ईशु नु मारने ची चाल
26
1 जिसे बेह्ले ईशु ये बाता केहती चुकला, तां आपणे चेला नु किहुं लागला । 2 “तम्ही जाणा, कि ङूं ङिहा चे बाद फसह चा तेंहवार छै । ते ‘मैं, बन्दे चा पूत क्रूसा पर चड़ाह्वणे कले पकड़वाला जही” ।3 बल्ति प्रधान याजक ते प्रजा चे बङके काइफा नावां चे महायाजक चे बेहेड़े मां भेले हुले । 4 ते आपस मां विचार करु लागले कि ईशु नु धोके लारे पकड़ती कने मारती नाखु । 5 वे किही पलते, “तेंहवारा चे वख्ता पे ना; कङी इसड़े ना हो कि बन्दी कुई दंगा फसाद करती नाखो ।”
बैतनिय्याह नगर मां ईशु
6 जिसे बेह्ले ईशु बैतनिय्याह नगर मां शमोन चे घरा मां हुता । जाया कोड़ ठीक हुला ता, 7 तां हेक अस्त्री संगमरमर चे ठांवा मां बेशकिमती इत्र चती कने ओह्चे गोढु आली, ते जिसे बेह्ले ओ खाणे पर ब़ेहल्ता ला, तां ओह्चे ठोङा पर रेड़ती ङिला । 8 ईं ङेखती कने ओह्चे चेले चिड़ती कने किहुं लागले, “ऐ इत्र नु कां बिगाड़ले ? 9 हा तां आच्छे मोला मां बिकती कने कंगाला मां बांटला जा सगेला ।”
10 ईं जाणती कर ईशु ने वानु केहले, “तम्ही ऐ अस्त्री नु कां सतावा पले ? यिने माये लारे भलाई करली । 11 कंगाल तम्चे लारे सदा रिहे, पर मैं तम्चे लारे सदा नी रिही । 12 जिसे बेह्ले यिने माये शरीरा पर जको हा इत्र रेड़ला, ते ऐ वास्ते रेड़ला कि माये दफणाणे जाणे वास्ते मनु तियार करो । 13 मैं तम्हानु सच किहे पला, कि पुरे संसारा मां जिठे वी हा सुसमाचार प्रचार करला जही, ओठे ये अस्त्री चे ऐ कामा चा जिकर वी, यीची यादगिरी मां करला जही ।”
यहुदा इस्करियोती चा ईशु लारे विश्वासघात
14 बल्ति यहूदा इस्करियोती नावां चा ब़ाहरा चेला मुं हेके ने महायाजका चे गोढु जतीकने केहले । 15 “अगर मैं ईशु नु तम्चे हाथु पकड़वाती ङिंये , ते तम्ही मनु का ङिया ?” वाह्णे ओह्नु तीस चान्दी चे सिक्के तोलती कर ङिती ङिले । 16 ते यहूदा इस्करियोती ओ वख्ता कनु लाती कने, ईशु नु पकड़वाणे चे वास्ते आच्छा मोका सोधु लागला ।
चेला लारे फसह चे आखरी खाणे
17 अखमीरी रोटी चे तेंहवारा चे पेहले ङियो, “चेले ईशु चे गोढु आती कर पुछु लागले । तू किठे चाहवी कि फसह चे खाणे ची तियारी करु ?”
18 ईशु ने केहले, “शहरा मां फलाणे बन्दे चे गोढु जती कर ओह्नु किहा, ‘कि गुरु किहे पला, कि माया वख्त गोढु छै, मैं चेला चे लारे दुधे इठे फसह चा तेंहवार मनावी ।’ ”
19 बल्ति चेला ने ईशु ची आज्ञा मनली, ते फसह चे खाणे तियार करले ।
20 जिसे बेह्ले आथड़ हुले, तां ईशु ब़ाहारा चेला लारे फसह चे खाणे, खऊ ब़ेहला । 21 जिसे बेह्ले वे खाणे खई ब़ेहल्ते, तां ईशु ने केहले, “मैं तम्हा नु सच्च किहे पला, कि तम्हा मुं हेक मनु धोखा ङिती कने पकड़वावी” ।
22 “ऐचे पे चेले घणे उदास हुले, ते हर हेके ने ओकनु पुछले, “ओ गुरु, का ओ मैं छै ?”
