Ʉjʉ apokiigwe mbʉfwe ikʉgwa ʉlʉpi kwa Kyala
116
Nʉnnganile ɄNTWA, namanga apɨliike,apɨliike bo ngʉkuuta ʉkʉsʉʉma ʉbʉtʉʉli.
2 Paapo ategile ɨmbʉlʉkʉtʉ syake,
po ngʉnsʉʉmaga akabalɨlo koosa mbʉʉmi bwangʉ.
3 Ɨngoje sya bʉfwe syalɨɨsyʉngʉʉtiile,
ʉkʉtiila kʉ bʉsyʉka kwalɨɨnyaagile,
naakoliigwe nɨ ngʉbɨlo nʉ bʉsulumanie.
4 Po ndɨnkʉnkoolela ɄNTWA ndɨnkʉtɨ,
“Gwe NTWA, mbelile ʉmboke!”
5 ɄNTWA gwa ipyana kangɨ ngolofu,
Kyala gwɨtʉ gwa kɨsa.
6 ɄNTWA ikʉbalɨndɨlɨla aboonywa,
bo ngʉboneligwa, aalɨmbokile.
7 Gwe moojo gwangʉ, ʉje nʉ lʉtengaano,
namanga ɄNTWA akʉbombiile ɨnunu.
8 Namanga ʉmwene ambokile mbʉfwe,
apyagɨɨsiisye amaasosi mmaaso gangʉ,
aandɨndɨliile ʉkʉtɨ ndɨngagwa,
9 ʉkʉtɨ nendege nkyeni mu NTWA,
nkiisʉ kya aba balɨ kʉ bʉʉmi.
10 Naalɨ nʉ lwitɨko apa naatɨgɨ,
“Ʉne ngʉkʉbɨlwa fiijo.”
11 Naajobile bo ndɨ nʉ lʉtende, naatile,
“Abandʉ boosa basyobi.”
12 Nʉnngomokesye ɨfiki ɄNTWA,
kʉ booloolo bwake ʉbʉ aambombiile?
13 Ngoona ɨkɨkombe ɨkya finga ʉkʉja ikemo,
ʉkʉnngwɨla ʉlʉpi ɄNTWA kʉnongwa jaa kʉmboka ʉne.
14 Ngʉsibombaga ɨsi naafingile kʉ NTWA,
nkyeni mmbandʉ baake boosa.
15 ɄNTWA ikʉbwɨmɨka fiijo,
ʉbʉfwe ʉbwa bakʉndwe baake.
16 Gwe NTWA, nalooli ʉne ndɨ mbombeli gwako,
ndɨ mbombeli gwako, joope jʉʉba aalɨ mbombeli gwako.
Ʉʉnyaabwile ʉnnyololo.
17 Ngʉnsookesyaga iikemo ɨlya kʉnngwɨla ʉlʉpi,
nʉ kʉjɨkoolela ɨngamu jaa NTWA.
18 Ngʉsibombaga ɨsi naafingile kʉ NTWA,
nkyeni mmbandʉ baake boosa,
19 aba babʉngeene mu tempeli jaake,
mu Jelusalemu.
Muntuufyege ɄNTWA!