Jaakobo ikʉnsaja Falao
47
Po Joosefu alɨnkʉbʉʉka kwa Falao, alɨnkʉmmbʉʉla alɨnkʉtɨ, “Taata na bakamu bangʉ biisile ʉkʉfuma nkiisʉ kya mu Kaanani, pamopeene nɨ ngʼombe, ɨngʼoosi, ɨmbene nɨ kyʉma kyabo kyosa. Akabalɨlo aka balɨ kʉ Gosyeni.” 2 Joosefu aabasalile abakʉlʉ bahaano, alɨnkʉbatwala kwa Falao kʉkwinangɨsya.3 Falao alɨnkʉbalaalʉʉsya abakʉlʉ baa Joosefu alɨnkʉtɨ, “Mukʉbomba mbombo jɨlɨkʉ?” Balɨnkʉmmwamula balɨnkʉtɨ, “Gwe ntwa gwɨtʉ, ʉswe twe babombeli baako, ɨmbombo jɨɨtʉ ko kʉtiima ɨmitiimo bo ʉlwa biisʉkʉlʉ bɨɨtʉ.” 4 Po kangɨ balɨnkʉmmbʉʉla Falao balɨnkʉtɨ, “Twisile kʉkʉtʉʉgala mbʉheesya, paapo nkiisʉ kya mu Kaanani kʉlɨ nɨ njala ɨngalɨ fiijo. Kʉla lɨkajako ɨliisʉ ɨlya kʉlya ɨmitiimo gyɨtʉ. Gwe ntwa gwɨtʉ, ʉswe twe babombeli baako tukʉkʉsʉʉma ʉtwambɨlɨle tukatʉʉgalege mu Gosyeni.”
5 Falao alɨnkʉmmbʉʉla Joosefu alɨnkʉtɨ, “Ʉgʉʉso na bakamu baako biisile kʉmyako mu Misili muno. 6 Ɨkiisʉ kyosa ɨkya mu Misili kɨlɨ mbwɨmɨlɨli bwako. Ʉbalondele ʉgʉʉso na baamyɨnu ʉbʉjo ʉbʉnunu ʉkʉkɨnda ʉbʉjo boosa nkiisʉ ɨkɨ. Ʉbaleke batʉʉgalege mu Gosyeni. Lɨnga balipo abaa maka pakatɨ pamyabo, ʉbabɨɨke ʉkʉja bɨɨmɨlɨli baa mitiimo gyangʉ.”
7 Po Joosefu alɨnkʉntwala ʉgwise kwa Falao, alɨnkʉnnangɨsya ʉkʉtɨ jo gwise. Jaakobo alɨnkʉnsaja Falao. 8 Po Falao alɨnkʉnndaalʉʉsya alɨnkʉtɨ, “Ʉlɨ nɨ fyɨnja filɨnga?” 9 Jaakobo alɨnkʉmmwamula alɨnkʉtɨ, “Nembeelile fiijo pa kiisʉ apa, ndɨ nɨ fyɨnja 130. Ɨfyɨnja ɨfyo finandɨ ʉkʉfwanikɨsya nɨ fya biisʉkʉlʉ bɨɨtʉ, looli fiiswile ʉbʉtolwe.” 10 Po Jaakobo alɨnkʉnsaja kangɨ Falao, balɨnkʉlagana, alɨnkʉsookapo.
11 Joosefu alɨnkʉmpa ʉgwise na bakamu ʉbʉjo ʉbwa mu Lamesesi ʉbʉ bwalɨ bʉnunu fiijo nkiisʉ kya mu Misili. Bwalɨ bʉjo bwa kʉtʉʉgala abeene, bo muno Falao aalɨmmbʉʉliile Joosefu. 12 Joosefu aabapaga ɨfindʉ ʉgwise, abakamu boosa, pamopeene na baanaabo boosa, ʉkʉkongana nʉ bwingi bwabo.
Joosefu ikʉbatʉʉla abandʉ nkabalɨlo kaa njala
13 Ɨfindʉ fikaalimo nkiisʉ kyosa ɨkya mu Misili nɨ kya mu Kaanani, ɨnjala jaabakolile fiijo abandʉ. Jaapelile ʉkʉganda fiijo abandʉ baa nkiisʉ kya mu Misili nɨ kya mu Kaanani. 14 Joosefu alɨnkʉbʉngaania ɨndalama syosa ɨsya Bamisili nɨ sya Bakaanani ɨsi baalyʉlile ɨfindʉ kʉmyake, alɨnkʉsitwala kwa Falao.
15 Ɨndalama sya Bamisili na Bakaanani bo simaliike, aBamisili boosa balɨnkʉbʉʉka kwa Joosefu balɨnkʉtɨ, “Ɨndalama syɨtʉ simaliike, ʉtʉpepo ɨfindʉ! Fiki tʉfwege bo kʉtʉkeeta?”
16 Joosefu alɨnkʉbabʉʉla alɨnkʉtɨ, “Lɨnga simaliike ɨndalama syɨnu, mutwale ɨmitiimo gyɨnu, mbapepo ɨfindʉ.” 17 Po abandʉ balɨnkʉntwalɨla Joosefu ɨmitiimo gyabo ɨgya falaasi, ɨngʼoosi, ɨngʼombe nɨ mbunda. Po Joosefu joope alɨnkʉbapa ɨfindʉ ɨfya nkyɨnja ɨkyo ʉkʉʉsania nɨ mitiimo gyabo gyosa.
