Jaakobo ikʉbasaja abaana baa Joosefu
48
Ɨnongwa ɨsyo bo sikɨndile, balɨnkʉmmbʉʉla Joosefu balɨnkʉtɨ, “Ʉgʉʉso mbine.” Alɨnkʉbeega abaanaake babɨlɨ, Manasi na Efulaimu, alɨnkʉbʉʉka nabo kʉ gwise.2 Balɨnkʉmmbʉʉla Jaakobo balɨnkʉtɨ, “Ʉmwanaako Joosefu iisile kʉkʉkʉkeeta.” Alɨnkwikasya, alɨnkʉtʉʉgala pa kɨtala.
3 Jaakobo alɨnkʉmmbʉʉla Joosefu alɨnkʉtɨ, “Kyala ʉMwene maka goosa aalɨɨsetʉkiile bo ndɨ mu Lusu, nkiisʉ ɨkya mu Kaanani, alɨnkwenda nʉ kʉʉsaja. 4 Alɨnkʉʉmbʉʉla alɨnkʉtɨ, ‘Keeta, angʉbabaasya abaa ndʉjungu lwako ʉkʉja bingi. Angʉbapapo abaa ndʉjungu lwako ɨkiisʉ ɨkɨ, kikʉjaga kyabo bwila na bwila.’ ”
5 Jaakobo alɨnkwendelela ʉkʉjoba alɨnkʉtɨ, “Abaanaako babɨlɨ, aba bapaapiigwe muno nkiisʉ kya mu Misili, bo ngaalɨ ʉkwisa kʉmyako kʉno, Efulaimu na Manasi, bikʉjaga baanangʉ bo ʉlwa Lʉbeni na Simyoni. 6 Looli abaana abangɨ aba kʉpaapaga akabalɨlo aka kikwisa, abo bikʉbaligwaga ʉkʉja baanaako. Bikwingɨlangapo ɨkɨlɨngo ɨmigʉnda gya Efulaimu na Manasi. 7 Bo ngʉfuma nkiisʉ kya mu Pandani, ʉnnemwe Laheli aafwɨliile mu njɨla. Akabalɨlo kala twalɨ kɨfuki na kaaja kaa mu Efulati nkiisʉ kya mu Kaanani. Po ndɨnkʉnsyɨla kʉmbalɨ kʉ njɨla ɨjaa kʉbʉʉka kʉ Efulati, akaaja aka jo Betelehemu.”
8 Jaakobo bo ababwene abaana baa Joosefu, alɨnkʉlaalʉʉsya alɨnkʉtɨ, “Aba bo baani?” 9 Joosefu alɨnkʉmmwamula ʉgwise alɨnkʉtɨ, “Aba baanangʉ, aba Kyala ambeele bo ndɨ kʉno.” Jaakobo alɨnkʉtɨ, “Basegelesye apa, ngʉlonda ʉkʉbasaja.” 10 Amaaso gaa Jaakobo gaapʉʉpeele kʉnongwa jaa bʉkangale. Joosefu alɨnkʉbasegelesya abaanaake kʉ gwise, po Jaakobo alɨnkʉbafipa nʉ kʉbʉʉbatɨla. 11 Jaakobo alɨnkʉmmbʉʉla Joosefu alɨnkʉtɨ, “Mwanangʉ, ngaasʉʉbɨlaga ʉkʉtɨ ngwisa kʉkʉbonamo kangɨ, looli lɨɨlɨno Kyala apelile ʉkʉtɨ mbabone abaanaako boope.”
12 Joosefu alɨnkʉbeepʉsya abaanaake pa mafundo gaa Jaakobo, ʉmwene alɨnkʉfugama nʉ kwinama mpaka paasi. 13 Po Joosefu alɨnkʉbiinʉla kangɨ abaanaake babɨlɨ, nʉ kʉbasegelesya kʉ mwisʉkʉlʉ gwabo. Efulaimu alɨnkʉnsegelesya nɨ kɨboko kyake ɨkiilɨɨlo, ɨkɨ kyalɨ kʉkɨbafu ɨkiimama ɨkya Jaakobo. Manasi alɨnkʉnsegelesya nɨ kɨboko kyake ɨkiimama, ɨkɨ kyalɨ kʉkɨbafu ɨkiilɨɨlo ɨkya Jaakobo. 14 Looli Jaakobo alɨnkʉbɨɨka ɨkɨboko kyake ɨkiilɨɨlo pantʉ gwa Efulaimu, ʉjʉ aalɨ nnandɨ, kʉno ɨkɨboko kyake ɨkiimama aabɨɨkile pantʉ gwa Manasi, ʉjʉ aalɨ gwa kɨpanda.
15 Po alɨnkʉnsaja Joosefu alɨnkʉtɨ,
“Kyala ʉjʉ baataata Abulahamu na Isaka bammwɨmɨkaga,
Kyala ʉjo ntiimi gwangʉ amasikʉ goosa,
16 ʉgwandʉmi ʉjʉ aalɨmbokile kʉ bʉtolwe boosa,
abasaje abalʉmyana aba.
Bakooleligwege ɨngamu jangʉ,
nɨ ngamu sya biisʉkʉlʉ bɨɨtʉ Abulahamu na Isaka,
bapaapege baje bingi fiijo.”
17 Joosefu bo ammbwene ʉgwise abɨɨkile ɨkɨboko kyake ɨkiilɨɨlo pa ntʉ gwa Efulaimu, akaahobwike. Alɨnkʉgela ʉkʉsoosyapo ɨkɨboko kya gwise pantʉ gwa Efulaimu, ʉkʉtɨ akɨbɨɨke pantʉ gwa Manasi. 18 Alɨnkʉmmbʉʉla ʉgwise alɨnkʉtɨ, “Ʉlɨngabomba bo ʉlo taata! Ʉjʉ jo mwanangʉ gwa kɨpanda. Ʉbɨɨke ɨkɨboko kyako ɨkiilɨɨlo pantʉ gwake.”
19 Looli ʉgwise alɨnkʉkaana alɨnkʉtɨ, “Mwanangʉ mmeenye. Abaana abaa Manasi boope aabikʉja kɨkolo kɨnywamu. Looli ʉnnandɨ Efulaimu aikʉja nkʉlʉmba ʉkʉnkɨnda, na baa ndʉjungu lwake aabikʉja fikolo fingi.”
20 Iisikʉ ɨlyo alɨnkʉbasaja alɨnkʉtɨ,
“ABanyaisilaɨli bikʉsajanaga ʉkʉbombela ɨngamu syɨnu,
bikʉtɨgɨ, ‘Kyala akʉtʉʉle bo ʉlʉ aabatʉʉlile baa Efulaimu na Manasi!’ ”
Kʉ njɨla ɨjo alɨnkʉmmbɨɨka Efulaimu ʉkʉja nkʉlʉmba kwa Manasi.