Ʉlʉlagɨlo lwa NTWA
Ʉkʉmanyila ʉlʉlagɨlo lwa NTWA
119
Basajiigwe aba bakaja na kababye nakamo,aba bikwenda ndʉlagɨlo lwa NTWA.
2 Basajiigwe aba bikʉsikola ɨmanyisyo syake,
aba bikʉnndonda nɨ ndumbula joosa,
3 aba batikʉbomba ɨmbiibi nasimo,
looli bwila bikʉsikonga ɨnjɨla syake.
4 Gwe NTWA, ʉtʉpeele ɨmbaatɨko syako,
ʉkʉtɨ tʉsikolege nɨ ndumbula joosa.
5 Bʉno lɨnga akajɨɨlo kangʉ kaajaga kanunu,
nkʉsikonga ɨndagɨlo syako.
6 Po ʉne ndikwisa kʉsʉʉkaga,
bo ngʉsyɨmɨka ɨngomeelesyo syako syosa.
7 Angʉkʉtuufyaga nɨ ndumbula jangʉ joosa,
bo ngwaga kʉtumula kʉ bwanalooli.
8 Ngʉsikongaga ɨndagɨlo syako,
ʉlɨngaandekaga loosa.
Ʉkʉlʉkonga ʉlʉlagɨlo lwa NTWA
9 Ʉntubwa abombe bʉleebʉle ʉkʉjɨtendekesya ɨnjɨla jaake?
Akʉtiilege nʉ kʉlɨkonga iisyʉ lyako.
10 Ngʉkʉlonda nɨ ndumbula jangʉ joosa,
ʉjege na niine ndɨngakilania ɨngomeelesyo syako.
11 Amasyʉ gaako ngabɨɨkile mu ndumbula jangʉ,
ʉkʉtɨ ndɨngakʉbombelaga ɨmbiibi.
12 Gwe NTWA, ʉtuufigwege,
ʉʉmanyisyege ɨndagɨlo syako.
13 Ngʉsifumusyaga nʉ ndomo gwangʉ,
ɨsi kʉtumula na kanwa kaako.
14 Ngʉsekela fiijo ɨnjɨla jaa manyisyo syako,
ʉkʉkɨnda ʉkʉja nɨ kyʉma kingi.
15 Ngʉsiinogona ɨmbaatɨko syako,
nʉ kʉsikeeta ɨnjɨla syako.
16 Ngwikyela fiijo nɨ ndagɨlo syako,
ndikʉgiibwaga amasyʉ gaako.
Ʉlʉsekelo mu ndagɨlo sya NTWA
17 Ʉʉmbombelege ɨnunu ne mbombeli gwako,
ʉkʉtɨ njeko kʉ bʉʉmi ndɨkolege iisyʉ lyako.
18 Ʉʉnyiigʉle amaaso gangʉ ʉkʉtɨ nsibonege,
ɨsya kʉswigɨsya ndʉlagɨlo lwako.
19 Ʉne ndɨ nheesya pakiisʉ,
ʉlɨngaafisaga ɨngomeelesyo syako.
20 Ɨndumbula jangʉ jikʉpya kʉnongwa jaa kʉsinyonywa,
ɨsi kʉtumula akabalɨlo koosa.
21 Ʉgwe kʉbakemela abaa matingo,
baguniigwe aba batikʉsikonga ɨngomeelesyo syako.
22 Ʉʉnyeepʉsye na maheelu nʉ kʉʉnyoobela kwabo,
namanga ngʉsikonga ɨmanyisyo syako.
23 Na paapo abalagɨli bikʉbaatɨka ʉkʉʉmbombela kabiibi,
looli ne mbombeli gwako ngʉsiinogonaga ɨndagɨlo syako.
24 Ɨmanyisyo syako lo lʉsekelo lwangʉ.
Sikʉʉndongosya kanunu.
Ʉkʉtumula ʉkʉsikonga ɨndagɨlo sya NTWA
25 Ndambaleele ndʉfumbɨ,
ʉmbepo ʉbʉʉmi kangɨ bo muno gwafingiile.
26 Naalaatile syosa ɨsi naabombile, ʉʉnyaamwile,
ʉʉmanyisye ɨndagɨlo syako.
