Ʉlwipuuto lwa mundʉ ʉjʉ ikʉboneligwa
Ʉkwilɨlɨɨsya kwa Ndaabɨti, aalɨmmwɨmbiile ɄNTWA ɨnongwa sya Kusi ʉgwa nkɨkolo ɨkya Benjamini.a
7
Gwe NTWA, Kyala gwangʉ, mbopiile kʉmyako.Ʉmboke kʉlɨ boosa aba bikʉngaga, ʉʉnyaabʉle.
2 Paapo bo ʉlwa ngalamu,
babagiile ʉkʉʉnyaafulania, nʉ kʉʉndʉʉsɨla kʉbʉtali,
kʉno akajako najʉmo ʉgwa kʉmboka.
3 Gwe NTWA, Kyala gwangʉ, lɨnga ndɨ nɨ nongwa jojoosa,
lɨnga mbombile ʉbʉtʉlanongwa,
4 lɨnga nʉngomokiisye ʉbʉbiibi ʉmmanyaani gwangʉ,
pamo nnyakile ɨfya ndʉgʉ kɨsita nongwa najɨmo,
5 po ʉnndeke ʉndʉgʉ gwangʉ angage, angole,
anganyɨle mu mfu, aangoge. Sela
6 Gwe NTWA, sumuka, ʉnangɨsye ʉkʉtɨ ʉkaleele,
ʉlwe nɨ ngalalɨsi sya balʉgʉ bangʉ.
Gwe Kyala, sumuka, ʉlonge kʉ bʉgolofu.
7 Abandʉ baa mfiisʉ bakʉsyʉngʉʉtɨle,
ʉbalagɨlege ʉkʉfuma kʉmwanya.
8 ɄNTWA ikʉlonga abandʉ.
Gwe NTWA, ʉʉnosye ʉne,
ʉkʉkongana nʉ bʉgolofu bwangʉ,
ʉkʉkongana nʉ bwanalooli ʉbʉ ndɨ nabo.
9 Ʉbʉbiibi bwa baniongafu bʉmalɨkege,
looli ʉbakasye abagolofu,
namanga ʉgwe Kyala ʉlɨ ngolofu,
kweneesya ɨsya mu ndumbula, nɨ nyiinogono ɨsya bandʉ.
10 Kyala ngʉlʉ jangʉ,
ikʉbapoka abeelu mu ndumbula.
11 Kyala jo ndongi ʉngolofu,
ikʉbakalalɨla ababiibi kʉkʉtɨ isikʉ.
12 Lɨnga ʉmundʉ atikʉpɨndʉka,
Kyala ikʉpyasya ʉlʉʉbo lwake,
ikʉpɨndɨka ʉbʉpɨnde bwake kɨlɨngaani.
13 Ikʉtendekesya ɨfilwɨlo fyake ɨfigogi,
ikʉtendekesya ɨmitipʉlo gya mooto.
14 Ʉmundʉ ʉmbiibi alɨ nɨ kɨfuba ɨkya loonangɨko,
alɨ nʉ bʉbiibi munda, ikʉpaapa ʉbʉtʉngʉlʉ.
15 Akʉmbile ʉbwina ʉbʉtali ʉkʉja ntego kʉ bandʉ,
ikʉsolokelamo jʉʉjo mbwina ʉbo.
16 Ʉbʉbiibi bwake bukʉnngomokela jʉʉjo,
ʉbʉgaasi bwake bukʉnsulukɨla pa lʉndosi.
17 Angʉgwa ʉlʉpi kʉ NTWA ʉkʉkongana nʉ bʉgolofu bwake.
Nikwɨmbaga ʉkʉjɨtuufya ɨngamu jaa NTWA ʉNkʉlʉmba.