23 ओह्णे जवाब ङिला, “कि जको माये लारे थाली मां हाथ नाखली ब़ेहला, ओही मनु धोखा ङिती कने पकड़वावी । 24 ‘मैं, बन्दे चा पूत, जिसड़े माये बारे मां लिखले पले, ऊ पुरे हुवी पर ओ बन्दे कले हाय छै, जाये जरिये ‘मैं, बन्दे चा पूत पकड़ीला जाये । अगर ओ बन्दे ना जमिया, तां ओह्चे कले भले हुते ।”
25 तब ओह्चे पकड़वावड़े आले यहुदा इस्करियोती ने केहले कि’ “ओ गुरु, का ओ मै छै ?”
ईशु ने केहले, “तें आप सच्च केहती ङिले!”
प्रभु भोज
26 जिसे बेह्ले वे खई पलते, तां ईशु ने रोटी चली, ते धन्यवाद ङिती कर भाली, ते चेला नु ङीती कर केहले, “गिहा, खावा, हा माई देह छै ।”
27 बल्ति ओह्णे मुंगर चती कर, धन्यवाद करला, ते वानु ङिती कने केहले, “तम्ही सारे ऐचे मुं पिया’ । 28 कांकि ईं वादे चे माये ऊं लूंही छै, जको घणा बन्दा ची पापा ची माफी कले बहणे जाणे पे छै । 29 मैं तम्हानु किहे पला, कि अंगुरा चा हा रस ओ ङियो तक कङी वी नी पीहीं, जब तक मैं तम्चे लारे आपणे ब़ा नरीकार चे राज़ मां नवां ना पीयें ।”
30 बल्ति वे भजन गाती कने जैतून चे पहाड़ा पे चाहले गेले ।
पतरस चे इन्कार ची भविष्यवाणी
(मर. 14.27-31; लूका 22.31-34; यू. 13.36-38)
31 तब ईशु ने वानु केहले, “तम्ही सारे आज़ ही राती नु माई वजहा कनु ठोकर खावा । ते नासती जावा कांकि नरीकारा चे शास्न मां लिखले पले, ‘नरीकार किहे ‘कि मैं आजड़ीया नु मारी; ते झोन्ड चा भेङा खिडंती पुडंती जाये ।’ 32 पर मैं जीते हुवणे चे बाद तम्हा कनु पेहले गलील सनू जहीं ।”
33 ईं सुणती पतरस ने ओह्नु केहले, “ओ गुरु, ‘अगर सारे दुधे बारे मां ठोकर खाओ तां खाओ, पर मैं कङी वी ठोकर नी खई ।”
34 ईशु ने ओह्नु केहले, “मैं तनु सच्च किहे पला, कि आज़ ही राती नु कूकड़े चे बांग ङेणे कनु पेहले, तू तीन वारी माया इन्कार करें ।” 35 पतरस ने ओह्नु केहले, “अगर मनु दुधे लारे मरने वी हो, तां वी, मैं दुधा इन्कार नी करी ।”
ते इसड़े ही सारा चेला ने वी केहले ।
गतसमनी ची बाड़ी मां प्राथना
36 बल्ति ईशु आपणे चेला चे लारे गतसमनी बाड़ी नावां ची जग्हा मां आला ते आपणे चेला नु किहुं लागला, “कि ईठी ब़ेले रेहजा, जब तक की मैं ओठे जती कने प्राथना करे ।” 37 ईशु ते पतरस ते जब्दी चे ङूंहु पुता नु लारे गेहली गेला, ते उदास, ते बैचेन हुऊ लागला । 38 बल्ति ईशु ने वानु केहले, “माये जी घणे उदास छै, इठे तक माई जेन्द निकलणे पर छै, तम्ही ईठी रूका, ते माये लारे सुज़ाक रिहा ।” 39 बल्ति ओ थोड़ा नेरा उगते बधती कर मुंहा चे भराणे ढेला, ते हा प्राथना करू लागला, “कि ओ माया ब़ा, अगर हो सगे़, तां हा ङुखा चा मुंगर माये कनु हटाती नाख, तां वी जिसड़े मैं चाहवे उसड़े ना, पर जिसड़े तू चाहवी उसड़े ही हो ।”
