Khuzin ksi ñiinz
6
Kero baña bojina tep psum zosaak, bo buk bopoz bompili. 2 Bowk Uzi iin ja bowk boiinz bompili bo nuroo. Bo nimro na bosi bojeuki. 3 NYEEK jaa: "Oyeke ni ozo pduko pzañ ze ña njina oloŋ, zonkont oleef lo ka pkez. Zonkont un ominzi a pka ze ŋnlur 120." 4 Zokil ominzun, oka baña bojina bonjafunki zosaak; Kero bowk Uzi mado na bowk boiinz bompili bo buk bopoz, Bowk boko bominzkun bo hil o bonjafunki bo hili o zokil ominzun ondiima, boiinz bosi itiim.5 NYEEK iin khuzin ksi ña njina hil ze bundar zosaak. Mi bo kzaafmi zijuuns boko uzuuz mhoko khuzin nkona ko lo. 6 Melan pat NYEEK ze mi alempi ña njina zosaak, ujuuns lo hil duko na kjoozi. 7 Hunkran NYEEK jakun: "Njo ptoom na ña njina nji leempi zosaak, Ptep ze ñiinz, na ŋnsaam ŋnsi mez na ngoŋar uzuuz, na ŋikmpuloŋi, na nkas ŋi kiizŋi duzu, zonkont melan patin ze mi nji lempunk ŋolo." 8 Ka Noe iin kñago zurun NYEEK.
9 Uni oko ontuntlaŋ osi Noe. Noe hil o ñiinz anjaali baiiri ze psoof baña zokil lo. A hil a khyaanz na Uzi. 10 Noe buk bopoz boiinz 3. Bondwoki: Seŋ, Kaŋ na Jafe.
Ptoom osaak na mnzup
11 Osaak ika ka kzopi ze pkil Uzi. Baña hil ze do kpe ze bosinz boko. 12 Uzi iin mi osaak hil o ze khuzin, zonkont baña uzuuz zosaak bo ze yaanz ze book khuzin. 13 Uzi jak Noe: "Njo Ptoom na baña uzuuz, zonkont osaak sumunk kpe na khuzin. Njo ptoom na baka uzuuz zosaak." 14 Lempun opur osi mndera mnsi bun ukndwobi sipresti. Wo plempa uzu iku impaflorhi ze olo, antom ukir olo na alkatroŋ, mezu na uri. 15 Wo plempa pjeink: "Ŋmentru 133 ŋnsi okaŋr, ŋmetru 22 ŋnsi oanir na ŋmetru 13 ŋnsi ohalr. 16 Wo pler unkaŋ opur, wo phutun wal pñog psoof ometru zunkaŋ, na ojir opur. Wo pzu plumun zojir kteñ, wo plempa oka iku impaflorhi, kpugzan na khajzan. 17 Njo phutun olur omagi onhani psar ptiimp duzu osaak, ptoom na ŋun uzuuz nkaŋi oyefzar zosaak. Ŋun uzuuz ŋhoŋi zosaak ŋho pkez. 18 Ka njo pdo phuuz na wi. Wo pneej zopur wi na bowku na aharu, na bohar bowku. 19 Wo pneejun ngoŋar ŋmpugz ŋmpugz, ze mi ŋhomi ze phyai ŋolo, oiinz na ohaz ŋhilŋi ubaap ŋolo na phila na wi. 20 Nkas ŋmpugz ŋmpugz, ze ptuut ŋolo, na ŋnsaam ŋnsi mez, na ŋikmpuloŋi uzuuz, ŋho pbi ze wi antom uhilun pbaap ŋolo na phila. 21 Wo pjek ŋun ŋi kndeoŋi uzuuz ubaap ŋolo, ŋho pho kre nu na ŋolo." 22 Hunkran Noe dodun uzuuz ze mi Uzi jakmunk lo.