋun ŋnsi adukŋunk ze kñen ñaaz, azi ya iina. 21 Ka yep boiinz bonhokunk zun ze minzun: "Ka ñaaz anka khaap oleef anhili zoo ze book ze kwaŋ plumun phyeek psi Enain?" Ka bo seemb lo: "Ñaz aloŋ nhap oleef azi o zunzi." 22 Ka kak ze Juda, jak lo: "Mbazi iina. Boiinz bosi zun ze minzun bo jakin ozi ka ñaaz nhaap oleef zunzi." 23 Juda jaa: "Ze mi nji hilamunk lo owk opi uzi ya iina, a hilun pduko na ŋun ŋminzŋun. Nja ki kmolo."
24 Pgutnar pli phajzan ña bi zuup Juda: "Tenun Tamar, ahar awku, adoko injaka bohaz bohap oleef. Krank aleempoo."Juda jaa: "Nde punan naa zuri antom aturo." 25 Kero ka bo ka punun lo zuri, ka hilan pzuup aliin ahina: "Nji leempoo na ñiinz ankai ŋun ŋdaŋi. Tenun zu hilun piikran ña kai karimbu ki, ptala na o ŋoli." 26 Juda hikran ja ŋun ŋminzŋun ŋnsi lo ŋa, ka jaa: "Alo apein pjaal, zonkont mbazi hutnan amado na nmbukin Sela. Ka Juda azi pot nimro na yaa."
27 Ze pli psi aun buk na, a ka ŋntantl ze pu lo. 28 Kero ka buki, nmpoz aloŋ punun kñen lo zuri. Bo bukbukun jek pmmuz pjeenkle, tan lo ze kñen kminzkun, jaa: "Andai punun urun." 29 Ka atkakun kñen lo; ka aza puni. Ka bo bukbukun jaa: "Hunkran utaudun puni!" Ze minzmun ka dwo Peres. 30 Kero ka amaka ankaunk pmmuz pjeenkle ze kñen lo bi puni; adwo Zera.