27 Ʉʉmanyisye muno mbagiile ʉkʉsyagania ɨmbaatɨko syako,
ʉkʉtɨ nsiinogonege ɨmbombo syako ɨsya kʉswigɨsya.
28 Ɨndumbula jangʉ jengwike kʉ bʉsulumanie,
ʉngasyege ʉkʉkongana ni isyʉ lyako.
29 Ʉʉnyeepʉsye mu njɨla sya bʉsyobi,
kwi ipyana lyako ʉʉmanyisye ʉlʉlagɨlo lwako.
30 Nsalile ɨnjɨla ɨjaa bwanalooli,
nɨ ndumbula jangʉ joosa nsikolile ɨsi ʉtumwile.
31 Nsyʉmɨɨliile ɨmanyisyo syako,
gwe NTWA, ndɨngasʉʉka.
32 Ngʉbopela mu njɨla ɨjaa ngomeelesyo syako,
paapo kʉmbapo amahala agaa kʉsyagania.
Ʉlwipuuto ʉlwa kʉsʉʉma ʉkʉsyagania
33 Gwe NTWA, ʉʉmanyisye ɨnjɨla ɨsya ndagɨlo syako,
ʉkʉtɨ nsikolege mpaka kʉmmalɨɨkɨsyo.
34 Ʉmbepo ʉkʉsyagania ʉkʉtɨ ndʉkolege ʉlʉlagɨlo lwako,
nʉ kʉlʉkonga nɨ ndumbula jangʉ joosa.
35 Ʉʉndongosyege mu njɨla ɨjaa ngomeelesyo syako,
namanga ngwikyela nasyo.
36 Ɨndumbula jangʉ ʉjɨlabɨsyege kʉ manyisyo syako,
jɨlɨngajaga kʉ finyonyo.
37 Ʉʉnyeepʉsye kʉ sya bʉkonyofu,
ʉʉsyʉsye mu njɨla jaako.
38 Ʉʉmbombele ne mbombeli gwako bo muno gwafingiile,
ʉlʉfingo ʉlʉ gwafingile kʉlɨ aba bikʉkʉtiila.
39 Nyaabʉla kʉ maheelu aga ngʉgatiila,
namanga kʉtumula kanunu.
40 Ngʉnyonywa fiijo ʉkʉsikonga ɨmbaatɨko syako,
ʉmbepo ʉbʉʉmi namanga ʉgwe ʉlɨ ngolofu.
Ʉkʉsʉʉbɨla ɨndagɨlo ɨsya NTWA
41 Gwe NTWA, iipyana lyako lɨɨnyiisɨlege ʉne,
ʉmbokege ʉkʉkongana nʉ lʉfingo lwako.
42 Po angʉbaamulaga aba bikʉndʉka,
namanga ngʉlɨsʉʉbɨla iisyʉ lyako.
43 Ʉndʉʉle njobege ʉbwanalooli bwako bwila,
namanga ngʉsʉʉbɨla ʉbʉtumuli bwako.
44 Ngʉlʉkongaga bwila ʉlʉlagɨlo lwako,
ngʉlʉkolaga bwila na bwila.
45 Po ʉne ngwendaga mbwabʉke,
namanga mmanyiile ɨmbaatɨko syako.
46 Ngʉsijobaga ɨmanyisyo syako nkyeni mbanyafyale,
ndikwisa kʉsʉʉkaga.
47 Namanga ngʉsekela fiijo ʉkʉsikonga ɨngomeelesyo syako,
ʉne nsiganile.
48 Ngʉsyɨmɨka nʉ kʉsigana ɨngomeelesyo syako,
ngʉsiinogonaga ɨndagɨlo syako.
Ʉkʉsʉʉbɨsigwa mu ngʉbɨlo
49 Ʉkʉmbʉke ɨsi gwafingile kʉlɨ ne mbombeli gwako,
ʉmbeele ʉlʉsʉʉbɨlo.
50 Nalɨnga ndɨ mu ngʉbɨlo, ngʉsʉʉbɨsigwa,
namanga ʉlʉfingo lwako lukʉmba ʉbʉʉmi.
51 Abaa matingo bikʉʉnyoobela bwila,
looli ʉne ndikʉsookamo ndʉlagɨlo lwako.
