Jaakobo ikʉsaamɨla kʉ Misili
46
Po Jaakobo alɨnkʉbʉʉka kʉ Misili nɨ kɨkolo kyake nɨ kyʉma kyosa ɨkɨ aalɨ nakyo. Bo afikile nkaaja aka bikʉtɨ Beeli-Syeba, alɨnkʉsoosya iikemo kwa Kyala gwa Isaka, ʉgwise. 2 Po pakɨlo Kyala alɨnkʉjoba na Jaakobo mu njosi, alɨnkʉnkoolela alɨnkʉtɨ, “Jaakobo, Jaakobo!” Alɨnkwitɨka alɨnkʉtɨ, “Ndipo apa.”3 Kyala alɨnkʉmmbʉʉla alɨnkʉtɨ, “Ʉne ne Kyala, Kyala gwa gʉʉso, ʉlɨngatiilaga ʉkʉbʉʉka kʉ Misili. Bo ʉlɨ kʉla ngwakʉkʉpela ʉkʉja kɨkolo ɨkɨkʉlʉmba. 4 Ʉne ngʉja pamopeene na nungwe ʉkʉbʉʉka kʉ Misili, nalooli ngwakʉkʉtwala kangɨ kʉ Kaanani. Joosefu ikwisa kʉjapo bo kʉfwa.”
5 Po Jaakobo alɨnkʉsookako kʉ Beeli-Syeba. Abaanaake baalɨmpɨmbile ʉmwene, abakasi baabo na baanaabo mmageleeti, aga Falao aagatʉmile kʉkʉmmwega. 6 Baabʉʉkile nɨ mitiimo gyabo nɨ fingi fyosa ɨfi baalɨ nafyo mu Kaanani. Jaakobo nɨ kɨkolo kyake kyosa balɨnkʉsaamɨla kʉ Misili. 7 Jaakobo aabʉʉkile na baanaake na biisʉkʉlʉ abakiikʉlʉ na banyambala. Ɨkɨkolo kyake kyosa aabʉʉkile nakyo kʉ Misili.
Abandʉ baa ndʉjungu lwa Jaakobo
8 Ɨsi syo ngamu sya baana baa Isilaɨli, ʉjʉ ɨngamu ɨjɨngɨ jo Jaakobo, aba baalingiile mu Misili. Lʉbeni kyo kɨpanda kya Jaakobo.
9 Abaana baa Lʉbeni aalɨ jo Hanoki, Palʉ, Esoloni na Kalɨmi.
10 Abaana baa Simyoni aalɨ jo Jemweli, Jamini, Ohandi, Jakini, Sohali na Syauli, ʉmwana ʉjʉ aapaapile nʉ nkiikʉlʉ ʉgwa kʉ Kaanani.
11 Abaana baa Leebi aalɨ jo Gelesyoni, Kohati na Melali.
12 Abaana baa Juuta aalɨ jo Eli, Onani, Syela, Pelesi na Sela. Looli Eli na Onani baafwɨliile nkiisʉ kya mu Kaanani. Abaana baa Pelesi aalɨ jo Esoloni na Hamuli.
13 Abaana baa Isakali aalɨ jo Tola, Puba, Jaasyubu na Simuloni.
14 Abaana baa Sabuloni aalɨ jo Selendi, Eloni na Jaleeli.
15 Abo bo baana abanyambala aba Jaakobo aabapaapile na Leeja nkiisʉ kya mu Pandani-Alamu, pamopeene nʉ mwanaabo ʉndɨndwana Ndina. Abaana na biisʉkʉlʉ aba aabapaapile na Leeja baalɨ 33.
16 Abaana baa Gandi aalɨ jo Sifyoni, Hagi, Syuni, Esiboni, Eli, Alondi na Aleli.
17 Abaana baa Aaseli aalɨ jo Imuna, Isiba, Isibi, Belija pamopeene na Sela iilʉmbʉ gwake. Abaana baa Belija aalɨ jo Hebeli na Malakyeli.
