Ʉlwipuuto lwa namajolo
Ʉlwɨmbo lwa Ndaabɨti.
141
Gwe NTWA, ngʉkʉkoolela,ʉkʉʉjege ʉndʉʉle,
ʉpɨlɨke iisyʉ lyangʉ bo ngʉkʉbɨlɨkɨla.
2 Ʉlwambɨlɨle ʉlwipuuto lwangʉ,
lʉjege bo ʉlwa lʉbani nkyeni mmyako.
Amaboko gangʉ aga niinwile,
gafwanege bo ʉlwa ikemo ɨlya namajolo.
3 Gwe NTWA, ʉkalɨndɨlɨle akanwa kangʉ,
ʉbɨɨke ʉbʉlɨndɨlɨli pa ndomo gwangʉ.
4 Ʉjɨsigɨle ɨndumbula jangʉ ʉkʉbomba ʉbʉtʉlanongwa,
ndɨngabombaga ɨmbombo ɨmbiibi,
ndɨngajaga pamopeene na batʉlanongwa,
ndɨngalyangamo sikʉ ɨfindʉ fya pa lʉsekelo lwabo.
5 Kʉnunu abagolofu ʉkʉʉsoka nʉ kʉngemela,
looli ndikwitɨka sikʉ ʉkʉtuufigwa na babiibi,
namanga ngwipuuta fiijo,
ʉkʉsipɨnga ɨmbiibi syabo ɨsi bikʉbomba.
6 Abalagɨli baabo bo bagwɨsiigwe pa lwalabwe,
po aabikʉsyagania ʉkʉtɨ amasyʉ gangʉ gaa nalooli.
7 Ɨfifupa fyɨtʉ fikwisa kʉbalanilaga pa kɨfigo kya kʉ bʉsyʉka,
bo ʉlwa mbabʉ ɨsi basitumuleenie, sibalaniile pakiisʉ!
8 Looli ʉne ngʉkʉsʉʉbɨla ʉgwe,
gwe NTWA Kyala gwangʉ.
Ngʉbopela ʉbʉlɨndɨlɨli bwako,
ʉlɨngaandeka ʉkʉtɨ mfwege.
9 Ʉʉndɨndɨlɨle kʉ ntego ʉgʉ bandegile ʉne,
na kʉ ndambo ɨsya bandʉ ababiibi.
10 Ababiibi bakoligwe nɨ nyeelo syabo baabo,
bo ʉne ngwenda kanunu, mbonile.