18 Ɨkyɨnja ɨkɨngɨ balɨnkʉbʉʉka kangɨ kʉkʉmmbʉʉla balɨnkʉtɨ, “Gwe ntwa, ɨndalama syɨtʉ syosa simaliike, na gɨɨ mitiimo gyɨtʉ lɨɨlɨno gyosa gyako! Tʉkaja nafyo nafimo ɨfya kʉkʉpa, tʉsyele ʉswe nɨ migʉnda gyɨtʉ. 19 Fiki tʉfwege nkyeni mmyako nɨ migʉnda gyɨtʉ gyʉmege? Ʉtʉʉle ʉswe nɨ migʉnda gyɨtʉ ʉkʉʉsania nɨ findʉ. Ʉswe aatukʉja batʉmwa baa Falao nɨ migʉnda gyɨtʉ gikʉjaga gyake. Ʉtʉpepo ɨfindʉ tʉlɨngafwa nɨ njala, kangɨ ʉtʉpepo ɨmbeju ɨkiisʉ kyɨtʉ kɨlɨngaja lʉkʉbo.”
20 Po Joosefu alɨnkʉmmʉʉlɨla ɨmigʉnda gyosa Falao. ABamisili boosa baalyʉliisye ɨmigʉnda gyabo gyosa, paapo ɨnjala jaalɨ ngalɨ fiijo. Ɨkiisʉ kyosa kɨlɨnkʉja kya Falao, 21 po Joosefu alɨnkʉbabɨɨka ʉkʉja batʉmwaa abandʉ boosa abaa nkiisʉ kyosa ɨkya mu Misili. 22 Looli Joosefu akaalyʉlile ɨmigʉnda gya bapuuti abaa mu Misili, paapo abeene baakabaga ɨkɨjabo kyabo kwa Falao. Abeene baalɨ nɨ findʉ ɨfya kʉbafwana, fyobeene bakaalyʉliisye ɨmigʉnda gyabo.
23 Joosefu alɨnkʉbabʉʉla abandʉ alɨnkʉtɨ, “Akabalɨlo aka mbʉʉlile ʉmwe, pamopeene nɨ migʉnda gyɨnu, mukʉjaga kyʉma kya Falao. Po ngʉbapapo ɨmbeju, mukabyale mmigʉnda gyake Falao. 24 Looli ɨfi mukʉtondola, munnjabɨlege Falao ɨkɨjabo kɨmo mfijabo fihaano. Ɨfijabo fina ɨfi fikʉsyala sikʉjaga mbeju sya kʉbyala nɨ findʉ fyɨnu ɨfya kʉlya ʉmwe, abaanɨɨnu na bandʉ abaa nnyumba syɨnu.”
25 Balɨnkʉmmwamula balɨnkʉtɨ, “Gwe ntwa gwɨtʉ, ʉtʉpokile! Ʉtʉnangiisye ʉbooloolo bwako. Twitiike ʉkʉja batʉmwa baa Falao.”
26 Po Joosefu alɨnkʉbɨɨka ʉlʉlagɨlo nkiisʉ kya mu Misili, ʉlʉlagɨlo ʉlʉ lʉliko na ʉlʉ. Fyosa ɨfi bikʉtondola bikʉnnjabɨla Falao ɨkɨjabo kɨmo mfijabo fihaano, fikʉja kyʉma kyake. Looli mmigʉnda gyene ɨgya bapuuti baa mu Misili batikʉnnjabɨla Falao.
Jaakobo ikʉbɨɨka ʉlwitɨkano na Joosefu
27 ABanyaisilaɨli baatʉʉgeele mu Gosyeni, nkiisʉ kya mu Misili. Balɨnkongelapo ʉkʉkaba ɨkyʉma ɨkingi nʉ kʉja bingi fiijo. 28 Jaakobo aatʉʉgeele nkiisʉ kya mu Misili ɨfyɨnja 17. Ʉmwene aaliko kʉ bʉʉmi ɨfyɨnja 147.
29 Akabalɨlo kaa kʉfwa bo kalɨ kɨfuki, alɨnkʉnkoolela ʉmwanaake Joosefu alɨnkʉmmbʉʉla alɨnkʉtɨ, “Lɨnga ʉʉnganile nalooli, ʉngole mu ndapatapa, ʉlape ʉkʉtɨ ʉtikʉʉsyɨla nkiisʉ kya mu Misili. Ngʉkʉpyelesya gwise ʉʉmbombele kwi ipyana na kʉ bwanalooli. 30 Looli bo mfwile, gwise gʉmbɨmbe ʉkʉʉsoosyamo mu Misili, ʉkaasyɨle kʉ Kaanani pamopeene na biisʉkʉlʉ bangʉ.”
Joosefu alɨnkʉmmwamula alɨnkʉtɨ, “Angʉbomba bo muno ʉjobiile.”
31 Jaakobo alɨnkʉmmbʉʉla alɨnkʉtɨ, “Ʉlape kʉmyangʉ.” Po Joosefu alɨnkʉlapa. Po Jaakobo alɨnkwinama ʉntʉ, alɨnkwegamila ɨkɨtala.