52 Bo ngʉbʉkʉmbʉka ʉbʉtumuli bwako ʉbwa ijolo,
gwe NTWA, ngʉsʉʉbɨsigwa.
53 Ngoliigwe nɨ ngalalɨsi ɨngalɨ kʉnongwa jaa babiibi,
aba balʉlekile ʉlʉlagɨlo lwako.
54 Ɨndagɨlo syako syo nyɨmbo syangʉ,
nnyumba jangʉ ɨjaa mbʉheesya.
55 Gwe NTWA, pakɨlo ngʉkʉkʉmbʉka ʉgwe,
nʉ kʉlʉkola ʉlʉlagɨlo lwako.
56 Ʉlʉ lo lʉsajo ʉlʉ lʉʉnyaagile,
paapo ngʉsikonga ɨmbaatɨko syako.
Ʉkwininga kʉ ndagɨlo sya NTWA
57 Gwe NTWA, ʉʉfwene,
mfingile ʉkʉgakonga amasyʉ gaako.
58 Ngʉsʉʉma ɨsajo syako nɨ ndumbula jangʉ joosa,
ʉʉmbombele kwi ipyana lyako ɨlɨ gwafingile.
59 Naasiinogwine ɨnjɨla syangʉ,
naagomwike, ʉlʉ ngʉsikonga ɨmanyisyo syako.
60 Ngʉbombaga mbɨbɨmbɨbɨ kɨsita kʉkaabɨla,
ʉkʉsikola ɨngomeelesyo syako.
61 Na paapo abaniongafu bategile ɨmitego ʉkʉtɨ bangole,
poope ndikwibwa ʉlʉlagɨlo lwako.
62 Pakɨlo pakatɨ ngʉsumuka pa kʉkʉgwɨla ʉlʉpi,
paapo kʉtumula kʉ bʉgolofu.
63 Ʉne ndɨ mmanyaani gwa boosa aba bikʉkʉtiila,
aba bikʉsyɨmɨka ɨmbaatɨko syako.
64 Gwe NTWA, ɨkiisʉ kiiswile iipyana lyako,
ʉʉmanyisyege ɨndagɨlo syako.
Ʉlʉlagɨlo lwa NTWA lukʉtʉʉla mu ngʉbɨlo
65 Gwe NTWA, ʉʉmbombiile ɨnunu ne mbombeli gwako,
ʉkʉkongana ni isyʉ lyako.
66 Ʉʉmanyisyege amahala nʉ bʉmanyi,
namanga ngʉsʉʉbɨla mu ngomeelesyo syako.
67 Bo ʉkaalɨ ʉkʉʉfunda, naasobaga ɨnjɨla,
looli lɨɨlɨno ngʉlɨkonga iisyʉ lyako.
68 Ʉgwe ʉlɨ nnunu, ɨsi kʉbomba nunu,
ʉʉmanyisyege ɨndagɨlo syako.
69 Na paapo abaa matingo baanjobiile ɨsya bʉtʉngʉlʉ,
poope ngʉsikongaga ɨmbaatɨko syako nɨ ndumbula joosa.
70 Ɨndumbula syabo siiswile ʉbʉkonyofu,
looli ʉne ngʉsekela ʉlʉlagɨlo lwako.
71 Kwalɨ kʉnunu ʉne ʉkʉtaamigwa,
ʉkʉtɨ mmanyile ɨndagɨlo syako.
72 Ʉlʉlagɨlo ʉlʉ lukʉfuma kʉmyako lʉnunu kʉmyangʉ,
ʉkʉkɨnda ʉtʉbwe baelʉfu ʉtwa sahabʉ nʉ twa feesa.
Ʉbwanalooli bwa lʉlagɨlo lwa NTWA
73 Amaboko gaako gaalɨmbelile ʉne nʉ kʉndendekesya,
ʉmbepo amahala mmanyile ɨngomeelesyo syako.
74 Aba bikʉkʉtiila, aabikʉʉmbona nʉ kʉsekela,
namanga ngʉlɨsʉʉbɨla iisyʉ lyako.
75 Mmeenye ʉkʉtɨ ʉbʉtumuli bwako bwa bʉgolofu,
gwe NTWA, mbwanalooli bwako ʉʉfundile.
76 Ʉʉsʉʉbɨsyege ni ipyana lyako,
muno gwafingiile kʉlɨ ne mbombeli gwako.
