Ʉlwipuuto lwa kʉnngwɨla ʉlʉpi Kyala
Ʉlwɨmbo ʉlwa Ndaabɨti. Ʉlwɨmbo lwa lwipuuto bo ɨtempeli jɨjengiigwe.
30
Gwe NTWA, ngʉkʉtuufyaga paapo gʉmbokile.Ʉbasigiile abalʉgʉ bangʉ ʉkʉʉnyangalɨla.
2 Gwe NTWA, Kyala gwangʉ,
naakʉkooliile ʉkʉtɨ ʉndʉʉle, gwalɨɨmbʉmbʉlwisye.
3 Gwe NTWA, gwalɨmbokile ʉkʉfuma kʉ bʉsyʉka,
gwalɨɨngomokiisye ʉbʉʉmi,
gwalɨɨsoosiisyemo ndɨ bala bikʉbʉʉka kʉ bʉsyʉka.
4 Mwe batiila ɄNTWA, mumpaalege.
Mujɨtuufyege ɨngamu jaake ɨnyiikemo.
5 Namanga ɨngalalɨsi syake sya kabalɨlo kapimba itolo,
looli ɨsajo syake sya bwila na bwila.
Ʉkʉlɨla amaasosi kukwendelela ɨkɨlo kyosa,
looli ʉlʉsekelo lukwisa nʉlʉbʉnjʉ.
6 Bo ndengeene,
ndɨnkʉtɨ, “Ndikʉjʉngaanika sikʉ.”
7 Gwe NTWA, gwalɨɨsajile,
gwalɨngasiisye, naalɨɨtɨ kyamba ɨkɨnywamu.
Looli bo gwifisile,
ndɨnkʉja nʉ lʉtende.
8 Naaliipuutile kʉmyako gwe NTWA,
naapyeliisye kʉmyako ʉkʉtɨ ʉndʉʉle,
9 “Aakʉkaba ɨfiki lɨnga ngʉfwa?
Lɨnga angʉsuluka kʉ bʉsyʉka aakʉkabamo ɨfiki?
Bʉle ʉlʉfumbɨ lwa bafwe lukʉkʉtuufyaga?
Lukʉfumusyaga ʉbwanalooli bwako?
10 Gwe NTWA, ʉpɨlɨke, ʉje nɨ kɨsa kʉmyangʉ.
Gwe NTWA, ʉndʉʉle.”
11 Gwakʉsanwisye ʉkʉlɨla kwangʉ ʉkʉja kɨmogo kya lʉsekelo,
gwalɨɨfuulile amalogota, gwalɨɨfwɨkile ɨmyenda ɨminunu.
12 Ɨndumbula jangʉ jikʉkʉpaalaga kɨsita kʉmyeka.
Gwe NTWA, Kyala gwangʉ, ngʉkʉgwɨlaga ʉlʉpi bwila na bwila.