Ʉkʉgwa ʉlʉpi kʉ bʉtoli
Ʉlwɨmbo ʉlwa Ndaabɨti.
144
Atuufigwege ɄNTWA, jo lwalabwe lwangʉ,ikʉgamanyisya amaboko gangʉ ʉbwite,
nɨ nyoobe syangʉ ʉkʉlwa.
2 Jo mmanyaani gwangʉ, kangɨ ilinga lyangʉ,
mbanda jangʉ, kangɨ mpoki gwangʉ.
Ʉmwene jo ngʉlʉ jangʉ, kʉmyake bo bʉponelo bwangʉ,
ikʉfitola ɨfikolo nʉ kʉfibɨɨka paasi pamyangʉ.
3 Gwe NTWA, ʉmundʉ jo jwani apa kʉmpaasya?
Ʉmundʉ kandʉ nki apa kʉmmwinogona?
4 Ʉmundʉ alɨ bo ʉlwa mʉʉji itolo,
amasikʉ gaake galɨ bo ʉlwa nsyʉngʉʉlʉ ʉgʉ gukʉkɨnda.
5 Gwe NTWA, ʉkʉbalʉle kʉmwanya kwako, ʉsuluke paasi.
Ʉfipalamaasye ɨfyamba, fyope fifuukege ɨlyosi.
6 Ʉjɨtʉme ɨnjasi jaako jɨtajanikege,
jɨbanyambanie abalʉgʉ baako,
ʉtonolege ɨmitipʉlo gyako, ʉbakage.
7 Ʉgolosye amaboko gaako ʉkʉfuma kʉmwanya,
ʉmboke, ʉʉsoosyemo mmɨɨsi amingi,
ʉʉsoosyemo mmaboko gaa bapanja,
8 aba bikʉjoba ɨsya bʉtʉngʉlʉ,
aba bikʉtʉngʉlʉpa bo bikʉlapa.
9 Gwe Kyala, angʉkwɨmbɨlaga ʉlwɨmbo ʉlʉpya,
angʉkwɨmbɨlaga nɨ kɨsango ɨkya mbote kalongo.
10 Gwe kʉbapa abanyafyale ʉbʉtoli,
gwe kʉmpoka Ndaabɨti ʉmbombeli gwako.
ʉʉsoosyemo mmaboko gaa bapanja,
aba bikʉjoba ɨsya bʉtʉngʉlʉ,
aba bikʉtʉngʉlʉpa bo bikʉlapa.
12 Abaanɨɨtʉ abalʉmyana mbʉtubwa bwabo,
bajege bo ɨfibyaligwa ɨfi fikʉbɨla.
Abalɨndwana bajege bo ɨmbanda,
ɨsi abandʉ bikʉjengela ɨkɨtangaalala.
13 Ɨndamba syɨtʉ siisʉlege ɨfindʉ ɨfya lʉko nʉ lʉko,
ɨngʼoosi syɨtʉ sibɨɨkege ɨbaana baelʉfu na baelʉfu mmigʉnda gyɨtʉ,
14 ɨngʼombe syɨtʉ sipɨmbege ʉntondolo ʉmwingi.
Abalʉgʉ balɨngapangʉlaga amamato gɨɨtʉ,
balɨngatʉkolaga ʉkʉja batʉmwa,
jɨlɨngajangamo ɨnguuto ntwaja twɨtʉ.
15 Basajiigwe abandʉ aba balɨ bo ʉlo.
Basajiigwe aba ɄNTWA jo Kyala gwabo.