Abakʉlʉ baa Joosefu bikʉbʉʉka kangɨ kʉ Misili
43
Akabalɨlo ako ɨnjala jɨlɨnkwendelela ʉkʉja ngalɨ fiijo nkiisʉ kya mu Kaanani. 2 Ɨfindʉ ɨfi abaana baa Jaakobo baalyʉlile kʉ Misili bo fimaliike, Jaakobo alɨnkʉbabʉʉla abaanaake alɨnkʉtɨ, “Mubʉʉke kangɨ kʉ Misili, mukatʉʉlɨle ɨfindʉ ɨfingi.”3 Looli Juuta alɨnkʉmmbʉʉla ʉgwise alɨnkʉtɨ, “Ʉmwɨmɨlɨli ʉnkʉlʉmba jʉla aatʉsokile fiijo, aatile, ‘Ndikwisa kʉbambɨlɨla kangɨ, lɨnga mutikwisa kʉgomoka nʉ nnuguna gwɨnu.’ 4 Lɨnga kwitɨka Benjamini ʉkʉbʉʉka na nuuswe, po tukwakʉkʉʉlɨla ɨfindʉ. 5 Looli lɨnga ʉtikwitɨka ʉkʉtɨ abʉʉke na nuuswe, na nuuswe tʉtikʉbʉʉka, paapo aatʉbʉʉlile aatile, ‘Ndikwisa kʉbambɨlɨla kangɨ, lɨnga mutikwisa kwisa nʉ nnuguna gwɨnu.’ ”
6 Jaakobo alɨnkʉtɨ, “Nongwa jaa fiki muumbɨɨkile mbʉtolwe, ʉkʉmmbʉʉla ʉmwɨmɨlɨli ʉnkʉlʉmba ʉkʉtɨ mulɨ nʉ nnuguna gwɨnu ʉjʉngɨ?”
7 Balɨnkʉmmwamula balɨnkʉtɨ, “Ʉmundʉ jʉla aatʉlaalʉʉsiisye fiijo ɨnongwa syɨtʉ nɨ sya baamyɨtʉ, alɨnkʉtɨ, ‘Ʉgwiseemwe aliko kʉ bʉʉmi? Mulɨ nagwe ʉnnuguna gwɨnu ʉjʉngɨ?’ Nuuswe twammwamulaga ʉkʉkongana muno aalaalʉʉkɨsyaga. Twamanyaga bʉleebʉle ʉkʉtɨ ikʉtʉlagɨla ʉkʉntwala ʉnnuguna gwɨtʉ?”
8 Po Juuta alɨnkʉmmbʉʉla ʉgwise alɨnkʉtɨ, “Ʉmmwitɨkɨsye ʉnnuguna gwɨtʉ ʉkʉbʉʉka na niine, ʉswe na nungwe tʉlɨngafwa ɨnjala pamopeene na baanɨɨtʉ. 9 Ʉne ngʉja mwɨmɨlɨli gwa mwanaako. Lɨnga ndikwakʉgomoka nagwe kʉmyako, ngʉjaga ni nongwa jaa bwila na bwila! 10 Lɨnga tʉkaakaabiile, ngalɨ tʉbʉʉkile nʉ kʉgomoka kabɨlɨ.”
11 Po ʉgwisabo alɨnkʉbabʉʉla alɨnkʉtɨ, “Lɨnga silɨ bo ʉlo, mubɨɨke mfinyambɨ fyɨnu ɨfindʉ ɨfya nkiisʉ kyɨtʉ, muntwalɨle ʉmwɨmɨlɨli ʉnkʉlʉmba jʉla fikajege fya kʉsekeesya. Muntwalɨle amafuta, ʉlʉʉki, ɨfilʉngo, lʉbani na masyabala. 12 Mubʉʉke nɨ ndalama ɨnyingi, kabɨlɨ ʉkʉkɨnda ɨsi sikʉlondigwa, paapo ɨsi baabɨɨkile mfinyambɨ fyɨnu mukabagomolele. Pamo baasobile ʉkʉsibɨɨka mfinyambɨ fyɨnu. 13 Mubʉʉke pamopeene nʉ nnuguna gwɨnu, nakalɨnga mubʉʉke kʉ mwɨmɨlɨli ʉnkʉlʉmba jʉla. 14 Kyala ʉMwene maka goosa abatʉʉle, ʉmundʉ jʉla akabapɨlɨkɨsye nʉ kʉbapaakɨsya, akammwabʉle ʉnnuguna gwɨnu ʉjʉ aliko kʉla, mukagomoke pamopeene nʉ nnuguna gwɨnu Benjamini. Lɨnga ko kʉfwɨlwa, mfwɨliilwe.”
Abakʉlʉ baa Joosefu bikʉbʉʉka kʉ Misili na Benjamini
15 Po abaana baa Jaakobo balɨnkwega ɨfya kʉsekeesya fila, pamopeene nɨ ndalama ɨnyingi kabɨlɨ ʉkʉkɨnda ʉlwa kwanda, balɨnkʉbʉʉka kʉ Misili pamopeene nʉ nnuguna gwabo Benjamini. Bo bafikile kʉ Misili, balɨnkʉbʉʉka kwa Joosefu, balɨnkwɨma nkyeni mmyake.
16 Joosefu bo ammbwene Benjamini alɨ pamopeene na bakʉlʉ, alɨnkʉmmbʉʉla ʉmbombeli gwake ʉjʉ ɨɨmɨlɨlaga ɨnyumba jaake, alɨnkʉtɨ, “Batwale abaheesya aba kʉ nyumba jangʉ, ʉkaboole ɨkɨnyamaana kɨmo, ʉkatendekesye ɨfindʉ. Ʉmwisyʉgʉ pamuusi, ngʉja pakʉlya nabo abandʉ aba.”
