Ʉkʉntuufya Kyala ʉmpoki
146
Muntuufyege ɄNTWA!Gwe ndumbula jangʉ, ʉntuufyege ɄNTWA!
2 Ngʉntuufyaga ɄNTWA bo ngaalɨ ndɨ mʉʉmi,
ngʉmpaalaga Kyala mbʉʉmi bwangʉ boosa.
3 Ʉlɨngabasʉʉbɨlaga abalongosi,
abo bandʉ itolo, bakabagɨla ʉkʉpoka.
4 Ʉmundʉ bo afwile, ikʉgomokela kʉ lʉfumbɨ,
iisikʉ lɨlalɨla ɨsi aasibaatiike syosa sikʉmalɨka.
5 Asajiigwe ʉjʉ ʉntʉʉli gwake jo Kyala gwa Jaakobo,
ʉjʉ ikʉnsʉʉbɨla ɄNTWA Kyala gwake.
6 Ʉjʉ aapelile ʉmpaalanga nɨ kiisʉ,
nɨ nyanja, na fyosa ɨfi filimo ʉmo.a
Ikʉlwɨmɨka ʉlʉfingo lwake bwila na bwila.
7 Ikʉbanosya pabʉlongi aba bikʉboneligwa.
ɄNTWA ikʉbapa abaa njala ɨfindʉ,
ikʉbaabʉla aba bapinyiigwe.
8 ɄNTWA ikʉbiigʉla amaaso abafwa maaso,
ɄNTWA ikʉbiinʉla aba biinamiile paasi,
abaganile abandʉ abagolofu.
9 ɄNTWA ikʉbalɨndɨlɨla abaheesya,
ikʉbatʉʉla abapɨɨna na bafwɨle,
looli ikʉsyonanga ɨnjɨla sya batʉlanongwa.
10 ɄNTWA ikʉlagɨla bwila na bwila.
Ʉmwe mwe bandʉ baa mu Syoni,
Kyala gwɨnu ikʉlagɨla mu sopelo syosa.
Muntuufyege ɄNTWA!