77 Ʉʉmbonele ɨkɨsa ʉkʉtɨ njege mʉʉmi,
namanga ʉlʉlagɨlo lwako lo lʉsekelo lwangʉ.
78 Abaa matingo basʉʉkege, baafujwile nɨ nongwa sya bʉtʉngʉlʉ,
looli ʉne, ngʉsiinogonaga ɨmbaatɨko syako.
79 Aba bikʉkʉtiila biisege kʉmyangʉ,
ʉkʉtɨ basyaganie ɨmanyisyo syako.
80 Ɨndumbula jangʉ jɨsikolege ɨndagɨlo syako,
ʉkʉtɨ ndɨngafujuligwaga.
Ʉlwipuuto lwa kʉsʉʉma ʉkʉpokigwa
81 Ngʉnyonywa fiijo ʉkʉpokigwa na nungwe,
ngʉlɨsʉʉbɨla iisyʉ lyako.
82 Amaaso gangʉ gapʉʉpeele ʉkʉguulɨla ɨfi gwafingile.
Ngʉlaalʉʉsya, “Kwisa ndɨli kʉkʉʉsʉʉbɨsya?”
83 Ngakanyeele bo ʉlwa kɨgʉbo ɨkɨ kyʉmiile ɨlyosi,
poope ndikʉsiibwa ɨndagɨlo syako.
84 Ngʉguulɨla mpaka ndɨli?
Aba bikʉndaamya, kwisa kʉbafunda ndɨli?
85 Abaa matingo bangʉmbiile ʉbwina,
aba batikʉlʉkonga ʉlʉlagɨlo lwako.
86 Ɨndagɨlo syako syosa sya nalooli,
ngʉtaamigwa kɨsita nongwa, ndʉʉla.
87 Baalɨ kɨfuki ʉkʉmbyuta,
looli ʉne ngasilekapo ɨmbaatɨko syako.
88 Kwi ipyana lyako ʉʉsyʉsye,
ʉkʉtɨ nsikolege ɨmanyisyo ɨsya nkanwa kaako.
Ɨndagɨlo sya NTWA sikaja nʉ bʉmalɨkɨlo
89 Gwe NTWA, iisyʉ lyako lya bwila na bwila,
liitotiike kʉmwanya.
90 Ʉbʉsʉʉbɨligwa bwako bʉlipo mu sopelo syosa,
ʉkɨpelile ɨkiisʉ, kɨtikʉjʉngaanika.
91 Kʉ bʉtumuli bwako ʉtʉndʉ toosa tʉlipo mpaka lɨɨlɨno,
toosa tukʉkʉbombela ʉgwe.
92 Lɨnga ngaaliikyeliile ndʉlagɨlo lwako,
ngalɨ mfwɨliile mu ngʉbɨlo syangʉ.
93 Ndikwisa kwibwa sikʉ ɨmbaatɨko syako,
namanga ndɨ ɨsyo ʉʉsyʉsiisye.
94 Ʉne ndɨ gwako, ʉmboke,
namanga niijʉʉlile ʉkʉsikonga ɨmbaatɨko syako.
95 Abaniongafu bikʉʉsigɨla ʉkʉtɨ baangoge,
looli ʉne ngʉsiinogonaga ɨmanyisyo syako.
96 Mmeenye ʉkʉtɨ kʉkʉtɨ kandʉ kalɨ nʉ bʉmalɨkɨlo,
looli ɨndagɨlo syako sikaja nʉ bʉmalɨkɨlo.
Ʉlʉlagɨlo lwa NTWA lukʉpa amahala
97 Ʉlʉlagɨlo lwako ndʉganile fiijo,
ngʉlwinogona iisikʉ lyosa.
98 Ɨngomeelesyo syako ndɨ nasyo amasikʉ goosa,
sikʉmba amahala ʉkʉkɨnda agaa balʉgʉ bangʉ.
99 Ngʉsyagania ʉkʉkɨnda abamanyisi bangʉ boosa,
namanga ngʉsiinogona ɨmanyisyo syako.
100 Ndɨ na mahala ʉkʉbakɨnda abakangale,
paapo ngʉsikonga ɨmbaatɨko syako.
101 Ngwisigɨla ʉkwenda mu njɨla ɨmbiibi,
ʉkʉtɨ ndyɨmɨkege iisyʉ lyako.
