Phuz Uzi na Noe
9
Uzi zu mnjona duzu Noe na bowk antom jak boko: "Nde bukun maakrin ande kint nde sum zosaak. 2 Ŋnsaam uzuuz ŋnsi mez, ngoŋar uzuuz ŋnsi pgof, nkas ŋhoŋi duzu, ngoŋar uzuuz ŋikmpuloŋi zozee na ŋrik uzuuz ze krik, ŋho pkalo nde maakrin. Ŋnzuoo ziñen nde. 3 Ngoŋar uzuuz ŋhilŋi ŋikmpuloŋi ŋopho ŋun nde ŋnde, ze mi nji hulmunk nde mmun nfulamul, ze krankanki nji hul nde ŋun uzuuz ." 4 "Ka nde ika de oyemz onkay pñaak, zonkont phila on ze pñaak. 5 Pñaak psi phila nde boiinz ze ña has polo njo pdola olado. Njo pdo ngoŋar ŋnfiŋi ñiinz olado. Njo pdo anfiŋi a siinz olado. 6 Ze ña has pñaak ña, ña aloŋ sa ka phas pñaak lo, zonkont Uzi leemp ña njina a naam na wolo. 7 Ka nde, nde bukun bopoz bonsumki, antom nde hilun psum osaak."8 Uzi jak Noe na bowk uz: 9 Njo pdo phuuz nin na nde,na iiñ nde, yoi bi ze kfez nde, 10 na ŋnsaam mez uzuuz , ngoŋar uzuuz ŋhoŋi na nde, nkas na ngoŋar uzuuz ŋmpuŋi zopur injaka ngoŋar uzuuz zosaak. 11 Njo pdo phuuz nin na nde, mbazi poto ptoom na ŋun uzuuz ŋhilŋi na mnzup mnsi olur oyeek, ozi pot o pka olur oyeek onhilni ptoom na osaak. 12 Uzi pot jaa: "Ondai o mnjaŋzin mnsi phuuz psi nji zupi ze psoof ni na nde, na ŋun uzuuz ŋhilŋi ŋhoŋi na nde na baña uzuuz boipbi ze kfez nde. 13 Njo pzu owm ni ze inzun isi olur injaka mnjaŋzin mnsi phuuz ni ze psoofni na osaak. 14 Zoyaarin anbina inzun duzu osaak owm olura iin oo ze inzun iminzyun, 15 Nji sa klel phuuz nin na nde, na ngoŋar uzuuz . ozi poto pka olur omagi antom psok baña, ngoŋar, ŋnsaam na mmun uzuuz . 16 Zoyar owm olura bi ze inzun, njo piin na, njo plel phuuz nji huzpi onzañi ze psoof Uzi na baña uzuuz, ŋnsaam ŋnsi mez, ngoŋar uzuuz, na mmun uzuuz mhomi zosaak. 17 Uzi jak Noe: "Owm ondai o mnjaŋzin mnsi phuuz nji huzpi na ŋun uzuuz nkaŋi phila zosaak.’’
18 Bowk Noe bompunki zopur bo hil o seŋ, Kaŋ na Jafe Kaŋ hil o aliin Kanaan. 19 Bowk Noe 3 ukun, iiñ boko bi sum osaak.
Noe na bowk
20 Noe hil o nnjar, antom laal mmun mikmbukmi mhuba zuzaanz. 21 Adaan pkem psi mhuba ankint kati piinz urimu zoku lo. 22 Kaŋ anhoi aliin Kanaan, iin mi aliin omi urimu ka sol ya zuup bomaka bopugz zuri, 23 Hunkran seŋ na Jafe jek dun knoŋt zu ko lo zisak boko, ze yaanz ofez, antom ler oleef aliin boko, mnkil boko huglo ze mi banipiin aliin boko urimu. 24 Kero okata toom ze Noe, ka me un awk lo ampozi lempi lo. 25 A jaa: "Khuzin o pho ze Kanaan! A pe pho nnjuuk ninsi bojuuk ze zeu boza."
26 A pot sa ja uz: Mnjona mnsi NYEEK, Uzi usi Seŋ antom uzaho! Kanaan o nnjuuk Seŋ.
27 Antom Uzi bundar ksaal ksi Jafe. A pho ze nku ŋnsi Seŋ: "Antom Kanaan o nnjuuk lo.