Kyala asimeenye syosa, ikʉlongosya syosa
Kʉ mpaali gwa lwɨmbo. Ʉlwɨmbo ʉlwa Ndaabɨti.
139
Gwe NTWA ʉʉnyeeneesiisye,kangɨ ʉʉmeenye ʉne.
2 Ʉkʉmeenye ʉkʉtʉʉgala nʉ kwɨma kwangʉ,
ʉsimanyiile kʉbʉtali syosa ɨsi ngwinogona.
3 Ʉkʉmeenye ʉkwenda nʉ kʉlambalala kwangʉ,
ʉsimeenye ɨmbombo syangʉ syosa.
4 Bo ngaalɨ ʉkʉjoba iisyʉ nalɨmo,
ʉgwe gwe NTWA, kʉsimanya syosa ɨsi ngʉja pakʉjoba.
5 Ʉʉsyʉngʉʉtiile nkyeni na kʉnyuma,
kʉʉndɨndɨlɨla na maka gaako.
6 Amahala gaako gaa kʉswigɨsya fiijo kʉmyangʉ,
gaa pamwanya fiijo, ngabagɨla ʉkʉgaagania.
7 Mbʉʉke kʉʉgʉ ʉkʉtɨ ngwepʉke ʉgwe?
Mbopele kʉʉgʉ kʉno ʉgwe ʉkajako?
8 Na apa lɨnga mfyʉkile kʉmwanya, ʉgwe ʉliko,
lɨnga ndambaleele kʉ bʉsyʉka, koope ʉgwe ʉliko.
9 Lɨnga ngʉpululuka mpaka kʉbʉsookelo,
pamo ʉkwakʉtʉʉgala kʉbʉjongelo,
10 koope ʉko ʉliko, kʉʉndongosyaga nɨ kɨboko kyako,
ɨkɨboko kyako ɨkiilɨɨlo kikʉngola ʉne.
11 Lɨnga ngʉtɨ, “Ɨngiisi jɨɨfise,
nʉ lʉmuli ʉlʉ lʉʉsyʉngʉʉtiile lʉsanuke ʉkʉja kɨlo,”
12 ɨngiisi joope jɨtikʉkʉfisa nafimo,
pakɨlo pikʉmulɨka bo ʉlwa pamuusi,
ɨngiisi nʉ lʉmuli kʉmyako fifwene itolo.
13 Jo ʉgwe gwapelile ɨndumbula jangʉ,
bo ndɨ munda mwa jʉʉba.
14 Ngʉkʉtuufya paapo ʉmbelile,
kʉ njɨla jaa kɨswigo ɨkɨsisya.
Ɨmbombo syako sya kʉswigɨsya,
ʉgwe ʉʉmeenye fiijo ʉne.
15 Bo fikʉpeligwa ɨfifupa fyangʉ, fikaaliibɨɨliile kʉmyako,
bo ngʉbʉmbigwa kʉbʉtiitʉ,
bo gʉʉndʉngɨseenie kʉ bʉmangʼanyi munda mwa jʉʉba.
16 Ʉgwe gwalɨɨmbwene bo ngaalɨ ʉkʉpaapigwa.
Amasikʉ gangʉ gwagabaatiike,
nʉ kʉgasimba mwa kalata gwako,
bo lɨkaalɨ ʉkʉjako iisikʉ nalɨmo.
17 Gwe Kyala, ɨsi kwinogona sya pamwanya fiijo ʉkʉngɨnda ʉne,
ngabagɨla ʉkʉsyagania.
18 Lɨnga naasibalaga ngalɨ nyingi ʉkʉkɨnda ʉnsanga.
Bo ndembwike, ngaalɨ ndɨ pamopeene na nungwe.
19 Gwe Kyala, ngʉnyonywa ʉkʉtɨ ʉbapyute abaniongafu,
abandʉ abagogi basookeko kʉmyangʉ.
20 Aba bikʉkʉtʉka ʉgwe,
bikʉjɨbombela kabiibi ɨngamu jaako.
21 Bʉle, gwe NTWA, ndɨngababengaga aba bikʉkʉbenga ʉgwe?
Ndɨngabasyokelaga aba bikʉkʉsambʉkɨla?
22 Abalʉgʉ baako balʉgʉ bangʉ niine,
mbabengile loosa.
23 Gwe Kyala, ʉʉnyeeneesye, ʉjɨmanye ɨndumbula jangʉ,
ʉʉngele, ʉsimanye ɨnyiinogono syangʉ.
24 Ʉngeete lɨnga bʉlimo ʉbʉnyali nkatɨ mmyangʉ,
ʉʉndongosyege mu njɨla ɨjaa bwila na bwila.