Jaaki bukoo
21
NYEEK jaŋ mnjona ze Sara, ze mi ahilunk jaa, apdola. 2 Sara leempoo bukr Abroŋ nmpoz. Zo zafr lo zo kil Uzi jakunk lo. 3 Nmpoz Sara bukrunk Abroŋ azwa ktiim Jaaki, onjaŋzani Sara jii. 4 Kero Jaaki ka ŋnu 8, Abroŋ hat lo pleke ze mi Uzi jakmunk lo antom a do. 5 Abroŋ hil o ka ŋnlura100, kero awk lo Jaaki bukoo. 6 Sara jaa, Uzi zuin mnlinan nji jii. Ze baña uzuuz bonhoki pte un ominzi bo pji na nji. 7 Sa pot jaa: "Nonzi hilun pjak Abroŋ na Sara abi bootun nmpoz? Abuk nmpoz na pzafa.Agaar na Ismael ze mezu olaal
8 Jaaki ahili punun ze miila. Onu apununk lo ze miila, Abroŋ dol onah oyeek. 9 Sara iin awk ntihun lo Agar, nnsi Egitu, ai abuki na Abroŋ ka aka do Jaaki irah, 10 Ka jak Abroŋ punan nnjuuk andai na awk uzuuz, zonkont awk nnjuuk azopiij na Jaaki, nmbukin. 11 Olado ominzun ozi liil Abroŋ zonkont awk lo Ismael. 12 Ka Uzi jaklo Abroŋ: "Ika joozne zonkont nmpoz na nnjuuk nu. Siinkun un Sara kjaki wi zonkont kiiñ nu o pbiinz ze Jaaki. 13 Nji sa opzu Ismael awk nnjuuk, kiiña lo mag zonkont a o awku. 14 Abroŋ nazo ze khanan tor mnzup zo garaf, jek poŋ hul Agar. Hul lo nmpoz antom taaslor na boko uzuuz. Agar hatat na ojir akyaanzni zolaal osi Berseba.
15 Kero mnzup toom zogaraf, azoorun nmpoz zeu bun uyeek. 16 Ka soli ya zoo zun ze nloze mpozmi injaka olisr knsaaŋe, Zonkont ajaki: "Mbazi hilun pten nmpoz zokezr lo." 17 Ka Uzi te prim nmpoz. Ka Oiili Uzi du Agar duzu yep lo: "Agar, ka yelaa? Ika liinki zonkont Uzi te prim nmpoz zun a oonzi. 18 Nazoon wya jek nmpoz, bup naa ze kñene nu, zonkont njo pzu kiiña lo kmag. 19 Uzi haul Agar kil ka iin plik, ya lik mnzup zogaraf lo hul nmpoz ka daani. 20 Uzi hil o na nmpoz ka haali antom o zolaal, abi o ngoŋar na knsaaŋe. 21 Azo zolaal Paraŋ; Aniin bed lo ñaaz ninsi Ejitu.
Abimelek do pla na Abroŋ
22 Zokil ominzun Abimeleki na Fikol nyeek bogutun jak Abroŋ Uzi o na wi ze ŋun udoŋi uzuuz. 23 Nji jeu ubisro ni ze ktiim Uzi; uzo pdarin, ka uzo pdar nmbukin, ka uzo pdar bowai ni! Ze me nji domunk wi mnjona, usa dolin mnjona zosaak uzoonink. 24 Abroŋ jak lo nji bisroo.
25 Abroŋ ŋaj Abimeleki zonkont plik boyafna lo sehpi boyafna Abroŋ na ofooza. 26 Abimeleki jak lo mbazi mee, nonzi lemp un ominzi; uzi zuupin ña anleempi un ominzi njanka te olo hankri. 27 Abroŋ jek ŋmpalalu na ŋiit hul Abimeleki do phuuz na lo. 28 Abroŋ zu ŋmpalalu 7 ŋhaz apunuŋi ze knzoŋ ŋolo. 29 Abimeleki yep Abroŋ: "Ezi kaa, ka uditun ŋmpalalu 7 ŋi? 30 Abroŋ seembi: "Wo pseh ŋmpalalu 7 ze kñen ni zonkont nji hulu ŋa antom ŋho kmatr pjaaŋ ja nji jipun plik pndaapi. 31 Un ominzun kaun ka zun ze minzun dwo Berseba zonkont bo do phuuz za. 32 Kero bo toom pdo phuuz ze Berseba, Abimeleki nazo na fikol nyeek bogutun, bo kak osaak bofilisteu. 33 Abroŋ laal mnjaka ze Berseba, du ktiim NYEEK, "Uzi unzañi." 34 Abroŋ o zosaak bofilisteu nkil ŋnsumŋi.