Ʉlwipuuto lwa kʉsʉʉma ʉbʉlɨndɨlɨli
Kʉ mpaali gwa lwɨmbo. Ʉlwɨmbo ʉlwa Ndaabɨti.
140
Gwe NTWA, ʉmboke kʉ bandʉ ababiibi,ʉʉndɨndɨlɨle kʉ bandʉ abagaasi,
2 aba bikwinogona ʉkʉbomba ɨmbiibi,
bikʉpasyʉla ʉbwite akabalɨlo koosa.
3 Bapyasiisye ɨndɨmi syabo, nyʉʉgi bo ɨsya njoka.
Mmilomo gyabo sikʉsooka ɨnongwa ɨsya kʉgoga,
bo ʉlwa kʉlʉmigwa nɨ njoka ɨngogi.a Sela
4 Gwe NTWA, ʉʉndɨndɨlɨlege kʉ maboko agaa bandʉ ababiibi,
ʉʉnyʉʉbatɨle kʉ bandʉ abagaasi aba bikʉlonda ʉkʉʉngwɨsya.
5 Abaa matingo bategile ʉntego ʉgwa kʉngola ʉne,
abaniongafu bategile ʉlwelo mu njɨla jangʉ,
bategile ʉlʉtambo mu njɨla ʉkʉtɨ bangole. Sela
6 Ngʉmmbʉʉla ɄNTWA ngʉtɨ, “Ʉgwe gwe Kyala gwangʉ.”
Gwe NTWA, ʉpɨlɨke ɨnguuto jangʉ, ʉmbaakɨsye.
7 Gwe NTWA gwe Kyala gwangʉ,
gwe mpoki gwangʉ, gwe gwa maka,
kʉngupɨkɨla ʉntʉ gwangʉ pi isikʉ ɨlya bwite.
8 Gwe NTWA, ʉlɨngabapaga abaniongafu ɨsi bikʉlonda,
ʉngasinosyaga ɨmbombo syabo ɨmbiibi. Sela
9 Abalʉgʉ bangʉ balɨ na maka, baasyʉngʉʉtiile,
ɨmbiibi ɨsi bikʉlonda ʉkʉʉmbombela, sibagomokelege baabo.
10 Amakala gaa mooto gabagwɨlege,
bataagigwe mfiina, balɨngiinʉkaga kangɨ.
11 Aba bikʉbaheeha abangɨ, balɨnganogaga nkiisʉ,
ʉlʉpyuto lʉbaage abagaasi.
12 Mmeenye ʉkʉtɨ ɄNTWA Kyala,
ikʉbɨɨmɨla aboonywa pabʉlongi,
abalondo ikʉbanosya kʉ bʉgolofu.
13 Nalooli abagolofu bikʉjɨtuufyaga ɨngamu jaako,
bikʉtʉʉgalaga apa ʉlipo ʉgwe.