17 Ʉmbombeli gwake jʉla alɨnkʉbatwala kʉ nyumba jaa Joosefu, bo muumo aabalagɨliile. 18 Bo baagile ikʉbatwala kʉ nyumba jaa Joosefu, balɨnkʉja nʉ lʉtende. Balɨnkʉjobesania balɨnkʉtɨ, “Batʉtwele apa kʉnongwa jaa ndalama ɨsi baasibɨɨkile mfinyambɨ fyɨtʉ. Ikʉlonda ɨnjɨla ɨjaa kʉtʉkola, ʉkʉtɨ apoke ɨmbunda syɨtʉ nʉ kʉtʉbɨɨka ʉkʉja batʉmwa baake.”
19 Po balɨnkʉsegelela kʉ mbombeli jʉla, balɨnkʉjoba nagwe pa kɨfigo balɨnkʉtɨ, 20 “Gwe ntwa gwɨtʉ ʉtʉhobokele, twaliisile apa ʉlʉtasi kʉkʉʉla ɨfindʉ. 21 Bo tukʉbʉʉka kʉkaaja, pakɨlo twafikile mu nyumba jaa kʉgona abaheesya. Bo tukwabʉla ɨfinyambɨ fyɨtʉ, tʉlɨnkʉswiga ʉkʉsyaga ɨndalama nkatɨ. Syalɨ syo silasila ɨsi twatwele ʉkʉʉlɨla ɨfindʉ. Po tʉtwele ɨndalama sila ʉkʉkʉgomolela. 22 Twisile nɨ ndalama ɨsingi ɨsya kʉʉlɨla kangɨ ɨfindʉ. Looli tʉkammanya ʉjʉ aabɨɨkile ɨndalama ɨsyo mfinyambɨ fyɨtʉ.”
23 Ʉmbombeli jʉla alɨnkʉbabʉʉla alɨnkʉtɨ, “Mujege nʉ lʉtengaano mulɨngatiilaga, paapo Kyala gwɨnu, ʉjʉ jo Kyala ʉgwa gwiseemwe, jo ʉjʉ aabɨɨkile ɨndalama ɨsyo mfinyambɨ fyɨnu. Ʉne naalyambɨliile ɨndalama syɨnu.” Po alɨnkʉbatwalɨla Simyoni ʉgwamyabo.
24 Ʉmbombeli jʉla alɨnkʉbingɨsya nnyumba jaa Joosefu, alɨnkʉbapa amɨɨsi gaa kʉsugusula mmalʉndɨ nʉ kʉsipa ɨfindʉ ɨmbunda syabo. 25 Baabʉʉliigwe ʉkʉtɨ Joosefu ikwisa pamuusi kʉkʉlya nabo ɨfindʉ, po baatendekiisye kɨlɨngaani ɨfya kʉsekeesya ɨfya kʉmpapo.
26 Joosefu bo iisile pakaaja, balɨnkʉmpapo ɨfya kʉsekeesya ɨfi baalɨ nafyo, balɨnkʉfugama, balɨnkwinama mpaka paasi. 27 Joosefu alɨnkʉbaponia, po alɨnkʉbalaalʉʉsya alɨnkʉtɨ, “Agonile ʉgwiseemwe ʉjʉ mwatile nkangale? Akaalɨ aliko kʉ bʉʉmi?”
28 Balɨnkʉmmwamula balɨnkʉtɨ, “Agonile taata ʉmbombeli gwako, aliko kʉ bʉʉmi.” Po balɨnkʉfugama, balɨnkwinama mpaka paasi.
29 Joosefu alɨnkʉbakeeta, alɨnkʉmmbona ʉnnuguna Benjamini, ʉjʉ baalɨ nna jʉmojwene, alɨnkʉlaalʉʉsya alɨnkʉtɨ, “Bʉle, ʉjʉ jo nnuguna gwɨnu ʉjʉ mwalɨɨmbʉʉlilepo ɨnongwa syake? Kyala akʉsaje mwanangʉ.” 30 Joosefu alɨnkʉja nɨ kɨtima mu ndumbula jaake bo ammbwene ʉnnuguna, amaasosi galɨnkʉsululuka, nakalɨnga alɨnkʉsooka panja, alɨnkwingɨla kʉ sofu, alɨnkwanda ʉkʉlɨla.
31 Bo amalile ʉkʉlɨla, alɨnkʉsugusula kʉmaaso, alɨnkʉsooka kʉno ikwikasya, alɨnkʉlagɨla ʉkʉtɨ batwale ɨfindʉ. 32 Joosefu balɨnkʉntwalɨla ɨfindʉ, balɨnkʉnnjabɨla pasima, abakamu balɨnkʉbajabɨla ɨfyabo, aBamisili boosa balɨnkʉbapa ɨfyabo. Syabombiigwe bo ʉlo paapo kwalɨ mwiko aBamisili ʉkʉlya pamopeene na Bahibʉli. 33 Abakamu baa Joosefu baabatʉʉgeesye ʉkʉkongana nʉ bʉkʉlʉmba bwabo, ʉkwandɨla ʉgwa kɨpanda mpaka ʉjʉ aamalɨɨkiisye. Balɨnkʉkeetana nʉ kʉswiganika. 34 Po balɨnkʉpeeligwa ɨfindʉ ɨfya kʉfuma pa meesa jaa Joosefu, looli Benjamini aapeeliigwe ɨfingi kahaano ʉkʉkɨnda ɨfya bangɨ boosa. Balɨnkʉnwa nʉ kʉsekela fiijo.