Olur oyeek
7
Ka NYEEK jak Noe: "Neejun zopuur, wi na bowkoliin nu zonkont nji iin nu ka wo ña anjaali ze psoof baña bondaaki. 2 Yan na ngoŋar 7 ŋiinz na ngoŋar 7 ŋhaz ŋnjiinzŋi ŋikndoonŋi wojun ŋikndeoŋi; ka ngoŋar ŋnzopŋi uyan na 2, oiinz na ohaz. 3 Usa jek uz nkas 7 ŋiinz na nkas 7 ŋhaz, antom ubaap phyla ŋolo zosaak uzuuz. 4 Zozipr ŋnu 7, njo phutun olura zosaak ŋnu 40, pnak na urim, njo ptoom na ŋun ŋhilŋi uzuuz ŋnsi nji lempŋi zosaak." 5 Noe lemp ŋun uzuuz ŋnsi NYEEK zu ŋi lo alemp.6 Noe hil ka ŋnlur 600, kero mnzup mnsi olur oyeek nimlan osaak. 7 Noe zopuur, alo na bowk ahar na bohar bowk antom philun bur mnzup mnimlamunk osaak. 8 Ŋnsaam nej uz zopur na Noe, ngoŋar, ŋmpugz ŋmpugz, oiinz na ohaz, ngoŋar ŋnjiinzŋi ŋhai ka doon wojun, na ŋani pdoon wojun, nkas na ngoŋar ŋi kmpuloŋi zozee. 9 Ŋgoŋar zopur na Noe ŋmpugz oiinz na ohaz, ze mi Uzi zumunk lo alemp. 10 Ozip ŋnu 7 ka olur oyeek jet duzu osaak.
11 Ze ŋnlur 600 ŋnsi phila psi Noe, ze ŋnu 17 ze pli pugzan, zonu ominzun okupl ilik uzuuz isi iir indiilhi, ka duzu hauloo. 12 Olura lu zosaak ŋnu 40 na ŋrim 40. 13 Zonu ominzun Noe zopur na bowk lo Seŋ, Kaŋ na Jafe, na ahar, na bohar bowk 3. 14 Boko na ngoŋar uzuuz ŋnsi pgof ze ptuut ŋolo, ŋnsaam uzuuz ŋnsi mez, na ngoŋar uzuuz ŋikmpuloŋi zozee, na nkas uzuuz ze mi ŋndiitŋi na nkus uzuuz nkaŋi iwaaklu. 15 Ŋgoŋar uzuuz nkaŋi oyefzar osi phila, ŋmpugz-ŋmpugz ŋya na Noe zopur. 16 Ŋiinz na ŋhaz, ngoŋar uzuuz nkaŋi phila, injaka ze mi Uzi hilmi Noe. NYEEK dis plumun zuri.
Uris umagbi usi Olura
17 Olur oyeek zañ ze plu ŋnu 40 mnzup sum ankint uyun opur. 18 Mnzup zañ psum duzu osaak ka opur hil ze wui duzu mnzup. 19 Mnzup zañ ze psum ankint ler nkuŋ ŋmpeŋi phal zosaak uzuuz. 20 Mnsum ankint jaau ŋmetru 7 Duzu nkuŋ. 21 Ngoŋar uzuuz ŋnhilŋi o zosaak nkezi, injaka nkas na ŋnsaam ŋnsi mez, na ngoŋar ŋnsi pgof, na ŋikmpuloŋi uzuuz zozee, na baña bojina uzuuz . 22 Ŋun uzuuz ŋnhilŋi ŋnhili o zun ze nkaizi ŋnhili ka oyefzar osi phila ze iil ŋolo nkezi. 23 Ŋun uzuuz ŋnhilŋi ŋnhili o zosaak ŋntoom uzuuz, baña bojina, ngoŋar, na ŋikmpuloŋi, na nkas ŋnsi duzu, ŋntoom uzuuz; Noe dukoun nkona lo, na baña bonhoki na lo zopur. 24 Mnzup hil sum zosaak ŋnu 150.