Ʉlwɨmbo lwa kʉkapaala akaaja kaa Jelusalemu
Ʉlwɨmbo ʉlwa kʉfyʉka ʉlwa Ndaabɨti.
122
Naasekiile bo baambʉʉlile ʉkʉtɨ,“Tʉbʉʉke kʉ nyumba jaa NTWA.”
2 Lɨɨlɨno ʉlʉ tʉlipo twɨmile,
nkatɨ ndʉpaso lwako, gwe Jelusalemu.
3 Akaaja kaa Jelusalemu kaajengiigwe,
ʉkʉtɨ kajege kaaja aka kiikamandeenie kanunu.
4 Ko kʉno ɨfikolo fya NTWA fikʉbʉʉka,
bo muno gwabalagɨliile aBanyaisilaɨli,
ʉkʉbʉʉka kʉkʉgwa ʉlʉpi kʉ NTWA.
5 Namanga ʉmo fibɨɨkiigwe ɨfikota fya bʉlongi,
ɨfikota fya banyafyale abaa ndʉjungu ʉlwa Ndaabɨti.
6 Mukiipuutɨlege akaaja akaa mu Jelusalemu kajege nʉ lʉtengaano,
aba bakaganile, basajigwege.
7 Ʉlʉtengaano lʉjengemo nkatɨ mmamato gaako,
abandʉ aba balimo nkatɨ mmalinga gaako banogege.
8 Kʉnongwa jaa bakamu bangʉ na bamanyaani bangʉ,
ngʉtɨgɨ, “Ʉlʉtengaano lʉjege na nungwe.”
9 Kʉnongwa jaa nyumba jaa NTWA, Kyala gwɨtʉ,
ngʉkwipuutɨlaga ɨnunu.