Ʉlwipuuto lwa lʉsʉʉbɨlo kwa Kyala
Kʉ mpaali gwa lwɨmbo. Ʉlwɨmbo ʉlwa Ndaabɨti.
31
Gwe NTWA, mbopiile kʉmyako,ndɨngasʉʉkamo sikʉ,
ʉmboke kʉ bʉgolofu bwako.
2 Ʉʉnyaamule ʉne, ʉʉnyaabʉle nakalɨnga,
ʉjege lwalabwe lwa kʉbopelako,
iilinga lya maka ɨlya kʉmboka ʉne.
3 Nalooli ʉgwe ʉlɨ lwalabwe lwangʉ,
kangɨ ilinga lyangʉ ɨlya kʉmboka ʉne.
Kʉnongwa jaa ngamu jaako ʉʉndongosyege,
nʉ kʉʉnyɨɨmɨlɨla.
4 Ʉʉsoosyemo ndwelo ʉlʉ bandegile mbʉtiitʉ.
Ʉgwe ʉlɨ bʉponelo bwangʉ.
5 Ʉbʉʉmi bwangʉ ngʉbʉbɨɨka mmaboko gaako.a
Gwe NTWA, gwe Kyala gwa bwanalooli, ʉʉnyaabwile.
6 Mbabengile aba bikʉbʉsʉʉbɨla ʉbʉlosi,
ʉne ngʉnsʉʉbɨla ɄNTWA.
7 Ngʉsekela nʉ kʉsaala kwi ipyana lyako,
ʉbʉbwene ʉbʉtolwe bwangʉ,
ʉjɨbwene ɨndumbula jangʉ ʉkʉtaamigwa.
8 Ʉkaambɨɨka mmaboko gaa balʉgʉ bangʉ,
ʉʉmbɨɨkile pabʉjo ʉbʉnunu.
9 Gwe NTWA, ʉʉmbonele ɨkɨsa,
paapo ndɨ mbʉtolwe.
Amaaso gangʉ gakateele kʉnongwa jaa kʉlɨla,
goope ʉmbɨlɨ gwangʉ nʉ moojo gwangʉ fyonywike amaka.
10 Ʉbʉʉmi bwangʉ bukʉmalɨkɨla nkɨtima,
ɨfyɨnja fyangʉ fikʉmalɨkɨla nkwilɨlɨɨsya.
Amaka gangʉ gikʉmalɨka kʉnongwa jaa bʉtʉlanongwa bwangʉ,
ɨfifupa fyangʉ fyonywa.
11 Abalʉgʉ bangʉ boosa bikʉʉnyoobela,
abapalamani bangʉ bakaangana.
Aba baameenye ʉne bikʉndiila,
lɨnga baambwene mmisebo, bikʉʉmbopa.
12 Abandʉ baanyiibiibwe ʉne bo ʉlwa mundʉ ʉmfwe,
ndɨ bo ʉlwa ndeko ɨjɨ jɨbʉgʉjwike.
13 Ngʉpɨlɨka ɨnongwa ɨsi bikʉʉheeha,
ɨfya kʉtiilɨsya fiisyʉngʉʉtiile ɨfibafu fyosa.
Bikʉbaatɨka ʉkʉʉmbombela kabiibi,
bikʉlonda ʉkʉʉngoga.
14 Looli ʉne ngʉkʉsʉʉbɨla ʉgwe, gwe NTWA,
ngʉtɨ, “Ʉgwe gwe Kyala gwangʉ.”
15 Ʉbʉʉmi bwangʉ bʉlɨ mmaboko gaako,
ʉmboke kʉ balʉgʉ bangʉ,
na kʉlɨ aba bikʉʉfwɨma ʉne.
16 Ʉngeete kʉ booloolo ne mbombeli gwako,
ʉmboke kwi ipyana lyako.
17 Gwe NTWA, ngwipuuta kʉmyako,
ndɨngaasʉʉka ʉne.
Basʉʉke abaniongafu,
balambalale kɨmyemye kʉ bʉsyʉka.
18 Ɨmilomo ɨgɨ gikʉjoba ɨsya bʉtʉngʉlʉ,
ʉgɨpele ʉkʉja kɨnuunu.
Bikʉbaheelula abagolofu ɨsya itolo,
kʉ matingo gaabo.
19 Gwe Kyala, ʉlɨ nnunu fiijo,
ʉbabɨɨkiile ɨnunu aba bikʉkʉtiila.
Aba bikʉbopela kʉmyako, kʉbabombela ɨnunu,
bo abandʉ boosa bikʉkeeta.
20 Kʉbafisa pa bʉnunu kʉmyako,
kʉbʉtali nɨ mbaatɨko ɨmbiibi ɨsya bandʉ.
Kʉbalɨndɨlɨla kanunu mu nyumba jaako,
kʉbʉtali nʉ lʉkaani lwa bandʉ.
21 ɄNTWA atuufigwege,
aanangiisye ʉne iipyana ɨlya kʉswigɨsya,
bo ndɨ nkaaja aka kasyʉngʉʉtɨliigwe na balʉgʉ.
22 Nakalɨnga naajobile naatile,
“Ngagɨliigwe kʉbʉtali.”
Looli gwapɨliike ʉkʉlɨla kwangʉ,
bo ngʉpyelesya ʉkʉtɨ ʉndʉʉle.
23 Ʉmwe batiila ɄNTWA, munnganege.
ɄNTWA ikʉbalɨndɨlɨla abandʉ aba bikʉnsʉʉbɨla.
Looli abaa matingo, ikʉbafunda fiijo,
ʉkʉkongana nɨ mbombo syabo.
24 Mwesa mwe mukʉnsʉʉbɨla ɄNTWA,
mujege bakifu, mulɨngapaasyaga.