Ʉlwipuuto lwa kʉsʉʉma ʉbʉtʉʉli
Ʉlwɨmbo ʉlwa mahala ʉlwa Ndaabɨti. Ʉlwipuuto lwake bo alɨ mu mbako.a
142
Ngʉnndɨlɨla ɄNTWA ni isyʉ lyangʉ,
ngʉmpyelesya ɄNTWA, ambaakɨsye.
2 Ngʉtwala nkyeni mmyake syosa ɨsi ngwilʉmbʉʉsya,
ngʉmmbʉʉla ʉbʉtolwe bwangʉ boosa.
 
3 Ɨndumbula jangʉ bo joonywike amaka,
ʉgwe kʉsimanya ɨnjɨla syangʉ.
Mu njɨla ɨjɨ ngwendamo,
abalʉgʉ bategile ɨmitego.
4 Bo ngʉkelengania kʉno na kʉno,
ngwaga akajapo najʉmo ʉgwa kʉndʉʉla.
Ngaja nʉ bʉponelo,
akajako ʉjʉ ikʉbʉpaasya ʉbʉʉmi bwangʉ.
 
5 Gwe NTWA, ngʉkʉlɨlɨla ngʉtɨ,
“Ʉgwe ʉlɨ bʉbopelo bwangʉ,
ʉgwe ʉʉfwene mbʉʉmi bwangʉ.”
 
6 Ʉpɨlɨke ɨnguuto jangʉ,
ngaja nʉ bʉtʉʉli nabʉmo.
Ʉmboke kʉlɨ aba bikʉngaga,
namanga bangɨndile amaka.
7 Ʉʉsoosyemo mu nnyololo,
ʉkʉtɨ ngʉgwɨlege ʉlʉpi,
po abagolofu bikwisa kʉʉsyʉngʉʉtɨla ʉne,
paapo kʉʉmbombela ɨnunu.