Ʉlwipuuto lwa kʉgwɨla ʉlʉpi kʉnongwa jaa bʉtoli
118
Munngwɨlege ʉlʉpi ɄNTWA, namanga mooloolo,iipyana lyake lya bwila na bwila.
2 ABanyaisilaɨli bajobege ʉkʉtɨ,
“Iipyana lyake lya bwila na bwila.”
3 Abaa ndʉjungu lwa Aaloni bajobege ʉkʉtɨ,
“Iipyana lyake lya bwila na bwila.”
4 Boosa aba bikʉntiila ɄNTWA bajobege ʉkʉtɨ,
“Iipyana lyake lya bwila na bwila.”
5 Bo ndɨ mbʉtolwe naaliipuutile kʉ NTWA,
aapɨliike, alɨnkʉʉnyaabʉla mu ngʉbɨlo.
6 ɄNTWA alɨ kʉ lʉbafu lwangʉ, andikʉtiila nafimo.
Ʉmundʉ aikʉʉmbombela ɨfiki?
7 ɄNTWA alɨ pamopeene na niine, ikʉndʉʉla,
ngʉbabonaga aba bikʉngalalɨla bo bikʉtoligwa.
8 Kʉnunu ʉkʉbopela kʉ NTWA,
ʉkʉkɨnda ʉkʉnsʉʉbɨla ʉmundʉ.
9 Kʉnunu ʉkʉbopela kʉ NTWA,
ʉkʉkɨnda ʉkʉbasʉʉbɨla abalongosi baa pakiisʉ.
10 Ɨfikolo fyosa fyalɨɨsyʉngʉʉtiile,
looli mu ngamu jaa NTWA naabakagile.
11 Baalɨɨsyʉngʉʉtiile koosakoosa,
looli mu ngamu jaa NTWA naabakagile.
12 Baalɨɨsyʉngʉʉtiile bo ʉlwa njʉki,
looli baapiile bo ʉlwa liisʉ ɨlyʉmu,
mu ngamu jaa NTWA naabakagile.
13 Naakomiigwe naalɨ kɨfuki ʉkʉgwa,
looli ɄNTWA aalɨndʉʉlile.
14 ɄNTWA jo maka gangʉ, kangɨ lwɨmbo lwangʉ,
ʉmwene jo mpoki gwangʉ.
15 Ɨnyɨmbo sya lʉsekelo lwa bʉtoli,
sikʉpɨlɨkigwa mu heema sya bagolofu,
sikʉtɨ, “Ɨkɨboko ɨkiilɨɨlo ɨkya NTWA kɨbombile ɨngʉlʉmba.
16 Ɨkɨboko ɨkya maka ɨkya NTWA kɨtwele ʉbʉtoli,
ɨkɨboko ɨkiilɨɨlo ɨkya NTWA kɨbombile ɨngʉlʉmba.”
17 Andikʉfwa, mbonile,
ʉkʉtɨ mfumusyege ɨmbombo ɨngʉlʉmba ɨsya NTWA.
18 ɄNTWA aafundile fiijo,
looli akaandeka ʉkʉtɨ mfwege.
19 Nyiigʉlɨla ɨfipata ɨfya bagolofu,
ningɨle kʉkʉnngwɨla ʉlʉpi ɄNTWA.
20 Ɨkɨ kyo kɨpata kya NTWA,
abagolofu bikwingɨla ʉmo.
21 Angʉgwa ʉlʉpi kʉmyako paapo ʉʉnyaamwile,
ʉlɨ bʉpoki bwangʉ.
22 Ɨliibwe ɨlɨ abajenga nyumba baalɨkaanile,
lyo lɨjile ibwe ikʉlʉmba pa lwalo, pa nguto.
23 ɄNTWA jo ʉjʉ asipelile ɨsyo,
sya kɨswigo fiijo kʉmyɨtʉ ʉkʉsibona ɨsyo.
24 Ɨlɨ lyo isikʉ ɨlɨ ɄNTWA aapelile,
tʉsekelege nʉ kʉsania.
25 Gwe NTWA, tukʉpyelesya tʉpoke!
Gwe NTWA, tukʉlamba kʉmyako ʉtʉpe ʉbʉtoli.
26 Asajigwege ʉjʉ ikwisɨla mu ngamu jaa NTWA,
tukʉbasaja ʉkʉfuma mu tempeli jaa NTWA.
27 ɄNTWA jo Kyala, atʉpeele ʉlʉmuli.
Namukole ɨsamba sya lʉsekelo mmaboko,
mukafikege pa kɨgemo kya kwipuutɨlapo.
28 Ʉgwe gwe Kyala gwangʉ,
ngʉkʉgwɨlaga ʉlʉpi.
Ʉgwe gwe Kyala gwangʉ,
ngʉbʉfumusyaga ʉbʉkʉlʉmba bwako.
29 Munngwɨlege ʉlʉpi ɄNTWA, namanga mooloolo,
iipyana lyake lya bwila na bwila.