18 Abo bo baana aba Jaakobo aabapaapile na Silipa, ʉntʉmwa ʉjʉ Labani aalɨmpeele ʉmwanaake ʉndɨndwana Leeja. Abaana na biisʉkʉlʉ aba aabapaapile na Silipa baalɨ kalongo na ntandatʉ.
19 Abaana aba Jaakobo aabapaapile na Laheli jo Joosefu na Benjamini. 20 Abaana baa Joosefu aba aabapaapile nkiisʉ kya mu Misili jo Manasi na Efulaimu. Abalʉmyana abo, aabapaapile na Esinati, ʉjʉ ʉgwise aalɨ jo Potifela ʉmpuuti ʉgwa nkaaja akaa mu Oni. 21 Abaana baa Benjamini aalɨ jo Bela, Bekeli, Asibeli, Gela, Naamani, Ehi, Losi, Mupimu, Hupimu na Alindi.
22 Abo bo baana na biisʉkʉlʉ aba Jaakobo aabapaapile na Laheli, baalɨ kalongo na bana.
23 Ʉmwana gwa Ndani aalɨ jo Husimu.
24 Abaana baa Nafutali aalɨ jo Jaseeli, Guni, Jeseli na Silemu.
25 Abo bo baana aba Jaakobo aabapaapile na Biliha, ʉntʉmwa ʉjʉ Labani aalɨmpeele ʉmwanaake ʉndɨndwana Laheli. Abaana na biisʉkʉlʉ aba aabapaapile na Biliha baalɨ bahaano na babɨlɨ.
26 Abandʉ boosa aba Jaakobo aasaamile nabo ʉkʉbʉʉka nkiisʉ kya mu Misili baalɨ 66, kɨsita kʉbalɨlako abakasi baa baanaake. 27 Nkiisʉ kya mu Misili Joosefu aabapaapile abaana abanyambala babɨlɨ. Po Jaakobo na baa ndʉjungu lwake boosa, abaa baaliingiile mu Misili, baalɨ 70.
Jaakobo ikʉfika kʉ Misili
28 Jaakobo aalɨntʉmile Juuta ʉkʉtalapo ʉkwakʉjoba na Joosefu ʉkʉtɨ annangɨsye ɨnjɨla jaa kʉ Gosyeni. Jaakobo bo alɨ kɨfuki ʉkʉfika kʉ Gosyeni, 29 Joosefu alɨnkwega iigeleeti lyake, alɨnkʉbʉʉka kʉkʉmmwambɨlɨla ʉgwise kʉ Gosyeni. Joosefu bo afikile kʉ gwise alɨnkʉmmʉʉbatɨla nʉ kʉlɨla akabalɨlo akatali.
30 Po Jaakobo alɨnkʉmmbʉʉla Joosefu alɨnkʉtɨ, “Nalɨnga ngʉfwa lɨɨlɨno ndikʉpaasya, paapo ngʉbwene gwe mwanangʉ ʉliko kʉ bʉʉmi.”
31 Po Joosefu alɨnkʉbabʉʉla abakamu pamopeene na bandʉ boosa aba aaliisile nabo ʉgwise alɨnkʉtɨ, “Ngwakʉmmbʉʉla Falao ʉkʉtɨ, abakamu bangʉ aba baatʉʉgalaga mu Kaanani, pamopeene na boosa aba iisile nabo taata, boosa biisile kʉmyangʉ. 32 Ngwakʉmmbʉʉla ʉkʉtɨ abandʉ aba batiimi, biisile nɨ mbene, ɨngʼoosi, ɨngʼombe nɨ kyʉma kyabo kyosa. 33 Lɨnga Falao aikʉbakoolela nʉ kʉbalaalʉʉsya ɨmbombo ɨjɨ mukʉbomba, 34 mutɨgɨ, ‘Ʉswe twe babombeli baako tʉlɨ batiimi ʉkwandɨla bo tʉlɨ bakeke, bo ʉlwa biisʉkʉlʉ bɨɨtʉ.’ Po mukwitɨkɨsigwa ʉkʉtʉʉgala mu Gosyeni, paapo aBamisili bababengile fiijo abatiimi.”