Jaakobo ikʉbasaja abaanaake
49
Po Jaakobo alɨnkʉbakoolela abaanaake, alɨnkʉbabʉʉla alɨnkʉtɨ, “Mwesa mwise apa, mbabʉʉle ɨsi aasikʉbaaga mmasikʉ aga gikwisa.2 Ʉmwe mwe baana baa Jaakobo,
mubʉngaane mupɨlɨkɨsye,
mumbɨlɨkɨsye Isilaɨli, ne gwiseemwe.
3 Lʉbeni, ʉgwe ʉlɨ mwanangʉ gwa kɨpanda,
ʉlɨ maka gangʉ, kangɨ ʉlɨ lʉseke lwa bʉlʉmyana bwangʉ.
Ʉgwe ʉbakɨndile abanugunago amaka nʉ bʉkʉlʉmba.
4 Ʉgwe ʉkɨndɨliile bo ʉlwa lwɨsi ʉlʉ lʉteekile,
looli ʉtikʉkɨndɨlɨlaga kangɨ,
paapo gwalogilwe nʉ nkasi gwangʉ,
nʉ kʉnyasya ɨkɨtala kyangʉ.a
5 Simyoni na Leebi banyamundʉ,
ɨnyʉʉbo syabo sya kʉgogela.b
6 Looli ʉne andikʉjangamo nkʉpanga ɨmbiibi syabo,
ndikwijingɨsyaga ndʉkomaano lwabo,
paapo kʉ ngalalɨsi baalɨnngogile ʉmundʉ,
kʉ matingo gaabo baabuutile ɨngole sya ngʼombe.
7 Ɨngalalɨsi syabo sigunigwe, paapo ngalɨ fiijo,
lɨgunigwe ɨlyojo lyabo, lɨkaja nɨ kɨsa.
Angʉbabalania nkiisʉ kya Jaakobo,
angʉbanyambania nkiisʉ kya Isilaɨli.
8 Ʉgwe Juuta! Abaamyɨnu bikʉkʉtuufyaga,
kʉbakolaga mmakosi abalʉgʉ baako,
abaamyɨnu bikʉfugamaga nkyeni mmyako.
9 Juuta mwanangʉ, ʉgwe ʉlɨ bo ʉlwa ɨngalamu ɨndubwa,
ʉfwɨmile, ʉgogile nʉ kʉsookapo.
Po ʉlʉ ʉlambaleele paasi bo ʉlwa ɨngalamu ɨmbɨɨki.
Jwani abagiile ʉkʉkʉsaaka?
10 Ɨngili jaa bʉnyafyale jɨtikʉsookangamo mwa Juuta,
jikʉsyalaga amasikʉ goosa nkɨkolo kyake,
mpaka bo ikwisa ʉmwene bʉnyafyale,
ʉjʉ ɨfiisʉ fyosa fikʉmmwɨmɨkaga.
11 Aikʉja nɨ migʉnda mingi ɨgya mboto fiijo,
mpaka nɨ mbunda syake ikʉsikʉngaga mmipiki gyake ɨgya maafiilʉ.
Amaafiilʉ gaake gikʉjaga mingi fiijo bo ʉlwa mɨɨsi,
ikʉsukaga ɨmyenda gyake mmɨɨsi agaa mmaafiilʉ gaake.
12 Amaaso gaake gikʉkeseelaga kʉnongwa jaa maafiilʉ gaake amingi,
amiino gaake gikʉjaga meelu kʉnongwa jaa lʉkama lwake ʉlwingi.
13 Sabuloni ikʉtʉʉgalaga kʉmbalɨ kʉ nyanja,
kangɨ bukʉjaga bʉjo bwa kwɨmapo ɨmyato,
ɨmipaka gyake gikwakʉfika nkiisʉ kya mu Sitoni.
14 Isakali alɨ bo ʉlwa ɨmbunda jaa maka,
ɨjɨ jikʉlambalala pakatɨ pa fitwalo.
15 Aikʉbʉbona ʉbʉjo bwa kʉtʉʉsya, ʉkʉja bʉnunu,
kangɨ nɨ kiisʉ kyake kɨnunu,
aikwinama ʉkʉpɨmba ɨfitwalo,
aikʉja ntʉmwa gwa kʉbomba ɨmbombo ɨngafu.
16 Ndani ikʉjaga ndamuli gwa bandʉ baake,
ɨkɨkolo kyake kɨfwene bo ʉlwa fikolo fyosa ɨfya Isilaɨli.
