Kyala jo bʉtʉʉli kangɨ ngʉlʉ
115
Gwe NTWA, somma ʉswe, somma ʉswe,looli ʉgwe gwimwene gwe ʉtuufigwege,
kʉnongwa jaa ipyana nʉ bwanalooli bwako.
2 Fiki ɨfikolo fya nkiisʉ fikʉtɨ,
“Kyala gwabo alɨ kʉʉgʉ?”
3 Kyala gwɨtʉ alɨ kʉmwanya,
ikʉbomba syosa ɨsi sinkyeliile ʉmwene.
4 Gyabaakyala gyabo gɨbʉmbiigwe nɨ feesa nɨ sahabʉ,
gɨtendekesiigwe na maboko gaa bandʉ.
5 Gɨlɨ nɨ milomo, looli gɨtikʉjoba,
gɨlɨ na maaso, looli gɨtikʉkeeta.
6 Gɨlɨ nɨ mbʉlʉkʉtʉ, looli gɨtikʉpɨlɨka,
gɨlɨ nɨ mbulo, looli gɨtikʉnuusya.
7 Gɨlɨ na maboko, looli gɨtikʉpalamaasya,
gɨlɨ na malʉndɨ, looli gɨtikwenda,
ɨngolomilo syabo sitikʉsoosya iisyʉ.
8 Boosa aba bikʉgɨtendekesya bafwene nagyo,
kangɨ boosa aba bikʉgɨsʉʉbɨla.a
9 Mwe Banyaisilaɨli, munsʉʉbɨlege ɄNTWA,
jo bʉtʉʉli bwɨnu, kangɨ jo ngʉlʉ jɨɨnu.
10 Mwe bapuuti mwe baa ndʉjungu lwa Aaloni,
munsʉʉbɨlege ɄNTWA,
jo bʉtʉʉli bwɨnu, kangɨ jo ngʉlʉ jɨɨnu.
11 Ʉmwe mwe mukʉntiila ɄNTWA, munsʉʉbɨlege ɄNTWA,
jo bʉtʉʉli bwɨnu, kangɨ jo ngʉlʉ jɨɨnu.
12 ɄNTWA ikʉtʉkʉmbʉka, ikwisa kʉtʉsaja,
ikwisa kʉbasaja aBanyaisilaɨli,
ikwisa kʉbasaja abaa ndʉjungu ʉlwa Aaloni.
13 ɄNTWA ikwisa kʉbasaja aba bikʉntiila,
abafujufu na bɨɨmɨkigwa.
14 ɄNTWA ababaasyege mujege bingi,
ʉmwe na baanɨɨnu mongelelege.
15 Musajigwege nʉ NTWA,
ʉjʉ aapelile ʉmpaalanga nɨ kiisʉ.
16 Kʉmwanya kʉ mpaalanga kwa NTWA,
looli pakiisʉ abapeele abandʉ.
17 Abafwe batikʉntuufya ɄNTWA,
pamo aba babʉʉkile kʉ bʉsyʉka.
18 Looli tukʉntuufya ɄNTWA,
ʉkwandɨla ʉlʉ na bwila na bwila.
Muntuufyege ɄNTWA!