Jose na pzaro lo
37
Jako o zosaak osi aliin hili oni, oi osaak Kanan. 2 Hunkran o irdun ze mho Jako . Kero Jose ka ŋnlur 17, a hil aka yafun ŋmpalalu ŋnsi aliin boko, bowk Bila na bowk Zilpa, bohar aliin; Jose ahil aka zuup aliin ŋun ŋhuzŋi ŋnsi bo maka kdo ŋi. 3 Israel fundar Jose ampempen bowk uzuuz , zonkont abuka kero azafi. A luta kmbis kyeek na mbau mnsumi. 4 Kero bomak me ja aliin boko pe pfundara ampenpen boko uzuuz , ka bozi lindara; bozi pot hilun plado na lo na phyooŋ.5 Jose zaafi ozaafian zuup bomaka; un ominzun bi zu boko bo pe pdeuzar lo. 6 Ka jak boko: "Nde ñagonan, nde siinkun ozaafi osi nji zaafii: 7 Nja hil ze tan, ŋntan ŋnsi trigu ze ksaal. Utan ni deeŋo nazi, ka ŋntan nde bi foyo wolo, antom ŋupr wolo. 8 Bomaka jak lo: " Wo pliho duzu ndo? Wi, woun pliho duzu ndo?" Bo pe pdeuzara zonkont ŋnzaafi lo, na olado osi azuupi boko. 9 Apot bi zaafi ozaafi an, azuup bomaka, jaa: "Nde mee? Nji zaafi onwan, onu na pli, na ŋhuzu 11 ŋnjuz uzuuz zurun ni". 10 Kero ka azuup aliin na bomaka, ka aliin bi ŋaj lo, jak lo: "Kozaafi oona osi uzaafii? Ka nji na aniinu na bomaku, ndo bi pŋup zurun nu zozee? 11 Ka bomaka taajr lo, ka aliin baap un ominzun zujuuns lo.
12 Ka bo maka sol phya phyafun ŋnsaam aliin boko ze pñog Sikeŋ. 13 Israel jak Jose: "Ume bomaku bo o ze phyafun ŋnsaam ze pñog Sikeŋ? Biri, njo philu ze baka." Ka semb lo. "Nji utnori phya:" 14 Ka aliin jak lo: "Solun, uya ten mnsi bomaku omi, na ŋnsaam uz; antom ubi zuupin. "Hunkran a hildun lo ptep zunjir Ebroŋ aya anjau ze Sikeŋ. 15 Mnsi a khyanzmunk zeplal bomaka ka ñiinz aloŋ jik na lo, yep lo: "Ka yeel ukberun? 16 Ka a seemb lo: "Njo ze plaal bomakin. Ñagonan, zuapan zun bo khyafninzi ŋnsaam." 17 Ka ñiinz aminzun jaklo: "Bo punzi. Nji te baka, ka bo ka ja bo phya Dotaŋ." Hunkran Jose yaanzdun ze kfez bomaka, iin boko ze Dotaŋ. 18 Bo iina un onloi, kero azo jaw zun bo oonzi; bo bamni antom pfiŋ lo. 19 Ka bo sembroo: "Nde tenun, nnzaafi nyeek kbilunk! 20 Nde bir antom nja fiŋ lo, nja lis lo zuir; "Antom nja ja: ogoŋar pgof fiŋa antom de lo; Nja ten un onhoi bi piir ze ŋnzaafi lo!" 21 Kero Rubeŋ te olado ominzun, burburun lo ze iñen boko, jaa: "Nja ki kfiŋ lo. 22 Nja ki khas pñaak! Nde lis na zuir undawi zolaal, nde ika zu kñen duzu lo." Rubeŋ ja un ominzun antom philun pburburun lo ze iñen boko; antom pkakun lo aliin. 23 Kero ka Jose jaw zun bo maka oonzi, bo punun lo kmbis kyeekun, knkakunk mbau mnsumi, knkañki iñene ba nuro, ksi ahoroki. 24 Ka bo bup Jose, lis zuir, ka uir hil oko usiil bozi hil ka mnzup.
25 Kero bo zo pde poŋ, ka bo ten iin knzoŋ ksi boismaelita bo ka biin Jileadi; Ŋnsuntukluŋ boko ka bina ŋarser, na oharser osi bupna klikis ki kbi kñeel, na mun mikndwomi mira, mnsi bo sonmi phyan Ejitu. 26 Juda jak pzaro boko: "Oye njaun pka ze nja fiŋ aza nja, antom pmenun pñaak lo? 27 Nde bir nja haap lo boismaelita. Nja ikzu Iñen nja duzu lo, zonkont a oko aza nja, an kai oleef nja. Ka bo digzani. 28 Kero bohapa bomidyanita ka zip, ka bo punun Jose zuir, hap lo boismaelita 20 ŋnsi osaam prat; bo sona Jose yan Ejitu.
29 Rubeŋ bi kak zuir, phya pten Jose azi iina. Aduko na kjozi pas yun atiimohi. 30 Ka ya ze boza, jak boko: "Nmpoz azi oza! Njoko phya zoon, ze krankanki? 31 Ka bo jek kmbis Jose kyeek knkaki mbau mnsumi, bo fiŋ opi okal ontiik, zopun kolo pñaak. 32 Ka bo hilan aliin kolo antom jaa: Ndo iin kmbis ki ze pgof. Tenun ka na mnjona, ze kampho ksi awku. 33 Ka hikran kolo, lado na kjozi jaa: "Kmbiski ko ksi nmbukin! Ogoŋar osi pgof fiŋa. Zowadadi Jose o falfalnu!" 34 Jako pas yun atiimohi, antom tiimo olaaku, budar awk ŋnu ŋnsumŋi. 35 Bowk uzuuz boiinz na bohaz, bo deeŋo phul lo klinsi, azi digzan antom bo hul lo klinsi. Ka jaa: "Zowadadi, njoko phudar nmbukin ampjau onu osi njoi phya ze zun baña bonkezki oonzi." Hunkran aliin hudarun Jose. 36 Bomidyanita hap Jose ze Ejitu ze kñen Potifar, nyeek bogutun bosi Faro.