17 Ndani ikʉjaga bo ʉlwa ɨnjoka ɨjɨ jikʉja kʉmbalɨ kʉ njɨla,
bo ʉlwa ɨnjoka kiiko ɨjɨ jikwibɨɨlɨla mu njɨla,
ɨjɨ jikʉlʉma ɨfitende ɨfya falaasi,
po ʉjʉ iitogile ɨfalaasi ikʉgwɨla paasi.
18 Gwe NTWA, ngʉbʉlonda ʉbʉpoki bwako.
19 Gandi gikʉmmootokelaga ɨminyambuta,
looli ʉmwene ikʉlwaga nagyo, ikʉgɨtolaga.
20 Ɨkiisʉ kya mu Aaseli kikʉjaga nɨ findʉ ɨfingi kangɨ ɨfinunu fiijo,
kikʉjaga nɨ findʉ ɨfinunu koope kʉ banyafyale.
21 Nafutali alɨ bo ʉlwa ɨmbabala ɨmbɨɨki ɨjɨ jaabʉliigwe,
ɨjɨ jikʉpaapa ɨbaana ɨnunu.
22 Joosefu bo ʉlwa mpiki gwa maafiilʉ ʉgʉ gukʉpa fiijo,
ʉmpiki ʉgʉ gukʉpa fiijo kʉmbalɨ kʉ nyiibʉko sya mɨɨsi,
ɨsamba syake sibalaniile pi imato.
23 Balɨnkʉnndasa nɨ mitipʉlo,
balɨnkʉnsopela ɨmitipʉlo ʉkʉnndeefya.
24 Poope aakaalɨ ikʉkola ʉbʉpɨnde bwake kanunu,
amaboko gaake gaalyongeliigwe amaka,
kʉ maka gaa Kyala gwa Jaakobo,
mu ngamu jaa Ntiimi, Lwalabwe lwa Isilaɨli,
25 paapo Kyala gwa gʉʉso ikʉkʉtʉʉla.
Kyala ʉMwene maka goosa ikʉkʉsaja,
ʉkabe ʉlʉsajo lwa fula ʉkʉfuma kʉmwanya,
ʉlʉsajo lwa nyiibʉko sya mɨɨsi,
ʉlʉsajo lwa lʉkama nʉ bʉpaapi.
26 Ɨsajo ɨsya gʉʉso,
ngʉlʉmba ʉkʉkɨnda ɨfyamba fya bwila na bwila.
Ɨsajo ɨsyo sijege pantʉ gwa Joosefu,
ʉjʉ asaliigwe ʉkʉja nkʉlʉmba mbaamyabo.
27 Benjamini alɨ bo ʉlwa ɨmbwa jaa ndiisʉ ɨngalɨ,
nʉlʉbʉnjʉ jikʉlya ɨfi jɨfwɨmile,
namajolo jikʉjaba ɨfi jɨkolile.”
28 Ɨfyo fyo fikolo kalongo na fibɨlɨ ɨfya Isilaɨli.c Ɨsyo syo ɨsi Jaakobo aababʉʉlile bo ikʉbasaja boosa. Aalɨnsajile kʉkʉtɨ mwanaake ʉkʉkongana muno ajɨɨliile.
Ʉkʉfwa kwa Jaakobo
29 Po Jaakobo alɨnkʉbalagɨla abaanaake alɨnkʉtɨ, “Ʉne ndɨ kɨfuki ʉkʉfwa nʉ kʉlʉngana na biisʉkʉlʉ bangʉ. Muusyɨlege pamopeene nabo mu mbako ɨjɨ jɨlɨ mu ngʉnda ʉgwa Efuloni ʉgwa kɨkolo kya Bahiti. 30 Ʉngʉnda ʉgo gʉlɨ mu Makipela, kɨfuki na kʉ Mamule nkiisʉ ɨkya mu Kaanani. Ɨmbako ɨjo jo ɨjɨ Abulahamu aalyʉlile kwa Efuloni ʉNhiti, ʉkʉtɨ bʉje bʉjo bwake bwa kʉsyɨlamo abandʉ baake. 31 Ɨmbako ɨjo jo ɨjɨ baalɨnsyɨlile Abulahamu nʉ nkasi Sala, boope baasyɨliigwe baa Isaka nʉ nkasi Lebeka, kangɨ mula mo muno naalɨnsyɨlile Leeja ʉnkasi gwangʉ. 32 Ʉngʉnda gʉla nɨ mbako jaake fyalyʉliigwe kʉ kɨkolo kya Bahiti.”
33 Jaakobo bo amalile ʉkʉbalɨngaania abaanaake, alɨnkʉpindania amalʉndɨ gaake pa kɨtala, alɨnkʉfwa bo ʉlwa biisʉkʉlʉ baake aba baatalilepo.