102 Ndikʉsifujula ɨsi ʉtumwile,
namanga ʉʉmanyiisye jʉjʉʉgwe.
103 Amasyʉ gaako manyaafu fiijo kʉmyangʉ,
ʉkʉkɨnda ʉlʉʉki nkanwa mmyangʉ.
104 Mu mbaatɨko syako ngʉkaba amahala,
fyobeene njɨbengile kʉkʉtɨ njɨla ɨjaa bʉtʉngʉlʉ.
Ɨndagɨlo sya NTWA lʉmuli
105 Iisyʉ lyako nyaale jaa malʉndɨ gangʉ,
kangɨ lʉmuli lwa kʉmulɨka ɨnjɨla jangʉ.
106 Ndapile nʉ kʉsisimɨkɨsya ʉkʉtɨ,
ngʉsikongaga ɨsya bwanalooli ɨsi ʉtumwile.
107 Gwe NTWA, ndaamiigwe fiijo,
ʉʉsyʉsye ʉkʉkongana ni isyʉ lyako.
108 Gwe NTWA, ambɨlɨla ʉlwipuuto lwangʉ ʉlwa kʉkʉgwɨla ʉlʉpi,
kangɨ ʉʉmanyisyege ɨsi ʉtumwile.
109 Abalʉgʉ bangʉ bikʉlonda ʉkʉʉngoga,
looli ndikwibwa ʉlʉlagɨlo lwako.
110 Abaniongafu bategile ʉntego,
looli ʉne ngakilaniapo ɨmbaatɨko syako.
111 Ɨmanyisyo syako kɨlɨngo kyangʉ,
namanga lo lʉsekelo lwa ndumbula jangʉ.
112 Ndumwile mu ndumbula jangʉ,
ʉkʉsikonga ɨndagɨlo syako mpaka kʉmmalɨɨkɨsyo.
Ndʉlagɨlo lwa NTWA bʉlimo ʉbʉponelo
113 Mbabengile aba bikwilaamwa,
looli ndʉganile ʉlʉlagɨlo lwako.
114 Ʉgwe ʉlɨ bʉponelo bwangʉ, ʉlɨ ngʉlʉ jangʉ,
ngʉlɨsʉʉbɨla iisyʉ lyako.
115 Mwe babomba mbiibi, musookeko kʉmyangʉ,
ʉkʉtɨ nsikongege ɨngomeelesyo sya Kyala gwangʉ.
116 Ʉngasyege ʉkʉkongana nʉ lʉfingo lwako, njege mʉʉmi,
ʉlɨngaandekaga ʉkʉsʉʉka ndʉsʉʉbɨlo lwangʉ.
117 Ʉndʉʉle, ʉkʉtɨ njege nʉ lʉtengaano,
njege maaso bwila kʉ ndagɨlo syako.
118 Kʉbakaana boosa aba batikʉsyɨmɨka ɨndagɨlo syako,
namanga ʉbʉsyobi bwabo bwa itolo.
119 Ababiibi boosa kʉbataaga bo ʉlwa mindʉ,
fyobeene ʉne nsiganile ɨmanyisyo syako.
120 Ngʉtetema kʉnongwa jaa lʉtende nkyeni mmyako,
ʉne ngʉbʉtiila fiijo ʉbʉtumuli bwako.
Ʉkʉlʉkonga ʉlʉlagɨlo lwa NTWA
121 Mbombile ɨnunu kangɨ sya bwanalooli,
ʉlɨngaandeka mmaboko gaa aba bikʉʉmbonela.
122 Ʉʉnyɨɨmɨle ne mbombeli gwako,
ʉlɨngabalekaga abaa matingo ʉkʉʉmbonela ʉne.
123 Amaaso gangʉ gapʉʉpeele ʉkʉguulɨla ʉkʉpokigwa na nungwe,
ʉkʉʉmbombela ɨsi gwafingile.
124 Ʉʉmbombele ne mbombeli gwako ʉkʉkongana ni ipyana lyako,
ʉʉmanyisye ɨndagɨlo syako.
125 Ʉne ndɨ mbombeli gwako, ʉmbepo amahala,
ʉkʉtɨ nsimanyege ɨmanyisyo syako.
