Abakʉlʉ baa Joosefu bikʉbʉʉka kʉ Misili
42
Po Jaakobo alɨnkʉpɨlɨka ʉkʉtɨ ɨfindʉ filimo nkiisʉ kya mu Misili, alɨnkʉbabʉʉla abaanaake alɨnkʉtɨ, “Fiki mutʉʉgeele mukʉkeetana itolo? 2 Mbɨliike ʉkʉtɨ ɨfindʉ filimo nkiisʉ kya mu Misili, mubʉʉke mukʉʉle ɨfindʉ, tʉlɨngafwa ɨnjala.”3 Po abakʉlʉ kalongo abaa Joosefu balɨnkʉbʉʉka kʉ Misili kʉkʉʉla ɨfindʉ. 4 Looli Jaakobo akaalɨmmwitɨkiisye ʉmwanaake ʉnnandɨ Benjamini ʉkʉbʉʉka na bakʉlʉ, paapo aapaasyaga ʉkʉmmwaga ʉbʉtolwe. 5 Abaana baa Isilaɨlia pamopeene na bandʉ abangɨ baabʉʉkile kʉkʉʉla ɨfindʉ kʉ Misili, paapo ɨkiisʉ kyope ɨkya mu Kaanani kyalɨ nɨ njala ɨngalɨ fiijo.
Joosefu ikʉbagela abakʉlʉ
6 Akabalɨlo kala Joosefu jo ʉjʉ aalɨ mwɨmɨlɨli ʉnkʉlʉmba nkiisʉ kya mu Misili. Jo ʉjʉ aabʉʉlɨkɨsyaga ɨfindʉ abandʉ boosa. Abakʉlʉ baa Joosefu balɨnkwisa kʉmyake, balɨnkʉfugama, balɨnkwinama mpaka paasi. 7 Bo Joosefu ababwene abaamyabo alɨnkʉbamanya, looli alɨnkʉfwana akabamanya, alɨnkʉjoba nabo kʉ bʉkalɨ. Alɨnkʉbalaalʉʉsya alɨnkʉtɨ, “Ʉmwe, mufumile kʉʉgʉ?” Balɨnkʉmmwamula balɨnkʉtɨ, “Tʉfumile kʉ Kaanani, twisile kʉkʉʉla ɨfindʉ.”
8 Ʉmwene Joosefu aabameenye abakʉlʉ, looli abeene bakaalɨmmeenye. 9 Po alɨnkʉkʉmbʉka ɨnjosi syake ɨsi aagogilwe, ɨsi syabajobaga abaamyabo alɨnkʉtɨ, “Ʉmwe mulɨ batendeesi! Mwisile nkʉtendeela ʉboonywa bwa kiisʉ kyɨtʉ.” 10 Balɨnkʉmmwamula balɨnkʉtɨ, “Gwe ntwa, hɨmma! Ʉswe tʉlɨ babombeli baako, twisile kʉkʉʉla ɨfindʉ. 11 Ʉswe twesa tʉlɨ baana baa mundʉ jʉmojwene, tʉlɨ basʉʉbɨligwa. Tʉkaja batendeesi!”
12 Joosefu alɨnkʉbaamula alɨnkʉtɨ, “Hɨmma! Mwisile kʉkʉtendeela ʉboonywa bwa kiisʉ kyɨtʉ muno bʉjɨɨliile.” 13 Balɨnkʉmmbʉʉla balɨnkʉtɨ, “Ʉswe twe babombeli baako, twalɨ kalongo na babɨlɨ, twe baana baa mundʉ jʉmojwene, tʉlɨ benekaaja baa nkiisʉ kya mu Kaanani. Ʉnnuguna gwɨtʉ asyele na taata kʉkaaja, jʉmo aafwile.”
