Uzi hil Jako Betel
35
Antom ka Uzi jak Jako: "Nazoon, uya Betel, uzoo dolo ulemp pkak Uzi umbili ze wi kero ku ka zii amaku Esau. 2 Jako jak bowkoliin na baña uzuuz bo onhoki na lo: "Nde punan ŋnzi ŋani pmeo ze psoof nde. Nde jinzjinzna, nde zimlan yun nde itiimo, nde tiimo yun injiinzi. 3 Nja nazo, nja ya Betel. Dolo njo plemp pkak psi Uzi uminzbun unsembi nji zonu kjozi ni kero nji peŋi, woun na nji ze book uzuuz nji yaanzbi. 4 Hunkran bo huldun Jako ŋnzi ŋani pmeo ŋnsi bo hili kaa. Na ŋrejel uzuuz ŋnsi iwaz. Jako moi ŋolo zeu bun bukndwobi ukarvaju, ze kwaŋ Sikeŋ.5 Kero bo soli, klinki Uzi jet duzu imbau iminzyun ze kwaŋ boko. Hunkran banu pzi ze kfez bowk Jako. 6 Jako na baña uzuuz bonhoki na lo bo jau zun ze kndwozi Luuz, one Betel, zosaak Kanan. 7 Ka lemp pkak zolo du ktiim zun ze minzun Betel, zun ze minzun Uzi bilun ze lo kero a ka zii amaka. 8 Zun ze minzun Debora kezunzun, ñaaz anhili baap Rebeka; a kez, moyo zeu bun, pñog Betel, bun bunkabi ktiim Karvaju; bun uminzun bi dwo Aloŋ-Bakuti.
9 Kero Jako biin Padaŋ- Araŋ, Uzi pot ya ze lo zu lo mnjona. 10 Jak lo: "Ktiim nu dwo Jako. Ze krankanki uzi poto pdwo Jako, Israel oun pho ktiim nu. Hunkran aduun lo ktiim Israel. 11 Uzi pot jaa: "Njoun Uzi unkai philun. Wo pbuk an kiiñ nu kint ksum. Wo pho aliin osaak oloŋ, na ŋnsaak ŋnsumŋi. Boliin opun ze kiiñ nu. 12 Osaak nji huli Abroŋ na Jaaki, njo phulu a. Zotoomi nu, njo phul kiiñ nu a. 13 Uzi ñal lo antom deeŋo zun bo ladnozun. 14 Jako nazun knzoŋ ksi ilaak zun Uzi ladnozunk na lo; has un onhaloy osi pkeme duzu kolo, sa pot has mnsitidos. 15 Jako du ktiim zun ze minzun ze zesi Uzi ladnozunk na lo, Betel.
Benjamiŋ bukoo, Rakel kezi
16 Bo pun ze Betel bup ze book, Kero bo zo ñog pjau Efrata, Rakel buki, ma aka onor ze khuk. 17 Kero ka nor makri, ka nmbukbukun jak lo: "Ika kalo zonkont wo bi buk nmpoz. 18 Kero Rakel ñog pkez, zo oyefzar lo o zo toomi, adu ktiim awk Ben-Oni; ka aliin dulo Benjamiŋ. 19 Hunkran Rakel kezdun, moyo ze book usi Efrata, ze kndwozi Beleŋ. 20 Jako nazun plaak psi mnlelnin zun amoyunzunk Rakel Anjau hankri plaak pminzpun pho ojaŋr zun Rakel moinozi. 21 Israel ya urun zu nku lo zurun Migdal Eder.
22 Kero Jako, Israel zoo zosaak ominzun, Rubeŋ ya piinz na Bila, ñaaz aliin lo Israel, ka Israel bi me olo.
Bowk Jako
1 Kro 1:1-2
23 Bowk Leya bo o: Rubeŋ nnsek Jako, Simeoŋ, Levi, Juda, Isakar na Jebuloŋ. 24 Bowk Rakel o Jose na Benjamiŋ. 25 Bowk Bila nnjuuk Rakel, o Daŋ na Naftali, 26 Bowk Zilpa, nnjuuk Leya, bo o Gadi na Aser. Bondaaki o bowk Jako bombukoki ze Padaŋ-Araŋ.