कोढ़िया नु ठीक करले
(मर.1.40-45; लूका 5.12-16)
8
1 ईशु जिसे बेह्ले पहाड़ा कनु तले उतरला ते ब़ोहत ब़ङी भीड़ ओह्चे भांसु टुरती पली । 2 ओठे हेक कोड़ी वी हुता । ओ ईशु चे गोढु आला, ते ओह्चे सामणे झुकती कने ब़ोला, “प्रभु, अगर तू चावी तां मनु ठीक कर सगी a ।”3 ओह्चे पे ईशु ने आपणा हाथ बढ़ाती कने कोड़ियां नु छुले ते केहले, “पक्का छे मैं चावै तू ठीक हुती जा, ते हेक दम कोड़ियां चा कोड़ जता रेहेला ।”
4 bबल्ति ईशु ने केहले, “ङेखा ऐ बारे मां कानु वी कसा ना बावड़जा । पर जती कने आपणे आप नु याजक नु ङिखाण । बल्ति मुसा चे आदेशा चे अनुसार भेंट चढ़ा ताकी बन्दा नु दुधे ठीक होणे ची गवाही मिलो ।”
रोमी सेनानायक चा भरोसा
5 बल्ति ईशु जिसे बेह्ले कफरनहूम मां पुजला, हेक रोमी सेनानायक ओह्चे गोढु आला ते ओकनु सहायता वास्ते बिनती करती कने ब़ोला । 6 ओ “प्रभु, माया हेक दास घरा मां बिमार पला ला । ओह्नु लकवा मारती गेला । ओह्नु ब़ोहत दर्द हुवे पला ।”
7 बल्ति ईशु ने रोमी सेनानायक नु केहले, “में आती कने ओह्नु आच्छे करी ।
8 रोमी सेनानायक ने जबाब ङिला, “प्रभु में ऐ लायक कोह्नी छै: कि तू माये घरा मां आ । ऐ वास्ते हेको आज्ञा ङिती ङे कि माया ठीक हुती जाओ । 9 हां में जाणे कांकि में वी हेक इसड़े बन्दे छै: कि जको बङे अधिकारियां तले काम करे वे । ते माये तले ङुजे सिपाही वी छी । जिसे बेह्ले में हेके सिपाहीया नु किहे कि ‘जा’ ते ओ चाहला जाऐ ते ङुजे नु किहे कि ‘आ’ ते ओ आती जाऐ । में आपणे दासा नु किहे कि ‘हा कर’ तां ओ ओह्नु करे ।’ ”
10 जिसे बेह्ले ईशु ने हा सुणले ते हैरान हुते हुवे ओह्चे भांसु जको बन्दी आई पलती ली, “वानु केहले में तम्हानु सच किहे कि में इतना गहरा विश्वास तां इस्राएल मां वी कोह्नी ङेखला । 11 में तम्हानु हा नेरे बावड़े, कि ब़ोहत सारै पूरब ते पशिचम कनु आवे ते वे भोज मां, अब्राहम, इसहाक, ते याकूब चे लारे स्वर्ग चे राज्य मां खाणे वास्ते आपणी – आपणी जग्हा ग्रहण करै । 12 पर इस्राएल जाति ची बन्दी जको आपणे आप नु नरीकारा चे पुत समझी, वे ही बन्दी ब़ाहरु अन्धारे मां नाखती ङिली जाऐ, जिठे रोणे ते ङात पिसड़े हुवी ।” 13 ते ईशु ने रोमी सेनानायक नु केहले, “जा; जिंवे दुधा भरोसा छै, जुही दुधे वास्ते हो ।”
ते ओह्चा सेवक ओही बेह्ले ठीक हुती गेला ॥
ईशु ने बीमारा नु ठीक करले
(मर.1.29-34; लूका 4.38-41)
14 ते ईशु ने पतरसा चे घरा मां आती कने ओची सांसु वे नु बुखारा मां खाटी मां पले आले ङेखले । 15 ईशु ने विचे हाथा नु हाथ लाला, ते विचा बुखार ओही बेह्ले उतरती गेला; ते वा खड़ी हुती कने वांह्ची सेवा करु लागली ।
