Ɨsabʉli 127

ɄNTWA mwene jo abagiile ʉkʉjenga ɨnyumba

Ʉlwɨmbo ʉlwa kʉfyʉka ʉlwa Solomoni.

ɄNTWA lɨnga akajenga ɨnyumba,

aba bikʉjenga bikʉbomba ɨmbombo jaa itolo.

ɄNTWA lɨnga atikʉkalɨndɨlɨla akaaja,

abalɨndɨlɨli bikwikatasya itolo.

2 Mukwikatasya itolo ʉkʉlaabɨla nʉlʉbʉnjʉ,

nʉ kʉkaabɨla nkʉlambalala.

Mukwitaamya ʉkʉlonda ɨfindʉ,

ʉmwene ikʉbapa abakʉndwe baake ʉtʉlo.

3 Keeta, abaana kyo kɨlɨngo ɨkɨ ɄNTWA ikʉtʉpa,

kɨkʉngɨlwa ɨkɨ kikʉfuma kʉmyake.

4 Abaana aba bapaapiigwe na bapaapi baabo mbʉtubwa,

balɨ bo ʉlwa mitipʉlo ɨgɨ gɨlɨ mmaboko gaa ndwabwite.

5 Asajiigwe ʉjʉ Kyala ikʉmmwisʉkɨsya ɨmitipʉlo ɨmingi,

atikwisa kʉtoligwa bo aaganiile nʉ ndʉgʉ gwake pabʉlongi.