Ʉkʉntuufya Kyala ʉgwa maka
147
Muntuufyege ɄNTWA!Ko kʉnunu ʉkʉmpaala Kyala gwɨtʉ,
namanga gwa ipyana, kangɨ abagiisye.
2 ɄNTWA ikʉkajenga kangɨ akaaja akaa Jelusalemu,
ikʉbabʉngaania aBanyaisilaɨli aba baakoliigwe mbʉtʉmwa.
3 Ikʉbabʉmbʉlʉsya aba ɨndumbula syabo sitengwike,
ikʉbapinya ɨfifulalo fyabo.
4 Ikʉbala ɨndondwa syosa ʉkʉtɨ silɨ bʉlɨbe,
ikʉlʉpapo kʉkʉtɨ lʉtondwa ɨngamu.
5 ɄNtwa gwɨtʉ nkʉlʉmba, alɨ na maka mingi,
amahala gaake gakaja nʉ mpaka nagʉmo.
6 ɄNTWA ikʉbakwesya aba bikʉboneligwa,
looli abaniongafu, ikʉbagwɨsya paasi.
7 Mumpaalege ɄNTWA, mugwege ʉlʉpi kʉmyake,
mummwɨmbɨlege Kyala gwɨtʉ na mapango.
8 Ikʉkupɨkɨla ʉmpaalanga na mabɨngo,
ikʉkɨtimɨkɨsya ɨkiisʉ ɨfula,
ikʉmesya ɨliisʉ mfyamba.
9 Ikʉgɨpapo ɨmitiimo ɨfindʉ fyabo,
nʉ twana twa makʉngʉʉlʉ bo tukʉlɨla.
10 Atikwikyela na maka gaa falaasi,
kangɨ atikwikyela na maka gaa ngaasi.
11 Looli ɄNTWA ikwikyela na bandʉ aba bikʉntiila,
aba bikʉsʉʉbɨla iipyana lyake.
12 Gwe Jelusalemu, ʉntuufyege ɄNTWA!
Mwe bandʉ baa mu Syoni, mumpaalege Kyala gwɨnu!
13 Namanga ikʉfikasya ɨfiigalɨlo fya fipata fyako,
ikʉbasaja abandʉ aba balɨ nkatɨ mmyako.
14 Ikʉtwala ʉlʉtengaano mmipaka gyako,
ikʉkwikʉtɨsya nɨ findʉ ɨfinunu.
15 Ikʉtwala ʉlʉlagɨlo lwake pakiisʉ,
iisyʉ lyake likʉfika nakalɨnga kʉno alɨtʉmile.
16 Jo ʉjʉ ikwalɨsya ɨngaala bo ʉlwa lʉsyoja ʉlwelu,
ikoona ɨndʉngwa bo ʉlwa mfwandɨlo.
17 Ikʉtimɨsya ɨfula jaa mabwe bo ʉlwa sangalabwe,
kʉ bʉtalalɨfu bwake amɨɨsi gikʉja ngaala.
18 Ikʉlɨtʉma iisyʉ lyake, ɨngaala jikwengʉka,
ikʉpela ʉmbelo, amɨɨsi gikʉsululuka.
19 Ikʉlɨfumusya iisyʉ lyake kʉ baa ndʉjungu lwa Jaakobo,
ɨndagɨlo syake nɨ manyisyo syake kʉ Banyaisilaɨli.
20 Looli akaabombile bo ʉlo kʉ bapanja,
abandʉ abangɨ bakasimanya ɨndagɨlo syake.
Muntuufyege ɄNTWA!