Ʉbʉkʉlʉmba bwa ipyana lya Kyala
Ʉlwɨmbo lwa lʉtuufyo ʉlwa Ndaabɨti.
145
Gwe Kyala gwangʉ gwe Malafyale, ngʉkʉtuufyaga,ngʉjɨpaalaga ɨngamu jaako bwila na bwila.
2 Kʉkʉtɨ isikʉ ngʉkʉtuufyaga,
ngʉjɨpaalaga ɨngamu jaako bwila na bwila.
3 ɄNTWA jo nkʉlʉmba, abagiisye ʉkʉtuufigwa fiijo,
ʉbʉkʉlʉmba bwake najʉmo akabagɨla ʉkʉbwagania.
4 Gwe Ntwa, abandʉ abaa mu sopelo syosa,
ɨmbombo syako ɨngʉlʉmba bikʉsituufyaga,
ɨmbombo syako ɨngʉlʉmba bikʉsifumusyaga.
5 Ngʉsijobaga ɨsya bʉsisya nʉ lwɨmɨko lwako,
ɨmbombo syako ɨsya kʉswigɨsya ngʉsiinogonaga.
6 Abandʉ bikʉsifumusyaga ɨmbombo syako ɨsisya,
ʉne ngʉbʉfumusyaga ʉbʉkʉlʉmba bwako.
7 Bikʉbʉpangaga ʉbooloolo bwako ʉbwingi,
bikʉsekela ɨsya bʉgolofu bwako.
8 ɄNTWA gwa kɨsa ni ipyana,
akaja mwengo ʉkʉkalala, gwa ipyana fiijo.
9 ɄNTWA mooloolo kʉ bandʉ boosa,
alɨ nɨ kɨsa kʉ fipeligwa fyake fyosa.
10 Gwe NTWA, ɨfipeligwa fyako fyosa fikwisa kʉkʉtuufyaga,
abiikemo baako bikwisa kʉkʉpaalaga.
11 Bikwisa kʉjobaga ɨsya bʉsisya ʉbwa bʉtwa bwako,
nʉ kʉfumusya ɨsya maka gaako amakʉlʉmba,
12 ʉkʉtɨ kʉkʉtɨ mundʉ asimanye ɨmbombo syako ɨngʉlʉmba,
nʉ bʉsisya bwa bʉnyafyale bwako.
13 Ʉbʉnyafyale bwako bʉtwa bwa bwila na bwila,
ʉbʉlagɨli bwako bwa mu sopelo syosa.
ɄNTWA ngolofu mmasyʉ gaake goosa,
kangɨ gwa ipyana kʉlɨ syosa ɨsi ikʉbomba.
14 ɄNTWA ikʉbɨɨmɨka boosa aba bikʉgwa,
ikʉbiinʉla boosa aba biinamiile paasi.
15 Amaaso gaa bandʉ boosa gikʉkʉkeeta ʉgwe,
jo ʉgwe kʉbapa ɨfindʉ pakabalɨlo kaake.
16 Ɨkɨboko kyako kikʉpa kʉ booloolo,
kʉkʉtɨ kɨpeligwa kʉkiikʉtɨsya ɨfi kikʉlonda.
17 ɄNTWA ngolofu mu njɨla syake syosa,
kangɨ gwa kɨsa mu mbombo syake syosa.
18 ɄNTWA alɨ kɨfuki kʉlɨ boosa aba bikʉnkoolela,
boosa aba bikʉmmbɨlɨkɨla mbwanalooli.
19 Ikʉbiikʉtɨsya aba bikʉntiila,
ikʉpɨlɨka ɨnguuto jaabo nʉ kʉbapoka.
20 ɄNTWA ikʉbalɨndɨlɨla boosa aba bannganile,
looli abatʉlanongwa boosa ikwisa kʉbapyuta.
21 Ngʉntuufyaga bwila ɄNTWA,
ɨfipeligwa fyosa fijɨtuufyege ɨngamu jaake ɨnyiikemo,
bwila na bwila.