40 बल्ति ईशु चेला चे गोढु आला वानु नूहले आले ङेखले, ते पतरस नु केहले, “का तम्ही माये लारे हेक घड़ी वी ना जाग़ सगा ? 41 जा़ग़ते रिहा, ते प्राथना करते रिहा, की तम्ही परीक्षा मां ना पड़ा । आत्मा तां तिआर छै, पर शरीर कमजोर छै ।”
42 बल्ति ईशु ने ङुजी वारी जतीकर प्राथना करली, “कि हे ब़ा नरीकार, अगर ङुखा चा मुगंर माये बिना पिले बगैर ना हट सगे तां दुधी इच्छा पूरी हो ।” 43 बल्ति ओह्णे आती कने वानु नूहले आले ङेखले, कांकि वांहचिया आंखिया नीङे लारे भरलिया पलतीया ।
44 ईशु वानु छोड़ती कने बल्ति चाहला गेला , ते वाहो बात बल्ति केहती कने, तीजी बारी प्राथना करली । 45 बल्ति ओह्णे चेला नु आती कने वानु केहले, का तम्ही हमा तक अरामा लारे नूहले पले ? ङेखा, घड़ी आती गेली, ‘मैं, बन्दे चा पूत पापिया चे हाथु पकड़ीजणे पर छै । 46 ऊठा, चाला, ङेखा, माया पकड़ावणे आला गोढु आती गेला ।”
ईशु चे धोके लारे पकळे जाणे
47 ईशु ईं किहे ही पलता, कि ङेखा, यहुदा जको ब़ाहारा मु हेक हुता आला, ओह्चे लारे जको भीड़ हुती, वा तलवारा ते ङांगा चली आली, वानु महायाजक ते लौका चे बङका ने भेजले हुते । 48 “ओह्चे पकड़ावणे यहूदा इस्करियोती ने वानु हा इशारा ङिला, कि जानु मैं मिठी ङिही ओही ईशु छै , ओह्नु पकड़ती गेहजा ।”
49 ते फोरन ईशु चे गोढु आतीकर केहले, “ओ गुरु नमस्कार, ते ओह्नु मिठी ङिली ।
50 ईशु ने ओह्नु केहले, “ओ यार, जिसे कामा कले तू आला, ओह्नु करती गेह ।”
बल्ति वाह्णे आतीकर ईशु पे हाथ नाखला, ते ओह्नु पकड़ती गेले । 51 ते ङेखा, ईशु चे लारे आला मु हेके ने हाथ बधातीकर आपणी तलवार छिकली, ते महायाजका चे नोकरा पर चलाती ङिली, ते ओह्चा कान उङारती ङिला । 52 तब ईशु ने ओह्नु केहले, “आपणी तलवार मियानी मां राख, “कांकि जको तलवार चलावी, वे सारे तलवारी लारे नाश करले जाये ।’ 53 का तू ना समझी, कि मैं आपणे ब़ा कनु मिनत करें । ते ओ स्वर्गदूता चा ब़ाहारा पलटणa कनु ज्यादा माये कनु हमा हाजिर करती ङिही ? 54 पर पवित्र शास्त्रा चा लिखलिया आलिया बाता किवें पुरिया हुवे ? पर इसड़े हुवणे जरूरी छै ।”
55 ओही बेह्ले ईशु ने भीड़ी नु केहले, “का तम्ही तलवारा ते ङांगा चती कने मनु ङाकु समझती कने पकड़ु आले ? मैं हर ङियो मन्दरा मां ब़ेसती उपदेश ङिता, ते तम्ही मनु ओठे कोह्नी पकळे । 56 पर ईं सारे कोच्छ ऐ वास्ते हुले, कि भविष्यवक्ता चा लिखलिया आलिया बाता पुरिया हो ।”
बल्ति सारे चेले ईशु नु छोड़ती कने नासती गेले ।
महासभा चे सामणे ईशु