14 Joosefu alɨnkʉbaamula alɨnkʉtɨ, “Fyobeene ngʉtɨ ʉmwe mulɨ batendeesi! 15 Ngʉbagela kʉ njɨla ɨjɨ, ʉkʉtɨ mumanyigwe. Ngʉlapa mu ngamu jaa Falao, mutikʉsookapo apa mpaka ʉnnuguna gwɨnu iise apa. 16 Muntʉme jʉmo, akantwale ʉnnuguna gwɨnu, mwe bangɨ musyale apa mupinyigwe mu nnyololo. Apo po angʉmanya ʉkʉtɨ mujobile ɨsya nalooli. Lɨnga mukantwala, ngʉlapa mu ngamu jaa Falao ʉkʉtɨ ʉmwe mulɨ batendeesi!” 17 Po Joosefu alɨnkʉbiigalɨla mu nyumba jaa nnyololo kʉ masikʉ matatʉ.
18 Pi isikʉ lya bʉtatʉ Joosefu alɨnkʉbabʉʉla alɨnkʉtɨ, “Ʉne ngʉntiila Kyala. Mubombe ɨsi ngʉjoba, po aamutikʉfwa. 19 Lɨnga mukʉjoba ɨsya nalooli, jʉmo asyale mu nnyololo, mwe bangɨ mubatwalɨle ɨfindʉ abakamu bɨɨnu aba bikʉtaamigwa nɨ njala. 20 Po mukandwalɨle ʉnnuguna gwɨnu, apo angʉmanya ʉkʉtɨ mukʉjoba ɨsya nalooli, po aamutikʉgogigwa.” Balɨnkwitɨka ʉkʉbomba ɨsi aababʉʉlile.
21 Balɨnkʉjobesania balɨnkʉtɨ, “Nalooli twatʉlile ɨnongwa kʉ nnuguna gwɨtʉ Joosefu. Twalɨmmbwene bo ikʉtaamigwa na bo ikʉlamba ʉkʉtɨ tʉnhobokele, leelo tʉkaalɨmpɨlɨkiisye. Fyobeene ʉbʉtolwe ʉbʉ bʉtwagile.” 22 Lʉbeni alɨnkʉbalaalʉʉsya alɨnkʉtɨ, “Ngaababʉʉlile ʉkʉtɨ tʉlɨngamfulasya ʉmwanike? Looli mulɨnkʉsita kʉmbɨlɨka! Tʉlɨ pakʉfundigwa kʉnongwa jaa ilopa lyake.”
23 Abakʉlʉ baa Joosefu bakaameenye ʉkʉtɨ ʉmwene aapɨlɨkaga syosa ɨsi baajobaga, paapo aajobaga nabo ʉkwendela kʉ mundʉ ʉjʉ aasanusyaga amasyʉ gaabo mu njobelo jaa Bamisili. 24 Joosefu alɨnkʉsookapo pala, alɨnkʉbʉʉka pambalɨ, alɨnkwanda ʉkʉlɨla. Bo amalile ʉkʉlɨla, alɨnkʉgomokelako kʉkʉjoba nabo. Po alɨnkʉlagɨla ʉkʉkoligwa Simyoni nʉ kʉpinyigwa ɨminyololo nkyeni mbaamyabo.
Abakʉlʉ baa Joosefu bikʉgomoka kʉ Kaanani
25 Joosefu alɨnkʉlagɨla ʉkwisʉsya ɨfindʉ mfinyambɨ fya bakʉlʉ, nʉ kʉbagomokesya ɨndalama syabo kʉkʉtɨ mundʉ nkɨnyambɨ kyake, kangɨ bapeeligwe ɨfindʉ fya kʉlya mu njɨla. Syabombiigwe bo ʉlo. 26 Abakʉlʉ baa Joosefu balɨnkʉkwesya ɨfinyambɨ fyabo pa mbunda, balɨnkʉbʉʉka. 27 Bo bafikile pabʉjo bwa kʉgonapo, jʉmo alɨnkwigʉla ɨkɨnyambɨ kyake, ʉkʉjɨpa ɨmbunda jaake ɨfya kʉlya. Alɨnkʉsyaga ɨndalama syake silɨ pamwanya pa findʉ nkɨnyambɨ kyake, aaswigile. 28 Alɨnkʉbabʉʉla abakamu alɨnkʉtɨ, “Ɨndalama syangʉ bagomwisye! Keeta, silimo nkɨnyambɨ kyangʉ.” Po bo bapɨliike ɨsyo, balɨnkoonyoka amaka. Balɨnkʉtetema balɨnkʉtɨ, “Sya fiki ɨsi Kyala atʉbombiile!”
