Mnzup yetoo
8
Uzi lel Noe na ngoŋar uzuuz ŋnsi pgof na ŋnsaam uzuuz ŋnsi mez ŋhoŋi na lo zopur. Uzu oyook ka ozip duzu osaak. 2 Ilik isi iir indiilhi idisi na iir isi duzu, olur osi duzu hutun plu. 3 Mnzup bi yeto mntiik-mntiik ankint toom phyeto zo toomr ŋnu 150. 4 Ze ŋnu 10, zonu ojaandun ze pli pjaandun opur zo duzu nkuŋ ŋikndwoŋi Ararat. 5 Mnzup zañ ze phyeto ankint jau ze pli pndiseñene, zonu oseke ka nkuŋ tep pfeet.Noe punun owaansa na owale
6 Kero ko zip ŋnu 40, Noe haul ojandel osi opur alempi. 7 A hutun owaansa, oknhyai ot ze kak. Anka mnzup kint kai zosaak. 8 Ka Noe pot hutun owale, antom o ya ten men mnzup kai zosaak. 9 Owale ozi ka zun oi pzona zonkont mnzup hil ler osaak. Ka Noe solun kñene bup olo kakun zopur. 10 Ayooŋ ŋnu 7 kaŋzipi, ka pot hil owale zuri. 11 Kero owale kak ze lo ze montna, odum ktoh khalu ze ktum olo ksi olivera ksi okit ki. Ka Noe me mnzup yeto zosaak. 12 Ka pot yoŋ ŋnu 7 ka ŋnzipi ka pot hil owale, zwyaas bi kowale ozi pot kak zopur, o sol oloŋ.
Noe pun zopur na baña lo
13 Zonu osek osi pli pseke ze ŋnlur 601 ŋnsi Noe kaŋi, mnzup hil o kai. Noe punun unkaŋ usi opur, aten iin ozee kai. 14 Ze ŋnu 20 ze pli pugzan ozee bi toom pkai. 15 Ka Uzi jak Noe: 16 "Punun zopur, wi na aharu, bowku, na bohar bowku. 17 Punan ŋnsaam uzuuz ŋnsi mez na ngoŋar uzuuz ŋnsi pgof na ŋikmpuloŋi uzuuz , na nkas, ŋhoŋi na wi zuri, antom ŋhilun pbuk maakrin ŋnsum zosaak." 18 Noe pun na bowk, ahar na bohar bowk. 19 ngoŋar uzuuz, na ŋikmpuloŋi zozee, na nkas uzuuz, na ŋikhyaanzŋi zozee uzuuz, ze mi ŋhoŋi ze phyai ŋolo.
Noe lemp pkak.
20 Noe lemp pkak ploŋ psi NYEEK, Ajek ŋnsaam ŋnjiinzŋi na nkas ŋnjiinzŋi antom hul wojun unturowi ze pkak. 21 NYEEK siink kñeeli knliilki, a ja zujuuns lo: "Mbazi pot opzu khuzin zosaak zonkont ñiinz, ŋanun ujuuns lo ktuunto ze khuzin, ptep ze poz lo; Mbazi pot o pfiŋ ŋun uzuuz ŋhilŋi, ze mi njilunk leempi. 22 Zosaak amptoom, opka okil osi plaal, na okil osi kit, okil osi oyook na okil osi ojonz, urim na pnak ŋozo phutun."