Ɨkɨkombe kikwagigwa nkɨnyambɨ kya Benjamini
44
Po Joosefu alɨnkʉnndagɨla ʉmbombeli ʉjʉ ɨɨmɨlɨlaga ɨnyumba jaake alɨnkʉtɨ, “Gwisʉsye ɨfindʉ mfinyambɨ fya bandʉ aba, ɨfi babagiile ʉkʉpɨmba. Ʉbɨɨke ɨndalama sya kʉkʉtɨ mundʉ pamwanya nkɨnyambɨ kyake. 2 Nkɨnyambɨ kya nnuguna gwabo, ʉbɨɨke ɨndalama syake pamopeene nɨ kɨkombe kyangʉ ɨkya feesa.” Ʉmbombeli jʉla alɨnkʉbomba bo muno aalɨmmbʉʉliile Joosefu.3 Po bo kʉkiile, abakʉlʉ baa Joosefu balɨnkwitɨkɨsigwa ʉkʉsookapo nɨ mbunda syabo. 4 Bo bendilepo panandɨ ʉkʉfuma nkaaja, Joosefu alɨnkʉnndagɨla ʉmbombeli jʉla alɨnkʉtɨ, “Ʉbakonge nakalɨnga abandʉ bala. Bo ʉbaagile ʉkabalaalʉʉsye ʉkatɨ, ‘Fiki mutʉhombile ɨmbiibi pa nunu? 5 Fiki mwibile ɨkɨkombe ɨkɨ ikʉnwela nʉ kʉbombela ʉbʉlagʉsi ʉntwa gwangʉ? Mubombile ɨmbiibi fiijo!’”
6 Po paapo ʉmbombeli jʉla alɨnkʉbakonga, alɨnkʉbabʉʉla ɨsi Joosefu aababʉʉlile. 7 Balɨnkʉnndaalʉʉsya balɨnkʉtɨ, “Fiki gwe ntwa kʉjoba ɨnongwa bo ɨsi? Ʉswe twe batʉmwa baako tʉkabagɨla ʉkʉbomba bo ʉlo! 8 Ʉkʉmbʉke ɨndalama sila twasyagile mfinyambɨ fyɨtʉ, twagomwike nasyo ʉkʉfuma nkiisʉ kya mu Kaanani, twakʉpeele. Po twibege bʉleebʉle ɨndalama nɨ sahabʉ sya ntwa gwɨtʉ nnyumba jaake? 9 Lɨnga ɨkɨkombe ɨkyo kʉkyaga nkɨnyambɨ kya jʉmo mmyɨtʉ, agogigwege! Twe bangɨ tukʉjaga batʉmwa baako.” 10 Ʉmbombeli jʉla alɨnkʉtɨ, “Eena, sijege bo muno mujobiile. Lɨnga nʉmmwagile nakyo jʉmo, ʉjo ikʉjaga ntʉmwa gwangʉ, looli abangɨ boosa bikʉjaga baabʉke itolo.”
11 Po boosa nakalɨnga balɨnkʉtʉʉla paasi ɨfinyambɨ fyabo nʉ kwabʉla. 12 Ʉmbombeli jʉla alɨnkwanda ʉkʉlonda ɨkɨkombe mfinyambɨ fyabo, aatalile ɨkya nkʉlʉ gwabo, alɨnkʉmalɨɨkɨsya ɨkya nnandɨ. Po ɨkɨkombe kɨla kɨlɨnkwagigwa nkɨnyambɨ kya Benjamini.
13 Bo sibonike ɨsyo, balɨnkʉnyaafulania ɨmyenda gyabo kʉ bʉsulumanie. Balɨnkʉkwesya kangɨ ɨfinyambɨ fyabo pa mbunda, balɨnkʉgomokelako kʉno baafumile.
Juuta ikʉmmwɨmɨla Benjamini
14 Juuta na bakamu bo bikʉfika kangɨ kwa Joosefu, ʉmwene aalimo nnyumba. Po balɨnkʉfugama, balɨnkwinama mpaka paasi. 15 Joosefu alɨnkʉbalaalʉʉsya alɨnkʉtɨ, “Fiki mubombile ɨsyo? Mukamanya ʉkʉtɨ ndɨ na maka agaa kʉbomba ʉbʉlagʉsi ʉkʉsyagania syosa?”