29 Bo bafikile nkiisʉ ɨkya mu Kaanani kʉ gwisabo Jaakobo, balɨnkʉmmbʉʉla syosa ɨsi syabaagile. 30 Balɨnkʉjoba balɨnkʉtɨ, “Ʉmwɨmɨlɨli ʉnkʉlʉmba ʉgwa kiisʉ kya mu Misili aajobaga na nuuswe kʉ bʉkalɨ, nʉ kʉtwinogona ʉkʉtɨ tukʉtendeela ɨkiisʉ kyabo. 31 Looli ʉswe tʉlɨnkʉmmbʉʉla ʉkʉtɨ ʉswe tʉlɨ basʉʉbɨligwa, tʉkaja batendeesi. 32 Tʉlɨnkʉmmbʉʉla tʉlɨnkʉtɨ, ‘Ʉswe twapaapiigwe twe baana kalongo na babɨlɨ mwa taata, jʉmo aafwile, ʉnnuguna gwɨtʉ asyele na taata kʉ Kaanani.’ 33 Po ʉmwɨmɨlɨli ʉnkʉlʉmba jʉla alɨnkʉtʉbʉʉla alɨnkʉtɨ, ‘Angʉmanya ʉkʉtɨ mulɨ basʉʉbɨligwa kʉ njɨla ɨjɨ. Munndeke ʉgwamyɨnu jʉmo apa, mwe bangɨ mubatwalɨle ɨfindʉ abakamu bɨɨnu aba bikʉtaamigwa nɨ njala. 34 Mukandwalɨle ʉnnuguna gwɨnu, apo angʉmanya ʉkʉtɨ ʉmwe mukaja batendeesi, mulɨ basʉʉbɨligwa. Po ngwisa kʉnndekesya ʉnkamu gwɨnu, ʉmwe aamukwitɨkɨsigwa ʉkʉʉla nʉ kʉʉlɨsya nkiisʉ ɨkɨ.’ ”
35 Bo bikʉsoosyamo ɨfindʉ mfinyambɨ fyabo, balɨnkʉswiga ʉkʉsyaga ɨndalama syabo boosa bagomokesiigwe, syabɨɨkiigwe mfinyambɨ fyabo. Ɨndalama ɨsyo bo basibwene, boosa pamopeene nʉ gwisabo balɨnkʉkoligwa nʉ lʉtende. 36 Jaakobo alɨnkʉbabʉʉla abaanaake alɨnkʉtɨ, “Mubeegile abaanangʉ, Joosefu akajapo, Simyoni akajapo, Benjamini joope mukʉlonda ʉkʉmmwega. Syosa ɨsi siinyaagile.”
37 Lʉbeni alɨnkʉmmbʉʉla ʉgwisabo alɨnkʉtɨ, “Ʉmbepo Benjamini abʉʉke na nuuswe, angʉnndɨndɨlɨla kanunu nʉ kʉnngomosya kʉmyako kanunu. Lɨnga nganngomola, ʉbagoge abaanangʉ babɨlɨ.”
38 Looli Jaakobo alɨnkʉmmwamula alɨnkʉtɨ, “Hɨmma, ʉmwanangʉ atikʉbʉʉka na nuumwe. Ʉnkʉlʉ Joosefu afwile, Benjamini asyele mwene mu nna. Ngangeele fiijo, lɨnga ɨmbiibi sikʉmmwaga mu njɨla, angʉsulumania mpaka ʉkʉfwa.”