Joosefu ikwisetʉla kʉ bakamu
45
Po Joosefu alɨnkʉtoligwa ʉkwikasya. Alɨnkʉpaasya ʉkʉlɨla nkyeni mmbandʉ aba baalyɨmile kɨfuki nagwe, alɨnkʉbabʉʉla alɨnkʉtɨ, “Namusooke panja.” Alɨnkʉsyala mwene na bakamu, alɨnkʉbabʉʉla ʉkʉtɨ nkamu gwabo. 2 Alɨnkʉlaata ʉkʉlɨla mpaka aBamisili aba baalɨ panja baapɨliike. Ɨnongwa ɨsyo syafikile kʉ baa nnyumba jaa Falao koope.3 Po Joosefu alɨnkʉbabʉʉla abakamu alɨnkʉtɨ, “Ʉne ne Joosefu! Bʉle, taata akaalɨ aliko kʉ bʉʉmi?” Abakamu balɨnkʉtoligwa ʉkʉmmwamula, paapo baalɨ nʉ lʉtende ʉlʉnywamu fiijo.
4 Po Joosefu alɨnkʉbabʉʉla kangɨ alɨnkʉtɨ, “Namusegelele kʉmyangʉ!” Balɨnkʉsegelela, alɨnkʉbabʉʉla alɨnkʉtɨ, “Ʉne ne Joosefu ʉnnuguna gwɨnu, ne mwalɨɨnyʉʉliisye kʉ Misili! 5 Looli mulɨngatiilaga, kangɨ mulɨngiipaakɨsyaga ʉkʉtɨ fiki mwalɨɨnyʉʉliisye! Kyala jʉʉjo jo ʉjʉ aapelile ʉkʉtɨ muunyʉʉlɨsye, ndalepo ʉkʉbʉpoka ʉbʉʉmi bwa bandʉ. 6 Ɨkɨ kyɨnja kya bʉbɨlɨ ɨkya njala nkiisʉ. Fikaalɨ ɨfyɨnja ɨfingi fihaano ɨfi abandʉ bakabagɨla ʉkʉlɨma pamo ʉkʉtondola. 7 Kyala jʉʉjo jo ʉjʉ aalɨndwele kʉno ʉkʉtɨ ndalepo, ʉkʉtɨ abapoke nʉ bʉpoki ʉbʉkʉlʉmba, ʉmwe na baanɨɨnu mwendelelege ʉkʉjako kʉ bʉʉmi pakiisʉ.
8 “Po mukaja jo ʉmwe mwe mwalɨndwele kʉno, looli jo Kyala. Aalɨmbelile ʉkʉja ngatɨ ndɨ gwise gwa Falao, nje nkʉlʉmba gwa bandʉ baa nnyumba jaake nʉ kʉja ndagɨli gwa kiisʉ kyosa ɨkya mu Misili.
9 “Ʉlʉ mubʉʉke kwa taata mbɨbɨmbɨbɨ! Mukammbʉʉle ʉkʉtɨ, ‘Ʉmwanaako Joosefu atile, “Kyala aambɨɨkile ʉkʉja ndagɨli gwa kiisʉ kyosa ɨkya mu Misili. Ʉlɨngakaabɨla ʉkwisa kʉmyangʉ. 10 Ʉgwe na baanaako, abiisʉkʉlʉ baako, ʉtʉndʉ twako nɨ mitiimo gyako, fyosa fikʉjaga kɨfuki na niine mu Gosyeni. 11 Ʉko ngʉkʉlɨndɨlɨlaga ʉgwe na bakamu baako pamopeene nɨ mitiimo gyako. Ngʉbapaga ɨfindʉ, mulɨngafwa ɨnjala, paapo fikaalɨ ɨfyɨnja fihaano ɨfingi ɨfya njala.” ’ ”
12 Joosefu alɨnkʉbabʉʉla kangɨ alɨnkʉtɨ, “Mwikeetiile mwibeene na maaso gɨɨnu, joope ʉnnuguna gwangʉ Benjamini iikeetiile na maaso gaake, ʉkʉtɨ nalooli jo ʉne Joosefu ne ngʉjoba na nuumwe. 13 Mubʉʉke mukammbʉʉle taata ʉkʉtɨ ndɨ ndagɨli, ngwɨmɨkigwa fiijo muno nkiisʉ kya mu Misili. Mukammbʉʉle syosa ɨsi musibwene. Po mukantwale taata mbɨbɨmbɨbɨ.”
