Ʉlwipuuto lwa kʉsʉʉma ʉbʉlongi bwa nalooli
10
Gwe NTWA, fiki gwɨmile kʉbʉtali?Fiki kwibɨɨlɨla bo bʉlipo ʉbʉtolwe?
2 Ʉntʉlanongwa kʉ matingo gaake ikʉbafwɨma aboonywa,
gɨnkolege ɨmitego gyake ɨgɨ ategile.
3 Ʉntʉlanongwa ikwituukɨfya ɨfinyonyo fyake ɨfibiibi,
ʉgwa finyonyo ikʉnnguna ɄNTWA nʉ kʉnkaana.
4 Ʉntʉlanongwa kʉ matingo gaake atikʉnndonda Kyala,
mu nyiinogono syake ikʉtɨ, “Akajako Kyala.”
5 Ɨnjɨla syake sikʉnoga akabalɨlo koosa,
ʉmwene akamanya ʉkʉtɨ ikwisa kʉlongigwa,
abalʉgʉ baake boosa ikʉbaseka.
6 Mu ndumbula ikʉtɨ, “Ndikʉjʉngaanika sikʉ,
paapo andikʉkabamo ʉbʉtolwe sikʉ.”
7 Ʉbʉjobi bwake bwiswile ɨkɨgune, ʉbʉsyobi nʉ lʉbonelo,a
ikʉjoba ɨnongwa sya loonangɨko nɨ sya kʉfulasya.
8 Ikwifisa nʉ kʉsigɨla abandʉ ntwaja,
ʉkʉtɨ anngoge ʉjʉ akaja nʉ gwa kʉntʉʉla.
Amaaso gaake gikʉbafwɨma aboonywa,
9 ikwibɨɨlɨla bo ʉlwa ngalamu mfisyanjʉ.
Ikʉtegelela ʉkʉnkola ʉmoonywa,
ikʉnkola nʉ kʉnkwaba ndwelo lwake.
10 Aba bakoliigwe bikʉgwɨsigwa nʉ kʉkanyigwa,
bikʉgwɨsigwa na maka gaake.
11 Ʉntʉlanongwa ikwinogona ikʉtɨ,
“Kyala iibiibwe, iisigiile kʉmaaso, atikʉkeeta.”
12 Gwe NTWA, gwɨme! Gwe Kyala, ʉbakome!
Ʉlɨngabiibwaga aboonywa!
13 Fiki ʉmbomba mbiibi ikʉmmwilaamwa Kyala?
Fiki ikwinogona ʉkʉtɨ atikwisa kʉlongigwa sikʉ?
14 Gwe Kyala, ʉsikeetile ɨsyo,
kʉtʉpaakɨsya mbʉtolwe na mu ngʉbɨlo,
kʉtʉpaakɨsya ndɨ syosa ɨsyo.
Aba bakaja nʉ bʉtʉʉli bikʉbɨɨka ʉbʉʉmi bwabo kʉmyako,
ʉlɨ ntʉʉli gwa bapɨɨna.
15 Ʉkɨkonyolanie ɨkɨboko kya ntʉlanongwa,
afundigwe kʉlɨ ɨsi abombile,
mpaka simalɨke loosa.
16 ɄNTWA jo Malafyale bwila na bwila,
abapanja aabatikʉjamo nkiisʉ kyake.
17 Gwe NTWA, kʉpɨlɨka ɨnyiipuuto sya batolwe,
kʉbakasya nʉ kʉpɨlɨka ɨnguuto jaabo.
18 Kʉbalɨndɨlɨla kanunu abapɨɨna na batolwe,
ʉkʉtɨ abandʉ mfu balɨngandɨsya ʉkʉbatwalɨla ʉlʉtende aboonywa.