Uzi du Abroŋ antom hul lo prim
12
NYEEK jak Abroŋ: "Punun zosaak nu, ze psoof bowkoliin nu, ze mez aliinu wya zosaak osi njoi pjaaŋu. 2 Njo pzuu wo nyeek zosaak, njo pzu mnjona ze wi! Njo pzu kiiñ nu kmag. Wo pho ninsi mnjona. 3 Njo pzu mnjona ze ña anzui wi mnjona. Njo pzu khuzin ze ña anladari wi khuzin. Ŋnrasa uzuuz zosaak ŋho pzwo mnjona zonkont nu.4 Hunkran Abroŋ pundun ze mi NYEEK jak mi lo. Lo sol na yaa. Abroŋ hil ka ŋnlur 75 kero ka pun ze Araŋ. 5 Abroŋ ya na Sarai na ayumi lo Lo, na priza uzuuz psi bo hili zoklani, na bojuuk bosi bo berki ze Araŋ. Bo pun sol phya osaak osi Kanan, jau zolo. 6 Abroŋ zip zosaak anjau ze Sikeŋ zeu bun ukndwobi ukarwaju zesi More. Ze nkil ŋminzŋi bokananeu hil o zosaak ominzi. 7 NYEEK ya ze Abroŋ antom jak lo. Njo phul kiiñ nu osaaki. Abroŋ lemp pkak zolo psi NYEEK anhili bi lado na lo. 8 Ze zolo, a ya zurun zonkuŋ zojir osi Betel ze pmair onu, a hank oku lo ze Betel hil o zojir phyour onu. Ai o zojir pmair onu; a sa lemp pkak za uz psi NYEEK, antom ka du ktiim NYEEK. 9 Ka Abroŋ diimpo ze book duk ze ya mpozmi-mpozmi anjau ze Negebi zojir zeu osaak.
Abroŋ ya Ejitu
10 Zosaak ominzun osi Kanaan o ika ka ono. Abroŋ ya Ejitu phya phum duko dolo zonkont on pee. 11 Kero ka duk o ñog ze Ejitu a jak ahar lo Sarai: "Nji me ja wo ñaaz anuroi. 12 Zoyar boiinz bosi Ejitu anhiinu bo pja ñai oko ahar. Bo pfiŋi antom phutnu na phila. 13 Duka ja woko nzain, antom ŋun hilun phya na mnjona zojir ni zonkont nu antom bo hilun phutni na phila. 14 Kero Abroŋ neej ze Ejitu, boiinz bosi dolo iin ñaaz ze mi anuromunk maakrin. 15 Bohuli bosi Faro iina, zah lo zurun lo; ka jek ñaaz ya na lo ze mez Faro. 16 Faro do Abroŋ na mnjona zonkont lo. Hunkr akadun ŋnsaam, ŋmpalalu, ŋiit, ŋhuru ŋiinz na ŋhaz, ŋnsuntukluŋ na bojuuk lo boiinz na bohaz.
17 Ka NYEEK zu pmaak pyeek duzu Faro na baña bosi mez lo zonkont Sarai, ahar Abroŋ. 18 Hunkran Faro dun Abroŋ antom yep lo: "Oye udolink nji? Ezi ka uzi zuupin ja a oko aharu? 19 Zonkontee kaun ku ja a o azau? Onkaanu Ka nji kint jek lo injaka nharin. Ze krankanki, a haru aley, jek na usona! 20 Faro zu boiinz ka bo punun Abroŋ na ahar ze Ejitu na ŋun uzuuz akaŋi.