मन्दरा चे सत्यानाश ची भविषवाणी
24
1 जिसे बेह्ले ईशु मन्दरा मुं निकलती कर जाये पलता, तां ओह्चे चेले ओह्नु मन्दरा ची बणावट ङिखाणने कले ओह्चे गोढु आले 2 ईशु ने चेला नु केहले, “का तम्ही ईं सारे कोह्नी ङेखा पले ? मैं तम्हानु सच्च किहे पला, इठे पत्थरा पर पत्थर नी बची, जको ढ़ाला ना जाओ ।”मुसीबत ते क्लेस
3 ते जिसे बेह्ले ईशु जैतून पहाड़ा पर ब़ेहल्ता, तां चेला ने ऐकान्त मां ओह्चे गोढु आतीकर केहले, “अम्हानु केह कि ये बाता कङण हुवे ? ते दुधे आवणे ची ते संसारा चे अन्त चा निशानी का हुवी ?”
4 ईशु ने वानु जवाब ङिला, “हुशार हुती जावा, कुई तम्हानु गुमराह ना करो । 5 कांकि घणे सारे इसड़े हुवे जको माये नावां लारे आतीकर किहे, ‘कि मैं मसीह छै, ते घणा बन्दा नु गुमराह करे । 6 तम्ही झग़ड़े ते झग़ड़ा ची चर्चा सुणा, ङेखा घब़राती ना जजा कांकि यांचे हुवणे जरुरी छै, पर ओ बेह्ले अन्त नी हुवी । 7 कांकि कौम कौमी पर, ते देश - देशा पर चड़ाही करे, ते जग्हा - जग्हा अकाल पड़हे, ते भोयेंअम्ब आवे । 8 ये सारिया बाता तां सेर्फ ङुखा ची सुरुआत हुवी ।
9 “तब वे क्लेस ङिवाड़े कले तम्हानु पकड़वावे, ते तम्हानु मरती नाखे, ते माये नावां ची वजह कनु सारीया कौमा चे लौक तम्चे लारे बैर राखे । 10 बल्ति वा ङिहां मां ब़ोहत सारी बन्दी विश्वास मां ठोकर खाये, ते हेके ङुजे नु धोखा ङिये ते बैर राखे । 11 ते ब़ोहत सारे कुड़े भविष्यवक्ता उठती खड़े हुवे, ते घणा नु भरमावे । 12 ते अधर्म बधणे लारे घणा चा प्रेम ठाडा हुती जही । 13 पर जको अन्त तक सब्र करली रिही, ओह्चा ही उद्धार हुवी । 14 ते स्वर्ग राज़ चा हा सुसमाचार सारे संसारा चिया जातिया मां प्रचार करला जही, कि सारिया कौमा पर गवाही हो, तब अन्त आती जही ।
ब़ङी मुसीबती ची सुरुआत
15 “सो जिसे बेह्ले तम्ही ‘उज़ाड़ने आली किज़ड़ी चीजे’, नु जाई चर्चा दानिय्येल भविष्यवक्ता ने करली हुती, मन्दरा ची पवित्र जग्हा भीली आली ङेखा ।” पड़हने आला खौद समझती जाओ कि ऐचा अर्थ का छै । 16 बल्ति जको बन्दी यहुदिया मां हो वे पहाड़ा पर द्रोड़ती जाओ । 17 जको कोठे पर हो, वे आपणे घरा मुं कसा समान चवणे कले तले ना उतरो । 18 ते जको खेता मां काम करती हो, वे आपणी ओढणी चवणे कले पुठे ना आओ ।
19 “वां अस्त्रीया चे वास्ते, जको ढ़िढ़ा लारे, ते जाई ब़ाले ङूध पीती हुवे, वे ङिये वांह्चे कले घणी मुशबती ची हुवे । 20 ते प्राथना करा, कि तम्हानु पाले मां या सब्त चे ङियो द्रोड़ने ना पड़ो । 21 कांकि इसड़ा भारी क्लेस हुवी, जिसे वख्ता कनु नरीकारा ने संसारा ची सुरुआत करली, ना हमा तक हुला, ते ना कङी हुवी । 22 “अगर वे ङिहें घटाली ना जहिया, कुई जी ना बच्चिया, पर नरीकारा चे चुणले आला ची वजह कनु वे ङिहें घटाली जाये ।”
23 “ओ वख्ता पे अगर कुई तम्हानु किहे, ‘कि ङेखा, मसीह इठे छै !’ या ‘मसीह ओठे छै’ तां काया वी विश्वास ना करजा । 24 कांकि कू़ड़े मसीह ते कूड़े भविष्यवक्ता उठती खड़े हुवे, ते बङे चेन्ह ते अदभोत कामे ङिखाणे, कि अगर हो सगे तां नरीकारा चे चुणले आला नु वी भरमाती ङियो । 25 ‘ङेखा, ‘मैं, पेहले कनु ही तम्हानु ईं सब कोच्छ बावड़ती ङिले ।’
26 “ऐ वास्ते अगर वे तम्हानु किहो, ‘ङेखा । ओ जंगला मां छै , तां ओठे ना चाहले जजा, या ङेखा, ओ कोठड़िया मां छै, तां वांह्चा विश्वास ना करजा । 27 कांकि जिंवे बिजली उभरते कनु लाती थोते तक चमकती जाये वे, यूंही ‘मैं, बन्दे चे पुत वी आवी ।’
