Ɨnduufyo kwa Kyala
135
Muntuufyege ɄNTWA!Mujɨtuufyege ɨngamu jaa NTWA,
namuntuufyege, ʉmwe mwe babombeli baake!
2 Ʉmwe mwe mukʉbomba mu nyumba jaa NTWA,
ndʉpaso lwa nyumba jaa Kyala gwɨtʉ!
3 Muntuufyege ɄNTWA paapo mooloolo,
mumpaalege nɨ nyɨmbo,
namanga ɨngamu jaake nunu.
4 Jo NTWA abasalile abaa ndʉjungu lwa Jaakobo,
na Isilaɨli, ʉkʉja bandʉ baake jʉʉjo.
5 Namanga mmeenye ʉkʉtɨ ɄNTWA nkʉlʉmba,
ʉNtwa gwɨtʉ nkʉlʉmba,
alɨ pamwanya pa gyabaakyala gyosa.
6 Syosa ɨsi sinkyeliile ɄNTWA ikʉbomba,
mu mpaalanga na pakiisʉ,
mu nyanja na mbʉsolofu moosa.
7 Jo ʉjʉ ikʉtwala amabɨngo,
ʉkʉfuma kʉbʉmalɨɨkɨsyo bwa kiisʉ,
ikʉjɨtʉma ɨnjasi pamopeene nɨ fula,
ikʉtwala ʉmbelo ʉkʉfuma mbʉjo bwake.
8 Aabakomile nʉ kʉbagoga abaana baa kɨpanda abaa mu Misili,
abaa bandʉ nɨ finyamaana.a
9 Aatʉmile ɨfiika nɨ fiswigo,
kʉla nkiisʉ kya Misili,
kwa Falao na babombi baake boosa.b
10 Aafipyutile ɨfikolo fii fingi,
aabagogile abanyafyale abaa maka,
11 Sihoni ʉmalafyale gwa Baamoli,
na Ogu ʉmalafyale gwa Basyani,
nʉ bʉtwa boosa ʉbwa mu Kaanaani.c
12 Aalyegile ɨkiisʉ kyabo,
alɨnkʉbapa abandʉ baake,
ʉkʉja kɨlɨngo kya bandʉ baake Isilaɨli.
13 Gwe NTWA, ɨngamu jaako jaa bwila na bwila,
kwisa kʉkʉmbʉkigwaga nɨ sopelo syosa.
14 Namanga ɄNTWA ikwisa kʉbanosya abandʉ baake,
ikwisa kʉbapaakɨsya ababombeli baake.
15 Gyabaakyala ɨgya bapanja gɨbʉmbiigwe nɨ feesa nɨ sahabʉ,
gɨtendekesiigwe na maboko gaa bandʉ.
16 Gɨlɨ nɨ milomo, looli gɨtikʉjoba,
gɨlɨ na maaso, looli gɨtikʉkeeta.
17 Gɨlɨ nɨ mbʉlʉkʉtʉ, looli gɨtikʉpɨlɨka,
kangɨ gɨkabagɨla ʉkʉtʉʉja.
18 Boosa aba bikʉgɨtendekesya bafwene nagyo,
kangɨ boosa aba bikʉgɨsʉʉbɨla.
19 Mwe Banyaisilaɨli,
muntuufyege ɄNTWA!
Mwe bapuuti mwe baa ndʉjungu lwa Aaloni,
muntuufyege ɄNTWA!
20 Mwe Banyaleebi,
muntuufyege ɄNTWA!
Ʉmwe mwe mukʉntiila,
muntuufyege ɄNTWA!
21 Atuufigwege ɄNTWA ʉkʉfuma mu Syoni,
atuufigwege mbʉjo bwake mu Jelusalemu!
Muntuufyege ɄNTWA!