Ʉlwipuuto lwa kʉpokigwa mbʉtolwe
Ʉlwɨmbo lwa Ndaabɨti.
143
Gwe NTWA, ʉpɨlɨke ʉlwipuuto lwangʉ,ʉpɨlɨke ʉkʉpyelesya kwangʉ.
Namanga ʉgwe ʉlɨ ngolofu,
ʉʉnyaamule mbwanalooli bwako.
2 Ʉngaandongaga ne mbombeli gwako,
namanga kʉmyako akajako ʉmʉʉmi ʉngolofu.
3 Abalʉgʉ bangʉ bikʉngonga,
bandikeenie loosa paasi,
bandʉʉgeesye mu ngiisi ngatɨ mundʉ ʉjʉ aafwile liijolo.
4 Ʉmoojo gwangʉ goonywike amaka loosa,
ɨndumbula jangʉ jɨnyomwike.
5 Ngʉgakʉmbʉka amasikʉ agaa ijolo,
ngʉsiinogona ɨmbombo syako syosa,
ngwinogona ɨmbombo sya maboko gaako.
6 Ngwinʉla amaboko gangʉ kʉmyako bo ngwipuuta,
ngʉkʉnyonywa, nʉʉmiilwe ngatɨ kiisʉ ɨkyʉmu ɨkɨ kikʉlonda amɨɨsi. Sela
7 Gwe NTWA, ʉʉnyaamule mbɨmbɨbɨ,
namanga noonywike amaka loosa.
Ʉlɨngiifisaga nʉ kʉja patali na niine,
ndɨngajaga bo ʉlwa aba bikʉsuluka kʉ bʉsyʉka.
8 Nʉlʉbʉnjʉ ʉʉnangɨsye iipyana lyako,
namanga ngʉkʉsʉʉbɨla ʉgwe.
Ʉʉmanyisyege ɨnjɨla jaa kwendamo ʉne,
namanga ngʉkʉsʉʉbɨla ʉgwe.
9 Gwe NTWA, ʉmboke kʉ balʉgʉ bangʉ,
ngʉbopela kʉmyako ʉʉfise.
10 Ʉʉmanyisye ʉkʉbomba ɨsya bwigane bwako,
namanga ʉgwe gwe Kyala gwangʉ.
Mbepo gwako ʉnnunu aandongosyege,
mu njɨla ɨnunu.
11 Gwe NTWA, kʉnongwa jaa ngamu jaako ʉʉndɨndɨlɨle,
kʉ bʉgolofu bwako ʉʉsoosyemo mbʉtolwe.
12 Kwi ipyana lyako ʉbamale abalʉgʉ bangʉ boosa,
ʉbapyute loosa aba bikʉʉmbonela,
namanga ʉne ndɨ mbombeli gwako.