Abroŋ taaslor na Lo
13
Abroŋ pun ze Ejitu, ya zeu Negebi, alo ahar na ŋun uzuuz ŋnsi a hili kaa. Lo ya na yaa uz. 2 Abroŋ hil nir maakrin ka ŋnsaam ŋnsi mez, praata na mhuru. 3 A pun ze Negebi zojir zeu osaak, ayaanz ze ŋnjira ŋnjira ankint jau ze Betel, azip zun ndaazun ze psoof Betel na Ai, zun ahil hank oku lo zotepi. 4 Abroŋ lemp pkak ploŋo antom du ktiim NYEEK zolo. 5 Lo anhili ya na Abroŋ a sa ka ŋmpalalu uz, ŋiit na nku. 6 Osaak ozi hilun phul baka ŋun ŋnde boko uzuuz , zonkont ŋnsaam boko sum anka bozi hilun pho zun ze loŋ. 7 O hil ka khunso ze psoof boyafna bosi ŋnsaam Abroŋ na boyafna bosi ŋnsaam Lo. Bokananeu na boperiseu bo hil o zosaak zokil ominzun.8 Abroŋ jak Lo: "Ozi hilun pka khunso ze psoof nja, na psoof boyafna nja, zonkont nja o ze pzaro nja. 9 Ka ŋnsaak uzuuz ŋozi o zurun nu? Nji ñaunu nja ayro, zu ya ze kñen kmay, nji njo phya ze kñen krey, usa ya ze kñen krei, nji kya kñen kmai. 10 Lo kat mnkil iin ksaal knliŋorki ksi Jordoŋ ankint jau ze kmbaau Zoar, aiinka ka ktulno na mnjona injaka uzaanz NYEEK, o injaka osaak Ejitu kero NYEEK azi hil o sok Sodoma na Gomora. 11 Lo datr ween lo ksaal knliŋlorkunk uzuuz ksi Jordoŋ, ka sol ya zojir pmair onu, antom ka bo taaslori. 12 Abroŋ zoo zosaak osi Kanaan; Lo zoo ze klil ksi isaal inliŋnorhi, ka ya ze hank nku lo ankint jau ze kmbaau Sodoma. 13 Boiinz bosi Sodoma bo hil huz yeene bo hil oko bo do pjwa pmagpi zurun NYEEK.
Uzi jak Abroŋ bo phula ozee Kanaan
14 Kero Lo taaslor na Abroŋ, NYEEK jak Abroŋ: "Deeŋu kil uten ze ptep zun wonzi zosaak Negebi, ze ŋjir uzuuz duzu osaak, na zeu osaak, na pmair onu na phyour olo. 15 Osaak osi uktenink uzuuz , njo phulu a, wi na kiiñ nu onzañi. 16 Njo pzu kiiñ nu kyah injaka mbool, ze ña hilun pfin mbool a sa khilun fin kiiñ nu. 17 Nazon usol wya ze ŋjir uzuuz ŋnsi osaak, zonkont njo phulu osaak ominzun. 18 Abroŋ gar oku lo ya dukoo ze Manre ze pñog bun bikndwobi ukarwaju, ze kmbaau ksi Ebroŋ. Alemp pkak zolo psi NYEEK.