Ɨnduufyo kʉ bʉsisya bwa Kyala ʉbʉkʉlʉmba
148
Muntuufyege ɄNTWA!Muntuufyege ɄNTWA ʉkʉfuma kʉmwanya,
mumpaalege pabʉjo ʉbwinʉfu.
2 Muntuufyege, mwe bandʉmi baake,
mumpaalege, mwe filʉndɨlo fyake fyosa.
3 Muntuufyege, gwe isʉba na gwe mwesi,
mumpaalege, mwe ndondwa syosa mwe mukʉlangala.
4 Muntuufyege, gwe mpaalanga gwe ʉlɨ kʉmwanya fiijo,
na mwe mɨɨsi mwe mulɨ kʉmwanya kʉ mpaalanga.
5 Fyosa fituufyege ɨngamu jaa NTWA,
namanga fyapeliigwe kʉ lʉlagɨlo lwake.
6 Ʉmwene aafipelile ʉkʉtɨ fijengeko bwila na bwila,
kʉ lʉlagɨlo ʉlʉ lʉkabagɨla ʉkwandʉka.
7 Muntuufyege ɄNTWA ʉkʉfuma nkiisʉ,
mwe fipeligwa fya mu nyanja na mmɨɨsi amasolofu.
8 Muntuufyege, gwe njasi, na gwe fula jaa mabwe, ɨngaala na mabɨngo,
na gwe mbelo ʉnkalɨ gwe kʉkula kʉ lʉlagɨlo lwake.
9 Muntuufyege, mwe fyamba na mwe twamba,
mwe mipiki ɨgɨ gikʉpa ɨseke, na mwe mipiki ɨmikafu.
10 Muntuufyege, mwe finyamaana ɨfya ndiisʉ, nɨ mitiimo,
ɨfi fikʉfilifindɨka, nɨ njʉni.
11 Muntuufyege, mwe banyafyale baa nkiisʉ nɨ fiisʉ fyosa,
mwe balongosi na balagɨli boosa pakiisʉ.
12 Muntuufyege, mwe balʉmyana na mwe balɨndwana,
mwe bakangale mwesa na mwe baana.
13 Mwesa mujɨtuufyege ɨngamu jaa NTWA,
namanga ɨngamu jaake jeene jo jaa kʉpaaligwa,
ʉbʉsisya bwake bʉlɨ pamwanya pakiisʉ na kʉmwanya.
14 Abapeele abandʉ baake amaka,
nʉ lwɨmɨko kʉ bandʉ baake boosa abagolofu,
aBanyaisilaɨli abakʉndwe baake.
Muntuufyege ɄNTWA!