पिलातुसा चे सामणे ईशु
(मर 15:1, लूका 231-2, यू 18:28-32)
27
1 जिसे बेह्ले ङियो हुला तां घणे मुख्ययाजक ते लौका चे ब़ङका यहूदी नेता ने ईशु नु मारती नाखणे ची सलाह करली । 2 वाह्णे ईशु नु ब़ाहाले ते गेहली गेले पिलातुस अधिकारीया चे हाथा मां सोंपती ङिले ।यहुदा ने आत्महत्या करली
(प्रे. 1.18,19)
3 जिसे बेह्ले ओह्नु पकड़वावणे आले यहुदा इस्करियोती ने ङेखले कि, ईशु नु दोषी ठहराले गेले तां ओ पछताला, ते वे तीस चान्दी चे सिक्के मुख्ययाजका नु ते बङका नु पुठे ङिती कने 4 केहले , “मैं बेकसुर आले नु मरावणे कले पकड़वाती पाप करला !
वाह्णे ओह्नु केहले, “अम्हानु का ? तु ही जाण ।”
5 बल्ति यहुदा वां सिक्का नु मन्दरा मां भुकाती चाहला गेला, ते जतीकर आपणे आप नु फांसी लाली ।
6 मुख्ययाजका ने वां सिक्का नु चती कने केहले, “यानु मन्दरा मां मेहल्णे ठीक कोह्नी, कांकि हा बन्दे चे लुहींया ची कीमत छै ।” 7 तां वाह्णे आपस मां सलाह करती कने वा सिक्का लारे प्रदेशिया नु पूरने कले कुम्भारा चा खेत मोल गेहती गेला । 8 ऐ वजह कनु ओ खेत आज़ तक ‘लुहींया चा खेत किहवावे’ । 9 बल्ति जको वचन यिर्मयाह भविष्यवक्ता चे जरिये केहला गेलता ओ पूरा हुला, “वाह्णे वे तीस चान्दी चे सिक्के चले, हा वा रकम छै जको इस्राएल चे बन्दा ने ओची किमती चे वास्ते तय करली हुती । 10 ते जिंवे प्रभु ने मनु आज्ञा ङिली हुती विचे अनुसार, वा सिक्का लारे वाह्णे कुम्भारा चा खेंत मोल गेहती गेला ।”
पिलातुस चे सवाल
11 जिसे बेह्ले ईशु रोम चे राज्यपाल चे सामणे पेश करला गेला तां राज्यपाल ने ईशु कनु पुछले, “का तु यहुदिया चा राजा छी ?”
ईशु ने ओह्नु केहले, “हवे तु आप ही किही पला ।” 12 जिसे बेह्ले मुख्ययाजका ने ते बङके यहूदी नेता ओह्चे पर दोष लावी पलते, तां ओह्णे कुई जबाब ना ङिला ।
13 ऐचे पे पिलातुसा ने ओह्नु केहले, “का तु ना सुणी कि ये दुधे विरोध मां कितनिया गवाहिया ङिही पले ?”
14 पर ईशु ने पिलातुसा नु हेकी बाते चा वी जबाब कोह्नी ङिला, इठे तक कि पिलातुसा नु बङा अचम्भा हुला ।
मोत चे ङण्ड ची आज्ञा
15 पिलातुस राज्यपाल चा हा रिवाज हुता कि फसह चे तिव्हारा पर लौका कले कुई हेक कैदीया नु जानु वे चाहते छोड़ती ङिता । 16 ओ वख्ता पे ओठे बरअब्बा नावां चा हेक खतरनाक बदमाश कैदी हुता । 17 तां जिसे बेह्ले वे भेले हुले, तां पिलातुस ने वाकनु पुछले, “तम्ही कानु चाहवा कि मैं तम्चे कले छोड़ती ङियें ? बरअब्बा नु, या ते बल्ति ईशु नु जको मसीह किहवावे ?” 18 कांकि पिलातुस जाणता कि वाह्णे ईशु नु साड़ लारे पकड़वाल्ते । 19 जिसे बेह्ले पिलातुस न्यां ची गद्दी पर ब़ेहल्ता ला, ओची राङे ने किहवाती कने कुई बन्दे भेजले, “तु ओ धर्मीया चे मामले मां हाथ ना अड़ायो, कांकि मैं आज़ खाबा मां ओची वजह कनु ब़ोहत ङोख चले ।”
20 मुख्ययाजका ने ते बङका यहूदी नेता ने बन्दा नु भड़काले कि वे बरअब्बा नु छोड़ने वास्ते, ते ईशु नु मरवाती नाखणे ची मांग करी पलते । 21 ते राज्यपाल ने वाकनु पूछले, “यां ङूहु मुं कानु चाहवा कि मैं तम्चे कले छोड़ती ङिये ?”
