Ʉlwipuuto lwa kʉgwa ʉlʉpi
Ʉlwɨmbo ʉlwa Ndaabɨti.
138
Gwe NTWA, ngʉgwa ʉlʉpi nɨ ndumbula jangʉ joosa,ngʉkwɨmbɨlaga ɨnduufyo nkyeni mfipeligwa ɨfya kʉmwanya.
2 Bo ngwipuuta ngʉfugamaga ʉkʉkeeta kʉ tempeli jaako ɨnyiikemo,
ngʉjɨtuufyaga ɨngamu jaako,
kʉnongwa jaa ipyana lyako nʉ bwanalooli bwako.
Namanga ʉlwɨmiike ʉlʉfingo lwako,
nɨ ngamu jaako, pamwanya pa tʉndʉ toosa.
3 Bo ngʉlɨliile ʉgwe, gwalɨɨnyaamwile,
gwalɨngasiisye nʉ kʉmbapo amaka.
4 Gwe NTWA, abanyafyale boosa pakiisʉ bakʉtuufyege,
paapo bapɨliike amasyʉ gaako.
5 Bɨmbege ʉkʉsituufya ɨmbombo syako,
namanga ʉbʉsisya bwako bʉkʉlʉmba, gwe NTWA.
6 Na paapo ɄNTWA alɨ pamwanya,
ikʉbapaasya abafujufu,
ikʉbamanya ʉkʉfuma pabʉtali aba bikwijumbɨka.
7 Nalɨnga ndɨ mbʉtolwe,
ʉgwe kʉʉndɨndɨlɨla.
Nɨ kɨboko kyako ɨkiilɨɨlo kʉmboka,
kʉ balʉgʉ bangʉ aba bakaleele,
ɨkɨboko kyako ɨkiilɨɨlo kikʉmboka.
8 ɄNTWA aikʉʉmbombela syosa ɨsi aafingiile.
Gwe NTWA, iipyana lyako lya bwila na bwila,
ʉlɨngatwibwaga twe bandʉ baako.