Kyala ndongi gwa bwanalooli
Kʉ mpaali gwa lwɨmbo. Ʉkʉkongana nʉ lʉbaatɨko ʉlwa Mutilabeni.a Ʉlwɨmbo ʉlwa Ndaabɨti.
9
Gwe NTWA, nikʉkʉgwɨlaga ʉlʉpi nɨ ndumbula jangʉ joosa,ngʉpangaga ɨmbombo syako syosa ɨsisya.
2 Gwe Kyala ʉNkʉlʉmba, ngʉsekelaga nʉ kʉkʉtuufya ʉgwe,
ngʉjɨpaalaga ɨngamu jaako.
3 Abalʉgʉ bangʉ bikʉgomoka kʉnyuma,
bikwipɨɨsania nʉ kʉpyutigwa nkyeni mmyako.
4 Ʉtumwile ɨnongwa jangʉ, ʉʉnosiisye.
Ʉtʉʉgeele pa kɨkota ɨkya bʉtwa, kʉlonga kʉ bʉgolofu.
5 Ʉbakemiile abandʉ baa mfikolo ɨfingi,
ʉbapyutile ababomba mbiibi,
ɨngamu syabo ʉsyomwile loosa.
6 Ʉgapyutile amalinga gaa balʉgʉ,
ʉgabulutwile loosa.
Ʉtʉpyutile ʉtwaja twabo,
tʉtikʉkʉmbʉkigwa kangɨ.
7 Looli ɄNTWA ikʉlagɨla bwila na bwila,
akɨbɨɨkile ɨkɨkota kyake ɨkya bʉtwa,
pabʉjo ʉbwa kʉlongela.
8 Ikʉfilamula ɨfiisʉ fyosa kʉ bʉgolofu,
ikʉfilonga ɨfikolo fyosa kanunu.
9 ɄNTWA bo bʉbopelo bwa aba bikʉboneligwa,
lyo ilinga lyabo nkabalɨlo akaa bʉtolwe.
10 Aba bajɨmeenye ɨngamu jaako bikʉkʉsʉʉbɨla,
paapo, gwe NTWA, ʉtikʉbalekamo aba bikʉkʉlonda.
11 Amummwɨmbɨlege ɨnduufyo ɄNTWA,
ʉjʉ atʉʉgeele pa kyamba Syoni.
Mufumusyege ɨmbombo syake kʉfiisʉ fyosa.
12 Ʉjʉ ikʉbabukɨsya ʉbʉbiibi abagogi,
ikʉbakʉmbʉka aba bikʉboneligwa,
atikwibwa ɨnguuto jaabo.
13 Gwe NTWA, ʉlɨɨmbaakɨsya!
Keeta ɨngʉbɨlo ɨsi bikʉʉfunda aba baambengile.
Ʉmboke pa kɨpata kya bʉfwe,
14 ʉkʉtɨ nsifumusyege ɨnduufyo syako,
nkyeni mmbandʉ baa mu Syoni,
nsekelege paapo ʉmbokile.
15 Abapanja basolokiile mbwina ʉbʉ baakʉmbile,
giikolile amalʉndɨ gaabo mu nyeelo ɨsi baategile.
16 ɄNTWA amanyiigwe ʉkʉtɨ ikʉlamula kʉ bʉgolofu,
ababiibi bikʉkoligwa kʉ mbombo syabo. Higajoni.b Sela
17 Abatʉlanongwa bikʉbʉʉka kʉ bʉsyʉka,
nɨ fikolo fyosa ɨfi fikʉmmwibwa Kyala.
18 Looli abatolwe atikʉbiibwamo sikʉ,
nʉ lʉsʉʉbɨlo ʉlwa balondo lʉtikʉsobamo sikʉ.
19 Gwe NTWA, gwɨme, ʉmundʉ alɨngakaba amaka,
ɨfiisʉ filongigwe nkyeni mmyako.
20 Gwe NTWA, ʉbapelele ʉlʉtende,
ɨfikolo fiimanye ʉkʉtɨ bandʉ itolo. Sela