Uzi huz na Abroŋ
15
Kero ŋun ŋminzŋi zip uzuuz , NYEEK lado na Abroŋ zozaafi antom jaklo: "Abroŋ ika liinki, njoun owel nu, njo pho uluk nu uyeek. 2 Abroŋ seemblo: "NYEEK-Uzi , ye woun phulin? Nji khyaanzink mbazi ka nmpoz, ña ai piij ŋun nji kaŋi a o Eliezer ninsi Damasku. 3 Abroŋ pot jaa: "uzi hulin ña ai piijin. Ninjuuk aloŋ bukoo ze mez ni aunpiijin. 4 NYEEK lado na Abroŋ jaklo: "Ñiinz andai azopiiju, nmpoz ai pun zoleef nu aunpiiju. 5 Uzi yana ya zuri, jaklo, tenun duzu men wo philun pfin ŋhuzu, ukak jaklo: "Hunkran kiiñ nu oun pho. 6 Abroŋ haz ze NYEEK, phaz lo zu Uzi ka uiin lo injaka ña anjaali.7 NYEEK pot jaka: "Nji, njoun NYEEK anpuni wi ze Ur zosaak osi bokaldeu antom phulu osaaki uiij. 8 Abroŋ yeproo: "NYEEK-Uzi njo pdo pjan ampme njoun piij olo? 9 Uzi jaka: "Jekun owai ohaz onkai ŋnlur 3, opi ohaz osi ŋnlur 3, ompalalu oiinz osi ŋnlur 3, owale osi pgof na owale osi mez. 10 Abroŋ ya na ŋnsaam ŋminzŋi uzuuz ya hul wolo, ka tau ŋolo ze psoof, oloŋ oloŋ antom liŋlan ŋolo, azi tau nkas. 11 Nkas ŋyeek yeto duzu iliks, Ka Abroŋ duk ze dook ŋolo.
NYEEK do phuuz na Abroŋ
12 Kero onu ka you Abroŋ zip na uŋoi undilwi ka onu bi o urim umagbi ba liinkni. 13 NYEEK jaka Abroŋ: "Uhilun pme pja kiiñ nu ko phya pho nya zosaak ompazi, osaak onhani pho osi boko, bo pho pjuuk, bo pnornorun baka na mnjona ŋnlur 400. 14 Nji uz njo pdol olado ze ŋnrasa ŋnzuŋi boko ze pjuuk. Antom bo pun na priza pyeek. 15 Ka wi wo pkez wo phya ze bo liin nu na phyooŋ, wo pmoyo na ŋnlur ŋnsumŋi, moyo na pzaf phyeek. 16 Kiiñ nu kwakna o pkakno zi, zonkont pjwa bomoreu, kjaawi polo pozo sumi.
17 Kero onu yowi, zun hil o diimzi, oiino onfurnu osi odu na ŋnsaaru ŋnsi uroo ŋnhili zipi ze psoof ifadar oyemz ominzun. 18 Zonu ominzun NYEEK do phuuz na Abroŋ jak lo: "Njo phul kiiñ nu osaak ondai, ptep ze krik ksi Ejitu ampjau ze krik kyeek ksi Efrati. 19 Osaak osi bokeneu, bokenezeu, bokadmoneu, 20 nyeteu, boperiseu, borefaiŋ, 21 Bomoreu bokananeu, bojirgaseu na bojebuseu.