Dina Juun oo
34
Dina awk Leya buki na Jako, apun phya pten bompili osaak ominzun. 2 Sikeŋ awk Amor, nhyeveu, ahil o nmbuli osaak ominzun, iin lo, jek lo juun lo ba behran lo. 3 Oyek lo nej osi Dina, awk Jako, ka fundar lo na mnjona. 4 Sikeŋ jak aliin lo Hamor: "Jekan nmpili andai antom a o nharin. 5 Kero Jako me ja awk lo Dina juuno, bowk hil o ze ksaal na ŋnsaam. Ka joou anka bo kint bili. 6 Hamor aliin Sikeŋ, ka ya lado na Jako. 7 Bowk Jako biin ksaal te un ominzun bo duko na kjoozi maakrin deuz un onsumi, zonkont Sikeŋ doli un onhuzi ze Israel, ze mi ajuumunk Dina, awk Jako; a do knah, un anipiir pdo.8 Hamor jak boko: "Nmbukin Sikeŋ fundar awk de. Nji ñaun nde, nde hulo, lo antom amar. 9 Hunkran nde hilundun pho ze phukpliin na ndo, antom nde hul ndo bowk nde bohaz, antom nde sa jek bowk ndo bohaz nde nim. 10 Nde hilun pzoo ze psoof ndo. Osaaki zurun nde. Antom nde zoo nde dol utihun nde; isaal iloŋ o pho isinde. 11 Sikeŋ jak aliin na bomak Dina: "Nji jeu piin kñago zurun ikil nde. Njo phul nde un nde jeu. 12 Nde hilun psig unima maakrin ze mi nde jeumi, nde ñaunan ndo uz ŋun nde firŋi; ndo phul nde ŋa uzuuz . Nji jeu ze nde hulin nmpili andai antom mmar.
13 Ze mi aza boko Dina juunomunk, bowk Jako semb Sikeŋ na aliin lo Hamor na udara. 14 Bo jak boko: "ndozi hilun pdo un onhoi injaka ondai, phul aza ndo ñiinz aniphya pleke, oko mmol ze ndo. 15 Ndo pdigzan ze nde pho injaka ndo; boiinz uzuuz bo phato pleke. 16 Hunkran ndoun phul nde bowk ndo bohaz, antom ndo nimro na bowk nde bohaz. Ndo pzoo na nde, nja pho kzoŋ kloŋ ksi bopugi. 17 Ze nde ampdigzan phato pleke ndo pjek aza ndo psona.
18 Olado ominzun namzan o na mnjona zurun Hamor na awk lo Sikeŋ. 19 Hunkran nmpoz nzala ankaunk ulujul ze psoof bowkoliin, azi jon pdo un boñauni, zonkont afundar awk Jako aminzun. 20 Hamor na awk lo Sikeŋ, bo ya ze plumun kmbaau, lado na boiinz kmbaau jak boko. 21 Boiinz bominzkun bo jeu piij na nja. Nja hutun boko bo zo zosaak ki, bo dol wapa zunzi. Nja ka isaal imaghi zunzi phul boko. Nja hilun pnimro na bowk boko antom bosa nimro na bowk nja. 22 Boiinz bominzkun bo pdigza pzoo na nja, antom nja o ze mndo ŋun mnloŋ. Ze bopoz bozala digzan phato pleke injaka boko. 23 Ŋnsaam boko na ŋun bo kaŋi ŋozo pho ŋnsi nja? Nja digzan un bo jaki, bo kzoo na nja. 24 Boiinz uzuuz bonhoki ze kmbaau digzan un Hamor na Sikeŋ jaki. Hunkran boiinz uzuuz hatodun pleke.
Udara Simeoŋ na Levi
25 Zonu oajzan, kero bo ka siink oris maakrin, bowk Jako bopugz Symeoŋ na Levi bonhoki ze aliin boko na aniin boko aloŋ na Dina, bo jeknan kana ña, kej lo, atran baña ze kmbaau, fiŋ boiinz uzuuz. 26 Bo fiŋ Hamor na awk lo Sikeŋ na yeeje; Bo jek Dina ze mez boko solni. 27 Kero kfiŋ kminzkun toomi, bowk Jako bondaukun bi jek ŋun uzuuz ze kmbaau, zonkont aza boko juuno za. 28 Bo bup ŋmpalalu, ŋmpi, ŋiit, ŋhuru, na ŋun uzuuz, ŋnsaam ŋhoŋi ze kmbaau, uz ksaal uz. 29 Bo jek ŋun uzu ŋnsi ulujl, bohaz na boiinz jeko pjuuk. Bo punun ŋun uzuuz ŋhoŋi ze itoh. 30 Jako bi jak Symeoŋ na Levi: "Nde zuin onor oyeek. Nde zu baña osaaki, bokananeu na boperiseu, bo zaaf kjozi ze nji, zonkont njazi ka baña bonsumki. Bo pbi pkoulan uzuuz pgut na nji, bo ptoom na nji na bowkoliini. 31 Bo yep lo: "nta ahilun pzu aza ndo injaka ñaaz nhaap oleef?