Abroŋ ja Sara azi o Ahar
20
Abroŋ pun ze Manre ya zosaak osi Negebi, ya zoo ze psoof Kades na Sur. Ozipr ŋnlura ka ya zoo ze Gerar, 2 Abroŋ lado zonkont ahar lo Sara jaa, a oko aza. Abimeleki, nliin Gerar, hilan pjek Sara. 3 Uzi ya ze Abimeleki zurim zo zaafi jak lo: "Wo pkez zonkont ñaaz ujekunk aka ahin amari lo. 4 Abimeleki azi hil o piinz na yaa; hunkran ayeprodun: "NYEEK wo ptoom na orasa onjaali? 5 Ka ñiinz azi jakin ñaaz oko aza? Ñaaz sa pot jakin ñiinz oko amaka? Nji lemp un ominzi na ujuuns unjinzwi na iñen injiinzhi. 6 Uzi jak lo zo zaafi: "Nji mee udol un ondai na ujuuns unjinzwi. Nji urinani njanun phutnu udolin un ontuntoi, onkanu nji neenu piinz na lo. 7 Ze krankanki botnan ñaaz ze kñen ahina, zonkont a oi nhurun olado ni. Apbuur na nji zonkont nu antom uhil, zwam pbotun lo, ukme zowadadi wo pkez, na ŋun ukaŋi uzuuz.8 Abimeleki nazo ze khanan du boyeek lo uzuuz zuup boko olado osi ateunk uzuuz . Boiinz bominzkun duko na kliinki. 9 Abimeleki du Abroŋ yep lo: "Yee udolink ndo jeink? Oyee nji juun zojir nu, ka ubina pjwa phyeek Zojir ni na bopugi ni? Udol un ontuntoi. 10 Ka Abimeleki pot yep Abroŋ: "Ezi ka ku dolin un ondai? 11 Abroŋ jak lo: "Nji, nji ja ze khwaz ni, zowadadi baña bonhoki zunzi bozi kalo Uzi. Bo pfiŋi zonkont nharin. 12 Zowadadi a sa pot oko nzain uz. Nliini bukun lo, ka ndozi zok aniin ndo. 13 Kero Uzi jakin mpun ze mez nliini antom nhya zun ze loŋo, nji jak lo: "Hunkran woun psoondi ja ufundarin: "Kana zun nja jaunzi ukja nji oko a maku. 14 Abimeleki jek ŋmpalalu na ŋiit, na botihun boiinz na bohaz, hul Abroŋ; kakun lo Sara, 15 Ka Abimeleki Jak lo: "Osaak ni oli zurunu, zun ujeuzi pzona ukzoo zolo. 16 Ka jak Sara: "Tenun, njo phul amaku onsaam praata1000 osi prat. Ondai oko pluk un ondoli wi. Boko uzuuz bo pme pja uzi ka pjwa. 17 Abroŋ buur na Uzi. Uzi juund Abimeleki na ahar, na bojuuk lo bohaz, antom bohilun pbuk bopoz. 18 Zonkont NYEEK hil neen bohaz uzuuz ze mez Abimeleki khuk, zonkont Sara ahar Abroŋ.