वाह्णे केहले, “बरअब्बा नु ।”
22 पिलातुस ने वांह्चे कनु पुछले, “बल्ति ईशु नु, जको मसीह किहवावे ।” ऐचे का करे ?”
सारा ने ओह्नु केहले, “ओ क्रूसा पर चढाला जाओ !”
23 राज्यपाल ने केहले, “कां ? ओह्णे का बुर्रे करले ?”
पर वे होर वी जोरा जोरा चे किहुं लागले, “ओ क्रूसा पर चढ़ाला जाओ ।” 24 जिसे बेह्ले पिलातुस ने ङेखले कि कहीं बण ना सग़्ग़ी पर ओह्चे उलटा हुल्लड़ बधता जाये, तां ओह्णे पाणी चती भीड़ी चे साह्म्णे आपणे हाथ धोले ते केहले । मैं ऐ धर्मीया चे लुहींया कनु बेकसूर छै ,तम्ही ही जाणा ।
25 सारा लौका ने जबाब ङिला, “ऐचे लुहीं अम्चे पर ते अम्ची ऊलादी पर हो !”
26 यूं करती ओह्णे बरअब्बा नु वांह्चे कले छोड़ती ङिले, ते ईशु नु कोड़े मरवाती कने वानु सोंपती ङिले कि क्रूसा पर चढाला जाओ ।
सिपाहीया ने ईशु ची मजाक करली
27 बल्ति पिलातुस राज्यपाल चे सिपाहीया ने ईशु नु किले मां गेहती गेले सारी पलटण ओह्चे चारो तरफ करली, 28 ते ओची ओढणी उतारती ओह्नु चमकता राते रंगा चा चौगा घलाला, 29 ते काटां चा मुग़ट बणाती कने ओह्चे ठोङा पर मेहला, ते ओह्चे सज़्ज़े हाथा मां काने ङिले, ते ओह्चे साह्म्णे गोङे टेकती कने, ते ओचिया मखोला ऊङारु पड़ती गेले, ते केहले, “ओ यहुदिया चा राजा, नमस्कार !” 30 ते ओह्चे पर थूकले; ते ऊंही काने चती कने ईशु चे ठोङा पे मारु लागले । 31 जिसे बेह्ले वे ओह्चा मखोल करती चुकले, ते ओ चौगा ओह्चे कनु उतारती कने, बल्ति ओची ओढणी ओह्नु घलाली, ते क्रूसा पर चड़ाह्वणे कले गेहती टुरले ।
ईशु चे क्रूसा पर चड़ाले जाणे
32 नगर चे ब़ाहर जते बेह्ले वानु शमौन नावां चे कुरेनी नगरा चे बन्दे मिड़ले । वाह्णे ओह्नु बेफालतु मां पकळे कि ईशु चा क्रूसा चली चालो। 33 वे जग़्हा पर जको गुलगता यानिकि ‘खोपड़ी ची जग़्हा किहवावे, पुज़ती कने 34 वाह्णे कुई खारी चीज अंगुरा चे रसा मां मिलाती कने ओह्नु अंगुरा चा रस पीणे कले ङिला, पर ओह्णे चाखती कने पीणा ना चाहला ।
35 तब वाह्णे ओह्नु क्रूसा पर चड़ाह्ले, ते पर्चिया नाखती कर ओची ओढणी आपस मां बांटती गेहली, 36 ते ओठे ब़ेहसती कने ओह्चे पर पाहरा ङिऊं लागले । 37 ते ओह्चा इल्जाम तख्ती पर लिखती ओह्चे ठोङा चे ऊपरु लाला, “कि हा यहुदिया चा राजा ईशु छै” । 38 ओह बेह्ले ओह्चे लारे ङोन ङाकु *हेक खब़्ब़े ते हेक सज़्ज़े पासु, क्रूसा पर चड़ाह्ले गेले ।
39 आणे जाणे आले ठोङी हलाती हलाती ओची निन्दिया करी पलती, 40 ते ईं किही पलते, “ओ मन्दरा नु ढ़ावणे आला ते तीं ङिहा मां बणाव्णे आला, *आपणे आप नु तां बचा । अगर तु नरीकारा चा पूत छी, तां क्रूसा कनु तले उतरती आ ।”
41 यूं करती मुख्ययाजका ने, ते धर्मशास्त्रीया ने, ते बङका यहूदी नेता समेत मजाका करती किही पलते, 42 “ऐह्णे नेरा नु बचाले, ते आपणे आप ना बचा सग़ी । हा तां ‘इस्राएल चा राजा’ छै । हमा क्रूसा कनु तले उतरती आओ तां अम्ही ओह्चे पे विश्वास करु ।’ 43 ओह्णे नरीकारा पर भरोसा राखला; अगर ओ ऐनू चाहवे , तां हमा ऐनू छुड़ाती गिहो,* कांकि ऐह्णे केहलेते, ‘मैं नरीकारा चा पूत छै’ ।’ ” 44 यूं करती ङाकु वी जको ओह्चे लारे क्रूसा पर चड़ाह्ले गेलते, जुही ओची निन्दिया करी पलते ।