16 जिसे बेह्ले आथण हुले बल्ति वे ओह्चे गोढु घणा सारा बन्दा नु गेहती आले जांचे मां ब़लाया हुतिया, बल्ति ईशु ने वा ब़लाया नु आपणे वचना लारे काढ़ती सोड़ले, ते सारा बीमारा नु ठीक करले ।
17 ताकि जको वचन यशायाह भविष्यवक्ता चे द्वारा लिखला गेलता ला ओ पूरा हो, “कि ओह्णे अम्चीया कमजोरिया नु आपणे ऊपर गेहती गेलिया, ते अम्चीया बीमारिया नु चती गेले ॥”
ईशु चे भांसु टुरने चा मोल
( लूका 9.57-62)
18 ईशु ने आपणे चारो ओर हेक ब़ङी भीड़ ङेखती कने, चेला नु नेरे पासु जाणे ची आज्ञा ङिली । 19 ते हेके शास्निया ने ओह्चे गोढु आती कने ओह्नु केहले, ‘ओ गुरु, “जिठे किठे तु जाये, मैं दुधे भांसु - भांसु टुरती पड़ी ।”
20 ईशु ने ओह्नु केहले, “लोमड़िया चिया घोरा ते आसमाना चे पखीया चे बसेरे ते रिही वी, पर ‘ मैं, बन्दे चे पुता, चे वास्ते तां ठोङ मेहलणे ची वी जग्हा कोह्नी छै: ।”
21 हेक नेरे चेले ने ओह्नु केहले, “ओ ‘प्रभु, मनु पेहले जऊ ङे, कि आपणे ब़ा नु गाड़ली आवे । 22 ईशु ने ओह्नु केहले, “ हमा तु माये भांसु टुरती पड़, ते जको मुड़दे छी वानु आपणे मुड़दे गाढु ङे, कांकि वाकनु हमेशा चा जीवन कोह्नी ॥”
लहरा नु ते अंन्धारी नु शान्त करने
(मर.4.35-41; लूका 8.22-25)
23 जिसे बेह्ले ओ ब़ेड़ी पे चड़ला, ते ओह्चे चेले ओह्चे भांसु टुरती पले । 24 ते ङेखा, कि झीली मां हेकदम इतना बङा तुफान आला कि ब़ेड़ी पछाटा लारे ढ़िकिजु पड़ती गेली; पर ईशु नूहला पलता ला । 25 बल्ति वाह्णे गोढु आती कने ओह्नु सुजाक करले, ते केहले, ओ प्रभु, अम्हानु बचा ! अम्ही मरने आले छु ।”
26 ईशु ने वानु केहले; “ओ विश्वास ना करने आली हटीली बन्दी, तम्ही का ङरा पली ?” बल्ति ओ खड़ा हुती कने अन्धारी नु ते पाणीयां नु दड़काले, ते सारे कोच्छ शान्त हुती गेले ।
27 ते बन्दी हैरान हुती कने किहुं लागली, “कि ईं किसड़े बन्दे छै, कि अन्धारी वी ते पाणी वी ऐचिया आज्ञा नु मनी ?”
ईशु गदरेनियो चे देशा मां
(मर.4.35-41; लूका 8.22-25)
28 जिसे बेह्ले ओ नेरे पासु गदरेनियो चे देशा मां पुजला, ते ङोन बन्दी जाये मां ब़लाया हुतिया शमसान घाटा मु निकलती कने ओह्नु मिड़ले, वे ङोनी इसड़े खतरनाख हुते, ओ रस्ते कनु कुई वी उठु टप ना सगते । 29 ते ङेखा, “वाह्णे रोल मचाती कने केहले, “कि ओ नरीकारा चा पुत, अम्चे कनु दुधे का काम छै ?” का तु वख्ता कनु पेहले अम्हानु ङोख ङेणे वास्ते आती गेला ?।
30 वाकनु कोच्छ दुरी पे सूअरा चा झोन्ड चरे पलता । 31 ब़लाया ने ओह्नु हा केहेती कने विनती करली, “कि अगर तु अम्हानु काढ़णे चाहवी तां, सूअरा चे झुन्डा में भेजती ङे ।”
32 ईशु ने वानु केहले, ‘जावा’! ,“वे ब़लाया निकलती कने सूअरा चे ढिढा मां घिरती गेलिया, ते ‘ङेखा’ सारा सूअरा चा झोन्ड रोल मचाता ते झपटती कने पाणीयां मां जती ढेहला ते ङुब़ती मरती गेला ।”