16 Juuta alɨnkʉtɨ, “Gwe ntwa gwɨtʉ, tʉkʉbʉʉle silɨkʉ? Tʉjobe silɨkʉ ʉkwinokesya? Kyala anangiisye ʉbʉtʉlanongwa bwɨtʉ pabwelu. Ʉswe pamopeene na ʉjʉ aalɨ nakyo ɨkɨkombe kyako, ʉlʉ tʉjege batʉmwa baako.” 17 Looli Joosefu alɨnkwamula alɨnkʉtɨ, “Hɨmma! Ndikʉbomba bo ʉlo! Mwene ʉjʉ aaliibile ɨkɨkombe kyangʉ jo ikʉjaga ntʉmwa gwangʉ. Mwesa mwe bangɨ mubʉʉkege kʉ gwiseemwe nʉ lʉtengaano.”
18 Po Juuta alɨnkʉsegelela kwa Joosefu, alɨnkʉtɨ, “Gwe ntwa, ʉne ndɨ mbombeli gwako. Ʉgwe ʉfwene na Falao, ngʉkʉsʉʉma njobepo simo, ʉlɨngangalalɨla. 19 Ʉgwe gwatʉlaalʉʉsiisye gwatile, ‘Mulɨ nʉ gwiseemwe pamo ʉgwamyɨnu ʉjʉngɨ?’ 20 Twakʉbʉʉlile twatile, ‘Taata akaalɨ aliko kʉ bʉʉmi ʉmwene nkangale fiijo, kangɨ tʉlɨ nʉ nnuguna gwɨtʉ, ʉjʉ taata aalɨmpaapile mbʉkangale. Ʉnnuguna gwɨtʉ ʉjo aalɨ nʉ nkʉlʉ, baalɨ nna jʉmojwene. Looli ʉnkʉlʉ ʉjo aafwile. Ʉnnuguna asyele kʉkaaja jo nkʉndwe fiijo kwa taata.’
21 “Gwatʉbʉʉlile gwatile tʉkantwale, ʉkʉtɨ gwise ʉnkeete. 22 Twakʉbʉʉlile twatile, ‘Alɨngasookako kʉ gwise. Lɨnga asookileko, ʉgwise aikʉfwa.’ 23 Looli ʉlɨnkʉtʉbʉʉla ʉlɨnkʉtɨ, ‘Lɨnga mutoliigwe ʉkwisa nʉ nnuguna gwɨnu, ndikwisa kʉbambɨlɨla kangɨ.’ 24 Leelo bo tʉfikile kwa taata, ʉmbombeli gwako, tʉlɨnkʉmmbʉʉla ɨsi gwatʉbʉʉlile.
25 “Po taata alɨnkʉtʉbʉʉla alɨnkʉtɨ, ‘Mubʉʉke kangɨ kʉkʉʉla ɨfindʉ.’ 26 Tʉlɨnkʉmmbʉʉla tʉlɨnkʉtɨ, ‘Tʉkabagɨla ʉkʉbʉʉka kangɨ kʉla twibeene, looli lɨnga tukʉbʉʉka pamopeene nʉ nnuguna gwɨtʉ. Lɨnga tʉtikʉbʉʉka nʉ nnuguna gwɨtʉ, ʉnkʉlʉmba jʉla atikwakʉtwambɨlɨla kangɨ.’
27 “Taata ʉjʉ jo mbombeli gwako, alɨnkʉtʉbʉʉla alɨnkʉtɨ, ‘Mumeenye ʉkʉtɨ ʉnkasi gwangʉ Laheli aalɨɨmbapiile abaana babɨlɨ. 28 Jʉmo aasobile, aalɨɨliigwe nɨ finyamaana. Ngammbonamo sikʉ ʉkwandɨla akabalɨlo kala! 29 Lɨnga aamukʉmmwega Benjamini joope, pamo simmwage ɨnyali, aamukʉndwalɨla ʉbʉsulumanie, ʉne ndɨ nkangale angʉfwa kʉnongwa jaa bʉsulumanie ʉbʉkʉlʉmba fiijo.’
30 “Po gwe ntwa gwangʉ, ngabagɨla ʉkʉbʉʉka kwa taata kɨsita ndʉmyana ʉjʉ. Ʉbʉʉmi bwa taata bʉlɨ mu ndʉmyana ʉjʉ, 31 lɨnga aagile tʉkaja nagwe, nalooli taata aikʉfwa. Ʉswe tʉkabagɨla ʉkʉnngoga taata kʉ bʉsulumanie ʉbʉkʉlʉmba mbʉkangale bwake. 32 Ne mbombeli gwako naalapile kwa taata ʉkʉtɨ nje mwɨmɨlɨli gwa ndʉmyana ʉjʉ. Naalɨmmbʉʉlile naatile, ‘Lɨnga ngagomoka nagwe, ɨnongwa jɨjege jangʉ bwila na bwila!’