ईशु ची मौत
45 ङुफारा चे ब़ारहा बजे कनु लाती तींई बजे तक ओ सारे मुल्खा मां अन्धारे रेहले । 46 करीबन तींई बजे चे आस पास ईशु ने बङा साङ मारती कने केहले, “एली एली लमा शबकतनी ?” यानिकी “ओ माया नरीकार, ओ माया नरीकारा, तें मनु कां छोड़ती ङिले ?”*
47 जको ओठे भिलते ले, कई बन्दा ने ईं सुणती कर केहले, “हा तां एलिय्याह नु साङ मारे पला ।” 48 वांह्चे मुं हेक फोरन द्रोड़ला ब़ूड़ा चती खट्टाई मां ब़ोड़ला काने पर मेहल्ती कने ईशु नु चुसाला ।*
49 बल्ति नेरा बन्दा ने केहले,“रुकती जावा, ङेखु एलिय्याह ओह्नु बचाऊं आवे के ना ।”
50 ओह बेह्ले ईशु ने बल्ति हेक वारी बङा साङ मारती जिन्द छोड़ती ङिली ।
51 ते ङेखा, यरुशलेम नगर मां मन्दरा चा पड़दा* उपरू लाती तले तक फड़ीती ङोन टुकड़े हुला गेला । ते धरती हलती गेली ते चट्टाना तिड़कलिया गेलिया, 52 ते कब्रा खुलती गेलिया, ते मेरले आले पवित्र लौका चे ब़ोहत सारी मुड़दी जिती हुली, 53 ते ईशु चे जिते हुवणे चे बाद वे कब्रा मुं निकलती कने पवित्र शहर यरुशलेम मां गेली ते घणा नु ङिसली । 54 बल्ति सेना चे सुबेदार ते जको ओह्चे लारे ईशु चा पाहरा ङी पलते, भोयें अम्ब ते जको कोच्छ हुले ओह्नु ङेखती कने घणे ङरती गेले ते केहले, “सच्च मां हा नरीकारा चा पूत* हुता !”
55 ओठे ब़ोहत सारिया अस्त्रीया जको गलील कनु ईशु ची सेवा करतिया, ईशु चे भांसु - भांसु आलिया हुतिया,* दूरी कनु ईं ङे़खी पलतीया । 56 वांह्चे मां मरियम मगदलीनी, ते याकुब ते योसेस ची आई मरियम, ते जबदी चे पुता ची आई हुती ।
ईशु चे दफनाले जाणे
57 जिसेबेले आथड़ हुले तां यूसुफ नावां अरिमतिया चा हेक साहुकार बन्दे, जको आप ही ईशु चा चेला हुला, आला । 58 ओ पिलातुस चे गोढु आला ते ईशु ची लाश मांगली । हा सुणती कने पिलातुस ने लाश ङिती ङेणे ची आज्ञा ङिती ङिली । 59 यूसफ ने ईशु ची लाश चली, विनु नवीं चिटटी चादरी मां बलेठले, 60 ते विनु नवीं कब्री मां मेहले, जको ओह्णे चट्टानी मां खुदवाली ती, ते कब्री चे दर्रा पर ब़ङा पत्थर रेह्ड़ती कने चाहला गेला । 61 मरियम मगदलीनी ते ङुजी मरियम ओठे कब्री चे साह्म्णे ब़ेहल्तिया ।
कब्री पर पाहरा
62 अगला ङियो जको सब्त चा ङियो हुता, मुख्ययाजक ते फरिसी भेले हुती कने पिलातुस चे गोढु गेले, 63 “ओ महाराज़, अम्हानु चेता छे, कि ओ भरमाणे आले ने जिसे बेह्ले जीता हुता, केहेलते, ‘मैं तींई ङिहा चे बाद जीता हुती जही ।*’ 64 ता आज्ञा ङे कि तींई ङीहा तक कब्री ची रखवाली करली जाओ, इसड़े ना कि ओह्चे चेले आओ ओह्नु चोरी करती चती जाओ*ते लौका नु किहुं लागो, ‘ओ मरले आला मुं जीता हुती आला ।’ बल्ति भांसला धोका पेहले कनु बुरा हुवी ।”