(मर. 14.53-65; लूका 22.54,55,63-71; यू. 18.13,14,19-24)
57 भीड़ ईशु नु पकड़ती कने कैफा महायाजका चे गोढु गेहती गेली, जिठे धर्मशास्त्री ते बङके यहूदी नेता भेले हुले ब़ेहल्ते । 58 ते पतरस दूरी कनु ओह्चे भांसु - भांसु महायाजका चे बेहड़े तक गेला, ते भीतर जती कने नतीजा ङेखणे चे वास्ते पेहरेदारा चे लारे ब़हेसती रेहला । 59 खास महायाजक ते सारी महासभा ईशु नु मारती नाखणे कले ओह्चे विरोध मां कूड़ी गवाही नु सोधी पलते । 60 पर ब़ोहत सारे कूड़े गवाह आले, पर कसा वी कोहनी लाभली, आखिर मां ङूं जणा ने आतीकर केहले । 61 “कि ऐ बन्दे ने केहले, ‘कि मैं नरीकारा चे मन्दरा नु ढ़ा सगे ते ओह्नु तींई ङिंहा मां बल्ति बणा सगे ।’ ” 62 बल्ति कैफा महायाजका ने खड़े हुती कने केहले, “का तू कुई जबाब ना ङी ? ये बन्दी दुधे विरोध का गवाही ङीये पले ?” 63 पर ईशु चोप रेहला, कैफा महायाजका ने ओह्नु केहले, “मैं तनु जीते नरीकारा ची कसम ङिती किहे पला, कि तू नरीकारा चा पूत मसीह छी, अगर छी तां अम्हानु बावड़ती ङे ।”
64 ईशु ने ओह्नु केहले, “तें आप ही केहती ङिले, बल्कि मैं तम्हानु ईं वी किहे पला, कि हमा कनु तम्ही ‘मैं, बन्दे चे पुता नु माये सर्वशक्तिमान चे सज़्ज़े पासु ब़ेहले आले ङेखा, ते स्वर्गा कनु बदला पे आते हुले ङेखा ।” 65 बल्ति कैफा महायाजका ने आपणी ओढणी फाड़ती कने केहले, “ऐह्णे नरीकारा ची निन्दिया करली, हमा अम्हानु गवाह ची कुई जरुरत कोह्नी । तम्ही सारा ने ऐनू नरीकारा ची निन्दा करते हुले सुणले । 66 तम्ही का समझा पले ?”
वाह्णे जबाब ङिला, हा मौती ची सजा चे लायक छै ।” 67 बल्ति वाह्णे ईशु चे मुंहा पे थूकले, ते ओह्नु मुक्किया मारलिया । नेरा ने थप्पड़ मारती कने केहले । 68 ओ मसीह , “अम्चे महु भविष्यवाणी करती कने बावड़, कि तनु केह्णे मारले ?”
पतरस चा इन्कार
69 ते पतरस ब़ाहरु बेहड़े मां ब़ेहलता ला, कि हेक दासी ने ओह्चे गोढु आतीकर केहले, “तू वी ईशु गलीली चे लारे हुता ।”
70 बल्ति सारा चे साह्म्णे पतरसा ने ईं केहती कने इन्कार करला ते केहले , “मैं ना जाणी तू का किही पली ।”
71 जिसे बेह्ले ओ ब़ाहरु पोड़िया मां चाहला गेला, तां ङूजी दासी ने ओह्नु ङेखती कने वानु जको ऊठे हुते केहले, “हा वी तां ईशु नासरी चे लारे हुता ।”
72 पतरस ने कसम खाती कने बल्ति इन्कार करला कि “मैं ऐ बन्दे नु ना जाणी ।”
73 थोड़ी देर बाद, जको ओठे भुलेते, वाह्णे पतरस चे गोढु आतीकर ओह्नु केहले, “सच्च मां तू वी तां वांह्चे मु हेक छी, कांकि दुधी ब़ोली दुधा भेत खोले पली ।”
74 बल्ति पतरस गुस्से मां हुती ते कसम खऊं लागला, “मैं ऐ बन्दे नु ना जाणी ।”