28 तम्ही जाणा कि, जिठे लाश हुवी, उठी गि़झा भेलिया हुवे ।”
ईशु, बन्दे चे पुता, चे दुबारा आवणे
29 “वां ङिहां चे क्लेसा चे बाद फोरन सूरज काला हुती जही, ते चान्दा चे सोज़ले जते रिही, ते तारे आसमाना कनु ढे़ती पड़हे ते आसमाना चिया शक्तिया हलालिया जाये । 30 बल्ति ‘मैं, बन्दे चे पुता चा चेन्ह आसमाना मां ङिसु लागी, ते बल्ति धरती चे सारे कोल्ल चे लौक छाती कोटे, ते ‘मैं, बन्दे चे पुता नु ब़ङी सामर्थ ते शोहरत चे लारे आसमाना चे बदला पर आते ङेखे । 31 ते ओ तुरही ची ब़ङी आवाजी लारे, आपणे स्वर्गदूता नु भेजी, ते ओ आसमाना चे ऐ कूणे कनु ओ कूणे तक, चारो ही दिशा कनु नरीकारा चे चुणले आला नु भेले करें ।”
अंजीरा चे ब़ूटे ची मिसाल
32 “अंंजीरा चे ब़ूटे कनु हा मिसाल सीखा । जिसे बेह्ले ओ ब़ूटे ची लड़ी मुलेम हुती जाये ते पती निकलु लागे, तां तम्ही जाणती गिहा, कि गर्मी ची रोत्त गोढु छै । 33 यूं करती जिसे बेह्ले तम्ही यां सारिया बाता नु हुते ङेखा, तां जाणती गिहा, कि औ गोढु छै, बल्कि दरवाजे पर ही छैa । 34 मैं तम्हानु सच्च किहे पला, कि जबतक ये सारिया बाता पुरिया ना हुती जही, तबतक हा पीढ़ी जती नी रीही । 35 आसमान ते धरती टलती जही, पर माया बाता नी टलहे ।
जाग़ते रिहा
36 ओ ङियो ते वे घड़ी चे बारे मां कुई ना जाणी, ना स्वर्ग मां स्वर्गदूत, ते ना पूत, पर हेको ब़ा नरीकारb । 37 जिंवे नूह चे ङिहां मां हुले, यूंही ‘मैं, बन्दे चे पुता चे आणे वी हुवी । 38 कांकि जिंवे जल प्रलय कनु पेहले चे ङिहां मां, जे ङियो तक नूह जहाजा पर कोह्नी चड़ला, ओ ङियो तक लौक खाते पीते रहले, ते वांह्चे मां बीहा - शादीया हुतिया रहलिया । 39 ते जब तक जल प्रलय आतीकर वां सारा नु बहाती ना गेला, तब तक वानु कहीं पता ना लागला, यूं करती ‘मैं, बन्दे चे पुता चे आणे वी जुही हुवी । 40 ओ वख्ता पे ङोन जणे खेता मां काम करते हुवे, ते हेक चती गेहला जही, ते ङुजे नु छोड़ले जही । 41 “घरटी पिसतिया ङोन अस्त्रीया महु , हेकी नु चती गेहले जही, ते ङुजी नु छोड़ती ङिले जही ।
42 ऐ वास्ते जागते रिहा, तम्ही ना जाणा कि ‘मैं,तम्चा प्रभु किसे ङियो वी आती जही । 43 कांकि ईं जाणती गिहा, कि अगर घरा चा मालिक जाणता हुविया कि चोर किसे पाहरा मां आवी, तां जागता रीहा, ते आपणे घरा मां सेंध ना लागु ङिया 44 ऐ वास्ते तम्ही वी तिआर रिहा । कांकि जेस घड़ी चे बारे मां तम्ही सोचा वी नी, ओ घड़ी ‘मैं, बन्दे चा पूत आती जही ।
भरोसेमन्द नौकर ते दोष्ट नौकर
45 “ऐ वास्ते ओ भरोसेमन्द ते ब़ुधिमान नौकर कूण छै जानु मालिका ने आपणे नौकरा चाकरा पे सरदार बणाले, कि वख्ता पे वानु खाणे ङियो ? 46 धन्न छै , ओ नौकर, जानु ओह्चा मालिक आतीकर इसड़े ही करते ङेखो । 47 मैं तम्हानु सच्च किहे पला, ओ ओह्नु आपणी सारी जायजती पर सरदार बणावी । 48 पर अगर ओ दोष्ट नौकर सोचु लागो, ‘माये मालिका चे आणे मां देर छै ।’ 49 ते आपणे लारे आले नौकरा नु कोटु लागो, ते पियक्कड़ा लारे खाओ पियो । 50 तां ओ नौकरा चा मालिक इसड़े ङियो आवीc, जिसे बेह्ले ओ ओची बाट ना ङेखता हो, ते इसड़ी घड़ी आवी कि ओ ना जाणता हो । 51 ते ओह्नु घणी सजा ङिती कने, ओह्चा हेसां कपटिया लारे ठहरावी । जिठे रोवणे ते ङांत पीसणे हुवी ।