126 Gwe NTWA, aka ko kabalɨlo kaa kʉbomba simo,
namanga abandʉ bikʉkilania ʉlʉlagɨlo lwako.
127 Fyobeene ʉne nsiganile ɨngomeelesyo syako,
ʉkʉkɨnda ɨsahabʉ ɨnunu fiijo.
128 Fyobeene ngʉsikonga ɨmbaatɨko syako syosa,
ɨnjɨla sya bʉsyobi nsibengile.
Ʉkʉsyʉkwa ʉlʉlagɨlo lwa NTWA
129 Ɨmanyisyo syako sya kʉswigɨsya,
fyobeene ngʉsyɨmɨka.
130 Ɨsi gikʉlɨngaania amasyʉ gaako sikʉtwala ʉlʉmuli,
sikʉbapa amahala aba bakasyagania nasimo.
131 Naaseeme akanwa kangʉ, nʉʉmiilwe,
ngʉsinyonywa ɨndagɨlo syako.
132 Ʉʉsanukɨle nʉ kʉʉmbonela ɨkɨsa,
bo muno kʉbabombela aba bakʉganile.
133 Iisyʉ lyako lɨgalongosyege amalʉndɨ gangʉ,
ʉkʉtɨ ʉbʉtʉlanongwa bʉlɨngaandagɨlaga.
134 Ʉmboke, najʉmo alɨngaambonelaga,
ʉkʉtɨ nsikongege ɨmbaatɨko syako.
135 Ʉngeetege kʉ booloolo ne mbombeli gwako,
ʉʉmanyisyege ɨndagɨlo syako.
136 Amaaso gangʉ gikwika ɨnyɨɨsi sya maasosi,
paapo abandʉ batikʉlwɨmɨka ʉlʉlagɨlo lwako.
Ʉbʉgolofu bwa lʉlagɨlo lwa NTWA
137 Gwe NTWA, ʉgwe ʉlɨ ngolofu,
ʉbʉtumuli bwako bwa bwanalooli.
138 Ɨmanyisyo syako sya bwanalooli,
kangɨ sya kʉsʉʉbɨligwa.
139 Ʉlʉgano lwangʉ kʉmyako lukʉmbela ʉkʉkalala,
paapo abalʉgʉ bangʉ bikʉgasyokela amasyʉ gaako.
140 Ʉlʉfingo lwako lwelu fiijo,
ʉne ne mbombeli gwako ndʉganile.
141 Na paapo ndɨ nnandɨ ngʉsyokeligwa,
poope ndikʉsiibwa ɨmbaatɨko syako.
142 Ʉbʉgolofu bwako bwa bwila na bwila,
ʉlʉlagɨlo lwako lwa nalooli.
143 Ndɨ mbʉtolwe na mu ngʉbɨlo,
looli ɨngomeelesyo syako lo lʉsekelo lwangʉ.
144 Ɨmanyisyo syako sya bwanalooli bwila na bwila,
ʉmbepo ʉkʉsyagania ʉkʉtɨ njege mʉʉmi.
Ʉlwipuuto lwa kʉsʉʉma ʉbʉlɨndɨlɨli
145 Ngʉkʉlɨlɨla nɨ ndumbula jangʉ joosa.
Gwe NTWA, ʉʉnyaamule,
ngʉsikongaga ɨndagɨlo syako.
146 Ngʉkʉlɨlɨla ʉgwe, ʉmboke,
po ngʉsikolaga ɨmanyisyo syako.
147 Ngʉlaabɨla bo bʉkaalɨ ʉkʉkya ngʉsʉʉma ʉndʉʉle,
ʉne ngʉsʉʉbɨla amasyʉ gaako.
148 Ngʉja maaso ɨkɨlo kyosa,
ʉkʉlwinogona ʉlʉfingo lwako.
149 Gwe NTWA, ʉmbɨlɨke kwi ipyana lyako,
ʉmboke ʉkʉkongana nʉ bʉtumuli bwako.
150 Abaniongafu balɨ kɨfuki bikʉʉfwɨma,
abo balɨ kʉbʉtali nʉ lʉlagɨlo lwako.
151 Looli gwe NTWA, ʉlɨ kɨfuki na niine,
ɨngomeelesyo syako syosa sya kʉsʉʉbɨligwa.
