Ogut boliin 4 na boliin 5
14
Zokil osi Anrafel, nliin ninsi Sinar, Aryok, nliin ninsi Elasar, Kederlaomer nliin ninsi Elaŋ, na Tidal nliin ninsi Goin 2 Bo ya gut na Bera nliin ninsi Sodoma, na Birsa, nliin ninsi Gomora, Sinab nliin ninsi Adma, Semeber nliin Zeboiŋ, na nliin ninsi Bela Anhoi ze zoar . 3 Boliin 5 bominzkun bo hil zoñnor zunjir usi Sidin ze Kndwozi krik khay. 4 Bo hil o ze pjuuk ŋnlur 12 zeu kñen Kederlaomer, zolur 13 ka bo bi huglar lo. 5 Ze ŋnlur 14, Kederlaomer na boliin bo hili o na lo bo ya gutni, antom ka kpe duzu borefaiŋ ze Asteroti-Karnaiŋ na Bojujiŋ ze Han, boemiŋ ze Save-Kiriatain. 6 Ka boereu dookun boko, ptep ze nkuŋ Seir anjau ze Elparaŋ ze ozi ze kwaŋ olaal. 7 Kero ka bo ka kfez, bo ya ze En-Mispat onhoi Kades, bo ka kpe ze ŋnsaak uzuuz ŋnsi bomalekita na boamoreu bo hili o ze Azaron-Tamar. 8 kero nliin Sodoma, nliin Gomora, ninsi Adma, ninsi Zeboiŋ na nliin Bela onhoi Zoar, bo bamni ogut zunjir usi Sidiŋ. 9 Bogut na Kederlaomer, nliin ninsi Elaŋ, ninsi Tidal, nliin ninsi Goim Anrafel, nliin ninsi Sinar na Aryok nliin ninsi Elasar boliin 4 bogut na boliin kñene. 10 Unjir usi Sidiŋ ika sum mnlik mnsi alkatron. Kero boliin Sodoma na Gomora zii bo jet ze mnlik minzmun. Baña boko bondukloki zii ya ze nkuŋ. 11 Boliin 4 ukun jek priza uzuuz psi Sodoma na Gomora na ŋun ŋnde boko uzuuz soni.Lo bupo pjuuk
12 Lo ayumi Abroŋ, ai o ze Sodoma. Hunkran bo soldun na lo na priza uzuuz psi akapi. 13 Ñiinz aloŋ amburi abi zuup Abroŋ nyebreu anhili o ze kwaŋ mun mkndwomi mnkarwaju zosaak osi Manre, ñiinz aloŋ akndwoi nhamoreu, ñiinz aminzi na pzaro lo bondwoki Eskol na Aner bo hil o boiindu Abroŋ. 14 Abroŋ hil te ja ayumi lo hil o ze pjuuk, ka koulan bojuuk lo bonhoki boiinz 318 bombukoki ze mez lo, bosi ajukjukni ogut. Bo ya ze kfez boliin 4 ukun ankint jau ze Daŋ. 15 Zolo Abroŋ hai baña lo ze inzoŋ, bo gut na baka zurim, antom ka kpe duzu boko, dook boko an kint jau ze Oba, ondukoi zojir duzu Damasku. 16 Apot bi na priza uzuuz ; bi na Lo ayumi lo na priza lo na bohaz uzuuz na baña bondukloki. 17 Kero Abroŋ biin ogut osi a kay kpe duzu Kederlaomer, na boliin bonkoulorkunk na lo, nliin ninsi Sodoma pun phya pjik na lo zunjir Save, one unjir usi nliin.
Melkisedeki zu mnjona duzu Abroŋ
18 Melkisedeki, nliin ninsi Salen, bina opoŋ na pkeme. Alo a o nmpenen Uzi unhwobi duzu ŋun uzuuz . 19 Azu mnjona duzu Abroŋ jak lo: "mnjona zu Uzi unhwobi duzu, unkabi philun duzu na ozee;
20 mnjona ze Uzi unhwobi duzu, unzubi bobir nu ze kñen nu antom bu zaho. Ze ŋun uzuuz Abroŋ hula ojir 10!
21 Nliin Sodoma jak Abroŋ: ''Hulan baña; uhilun pduko na priza, 22 Ka Abroŋ jak nliin Sodoma: ''Nji deeŋ kñen ni ze NYEEK, Uzi unhwobi duzu, unkabi duzu na ozee; 23 Nji bisro mbazo pseh un oloŋ ze kñen nu, ptep ze pmuuz ampjau ze ptal psi isapat nu, mbazo pjek un oloŋ zosinu uki kbi kja uzuun zun Abroŋ ka niiri. 24 Mbazi jeu un oloŋ ze ŋun nu, ze mbaza ŋun boiinz ni deeŋi na ŋun ŋnsi boiinz bonhyaki na nji. Bondwoki Aner, Eskol na Manre, Baña bominzki bo hilun pseh ŋun boko.