14 Po Joosefu alɨnkʉmmʉʉbatɨla ʉnnuguna Benjamini, balɨnkwanda ʉkʉlɨla kʉno bʉʉbatɨleene. 15 Po Joosefu alɨnkʉbafipa abakʉlʉ baake boosa kʉno ikʉlɨla. Apo abakʉlʉ baake balɨnkwanda ʉkʉjoba nagwe.
Falao ikʉnkoolela Jaakobo ʉkwisa kʉ Misili
16 Bo ɨnongwa ɨsyo sifikile mu nyumba jaa Falao, ʉkʉtɨ abakamu baa Joosefu biisile, Falao na balongosi baake boosa balɨnkʉhoboka fiijo.
17 Falao alɨnkʉmmbʉʉla Joosefu alɨnkʉtɨ, “Ʉbabʉʉle abakamugo, bakwesye ɨfitwalo fyabo pa mbunda syabo, babʉʉke kʉ Kaanani. 18 Bakantwale ʉgʉʉso na bakamu bɨɨnu boosa, angʉbapa ʉbʉjo ʉbʉnunu fiijo nkiisʉ kya mu Misili. Ʉmwe aamukʉlyaga ɨfindʉ ɨfinunu fiijo ɨfya nkiisʉ ɨkɨ.
19 “Kangɨ ʉbabʉʉle ʉtɨ, ‘Mwege amageleeti ʉkʉfuma nkiisʉ kya mu Misili, agaa kwakʉbapɨmbɨlamo abakasi bɨɨnu na baanɨɨnu. Muntwale ʉgwiseemwe kʉno. 20 Mulɨngapaasyaga ɨsya kyʉma kyɨnu, paapo ʉbʉnoge nɨ finunu fyosa ɨfya mu Misili fikʉjaga fyɨnu.’ ”
21 Abaana baa Jaakobo balɨnkʉbomba bo muno aajobiile. Joosefu alɨnkʉbapa amageleeti, bo muno aalɨnndagɨliile Falao, alɨnkʉbapa nɨ findʉ fya kʉlya mu njɨla. 22 Boosa baapeeliigwe ɨmyenda ɨgya kwandʉla mu njɨla, looli Benjamini aapeeliigwe ɨndalama ɨsya feesa 300 nɨ myenda mihaano ɨgya kwandʉla. 23 Alɨnkʉntʉmɨla ʉgwisabo ɨmbunda kalongo ɨsi syapɨmbile ʉtʉndʉ ʉtʉnunu ʉtwa nkiisʉ kya mu Misili, syope ɨmbunda ɨmbɨɨki kalongo syapɨmbile ɨnganu nɨ findʉ fya kʉlya mu njɨla.
24 Po Joosefu alɨnkʉlagana na bakamu. Bo bikʉsookapo alɨnkʉbabʉʉla alɨnkʉtɨ, “Mulɨngalwaga mu njɨla.” 25 Abakamu balɨnkʉsookamo mu Misili, balɨnkʉbʉʉka kʉ gwisabo nkiisʉ kya mu Kaanani.
26 Bo bafikile kʉ gwisabo, balɨnkʉmmbʉʉla balɨnkʉtɨ, “Joosefu aliko kʉ bʉʉmi! Ʉmwene jo ndagɨli gwa kiisʉ kyosa ɨkya mu Misili!” Jaakobo aaswigile fiijo, aajeetile ɨsi bammbʉʉlaga.
27 Po abaanaake balɨnkʉmmbʉʉla ɨnongwa syosa ɨsya Joosefu ɨsi aababʉʉlile. Jaakobo bo agabwene amageleeti aga Joosefu agatʉmile kʉkʉmmwega ʉkʉntwala kʉ Misili, aahobwike fiijo.
28 Jaakobo alɨnkʉtɨ, “Niitiike! Nalooli ʉmwanangʉ Joosefu aliko kʉ bʉʉmi. Mbʉʉke ngankeete bo ngaalɨ ʉkʉfwa.”