152 Ʉkʉfuma liijolo nsimeenye ɨmanyisyo syako,
ʉsibɨɨkile ʉkʉtɨ sijege sya bwila na bwila.
Ʉkʉsʉʉma ʉbʉtʉʉli
153 Ʉsikeete ɨngʉbɨlo syangʉ, ʉmboke,
namanga ngalwibwa ʉlʉlagɨlo lwako.
154 Ʉʉnosye nʉ kʉʉnyaabʉla,
ʉmbepo ʉbʉʉmi bo muno gwafingiile.
155 Abaniongafu batikwisa kʉpokigwa sikʉ,
namanga batikʉsitiila ɨndagɨlo syako.
156 Gwe NTWA, ɨkɨsa kyako kingi,
ʉkʉkongana nʉ bʉtumuli bwako ʉmbepo ʉbʉʉmi.
157 Ndɨ na balʉgʉ bingi aba bikʉndaamya,
looli ʉne ndikʉkilania ɨmanyisyo syako.
158 Bo ngʉbabona abasita kʉsʉʉbɨligwa, ngʉkalala,
paapo batikʉgakola amasyʉ gaako.
159 Gwe NTWA, keeta, muno nsiganiile ɨmbaatɨko syako,
ʉmbepo ʉbʉʉmi ʉkʉkongana ni ipyana lyako.
160 Amasyʉ gaako goosa gaa kʉsʉʉbɨligwa,
ʉbʉtumuli bwako bwa bwanalooli,
kangɨ bwa bwila na bwila.
Ʉkʉsekela ʉlʉlagɨlo lwa NTWA
161 Abalagɨli bikʉndaamya kɨsita nongwa,
looli ɨndumbula jangʉ jikʉgɨɨmɨka amasyʉ gaako.
162 Ngʉsekela kʉnongwa jaa fingo syako,
ngatɨ mundʉ ʉjʉ akabile akandʉ akaa ntengo fiijo.
163 Mbʉbengile ʉbʉtʉngʉlʉ,
looli ndʉganile ʉlʉlagɨlo lwako.
164 Kʉkʉtɨ isikʉ ngʉkʉtuufya kahaano na kabɨlɨ,
kʉnongwa jaa bʉtumuli bwako ʉbwa bwanalooli.
165 Balɨ nʉ lʉtengaano lwingi aba balʉganile ʉlʉlagɨlo lwako,
kakajako nakamo akaa kʉbagwɨsya.
166 Gwe NTWA, ngʉkʉguulɨla ʉmboke,
nsikolile ɨngomeelesyo syako.
167 Ngʉsikonga ɨmanyisyo syako,
nsiganile nɨ ndumbula joosa.
168 Ngʉsikonga ɨmbaatɨko syako nɨ manyisyo syako,
namanga kʉsibona ɨnjɨla syangʉ syosa.
Ɨnguuto jaa kʉsʉʉma ʉbʉtʉʉli
169 Gwe NTWA, ɨnguuto jangʉ jɨkʉfikɨle,
ʉmbepo ʉkʉgaagania kanunu amasyʉ gaako.
170 Ʉkʉsʉʉma kwangʉ kʉfike kʉmyako,
ʉmboke bo muno gwafingiile.
171 Ɨmilomo gyangʉ gɨkʉtuufyege,
namanga kʉʉmanyisya ɨndagɨlo syako.
172 Ʉlʉlɨmi lwangʉ lwɨmbege ɨfingo syako,
namanga ɨngomeelesyo syako syosa sya bwanalooli.
173 Ɨkɨboko kyako kɨjɨɨlege ngaani ʉkʉndʉʉla ʉne,
namanga ndumwile ʉkʉsikonga ɨmbaatɨko syako.
174 Gwe NTWA, ngʉbʉnyonywa fiijo ʉbʉpoki bwako,
ʉlʉlagɨlo lwako lo lʉsekelo lwangʉ.
175 Ʉmbepo ʉbʉʉmi ʉkʉtɨ ngʉtuufyege,
ʉbʉtumuli bwako bʉndʉʉlege.
176 Ngwembeela ngatɨ ngʼoosi ɨjɨ jɨsobile,
ʉʉndonde ne mbombeli gwako,
namanga ngasiibwa ɨngomeelesyo syako.